વડાપ્રધાન નરેન્દ્ર મોદીનો જન્મદિવસ નિમિત્તે ગુજરાત સહિત દેશના વિવિધ વિસ્તારોમાં અલગ-અલગ પ્રકારના કાર્યક્રમો યોજાઈ રહ્યા છે. ખાસ વાત એ છે કે અનેક કાર્યક્રમોને PM મોદીની ઉંમર એટલે કે 76ના આંકડા સાથે જોડવામાં આવ્યા છે.
• ગુજરાતમાં 88 લાખથી વધુ દીવડાં
ગુજરાતમાં ‘આશીર્વાદનો દીવો’ કાર્યક્રમ અંતર્ગત 18,500થી વધુ સ્થળોએ 88 લાખથી વધુ માટીના દીવડાં પ્રગટાવવાનું આયોજન કરવામાં આવ્યું છે. અમદાવાદના કાંકરિયા લેકફ્રન્ટ ખાતે મુખ્ય કાર્યક્રમમાં 1.25 લાખ દીવડાં પ્રગટાવવામાં આવ્યા હતા, જ્યારે અટલ બ્રિજ પર વધુ 76,000 દીવડાં પ્રગટાવવાની વ્યવસ્થા કરવામાં આવી હતી.
• અમદાવાદમાં 76,000 દીવડાં અને મહાઆરતી
અમદાવાદના વિશ્વ ઉમિયાધામ ખાતે PM મોદીના જન્મદિવસની ઉજવણી માટે 76,000 દીવડાં પ્રગટાવવા, મહાઆરતી અને સામૂહિક વંદે માતરમ ગાનનું આયોજન કરવામાં આવ્યું હતું. કાર્યક્રમમાં લગભગ 5,000 લોકો જોડાવાના હતા.
• 76 ગીર ગાયનું દાન
મહેસાણા જિલ્લાના ઉંઝામાં સીતાવન ગૌશાળા દ્વારા આર્થિક રીતે નબળા વર્ગની 76 મહિલાઓને 76 ગીર ગાય આપવાની પહેલ કરવામાં આવી. આયોજકોના જણાવ્યા અનુસાર, તેનો હેતુ મહિલાઓને આજીવિકા માટે સહાય આપી આત્મનિર્ભર બનાવવાનો છે.
• 76,000 છોડનું વિતરણ
‘વિશ્વ ગુજરાતી સમાજ’ દ્વારા કિચન ગાર્ડનને પ્રોત્સાહન આપવા માટે 76,000 છોડનું વિતરણ કરવાની પહેલ કરવામાં આવી છે. લાભાર્થીઓને છોડ સાથે તેની ખેતી અંગે માર્ગદર્શન આપવાની વ્યવસ્થા પણ કરવામાં આવી છે.
• વડનગરથી વારાણસી સુધી બાઇક યાત્રા
PM મોદીના જન્મસ્થળ વડનગર અને તેમની રાજકીય સફર સાથે જોડાયેલા વારાણસી વચ્ચે ‘સેવા સંકલ્પ બાઇક યાત્રા’ શરૂ કરવામાં આવી છે. વડનગરથી વારાણસી અને વારાણસીથી વડનગર એમ બંને તરફથી યાત્રા યોજાઈ રહી છે. આ અભિયાન 17 સપ્ટેમ્બરથી શરૂ થઈને 7 ઓક્ટોબર સુધી ચાલવાનું છે.
વડનગરથી નીકળેલી યાત્રાને કેન્દ્રીય ગૃહમંત્રી અમિત શાહે લીલી ઝંડી બતાવી હતી, જ્યારે વારાણસી તરફની યાત્રાનું ઉદ્ઘાટન રક્ષામંત્રી રાજનાથ સિંહ દ્વારા કરવામાં આવ્યું હતું.
• સુરતમાં 10 લાખથી વધુ દીવડાં
સુરતમાં પણ જન્મદિવસની ઉજવણી અંતર્ગત 10 લાખથી વધુ માટીના દીવડાં 10,800થી વધુ સ્થળોએ પ્રગટાવવામાં આવ્યા હોવાનું અહેવાલોમાં જણાવાયું છે. વિવિધ સંગઠનો અને સ્વયંસેવકોએ આ કાર્યક્રમમાં ભાગ લીધો હતો.
• સુરતમાં દુકાનો પર 5%થી 76% સુધી ડિસ્કાઉન્ટ
સુરત પશ્ચિમ વિસ્તારમાં કેટલાક વેપારીઓએ PM મોદીના જન્મદિવસની ઉજવણીના ભાગરૂપે 5%થી 76% સુધીના ડિસ્કાઉન્ટની જાહેરાત કરી હતી.
• વારાણસીમાં 76 પંડિતો દ્વારા ગંગા અભિષેક
વારાણસીમાં PM મોદીના જન્મદિવસ નિમિત્તે 76 પંડિતો દ્વારા ગંગા અભિષેકની ધાર્મિક વિધિ કરવામાં આવી હોવાનું અહેવાલ છે.
• અને છેલ્લે… બિહારમાં 76 કપ મફત ચા
બિહારના કટિહાર જિલ્લામાં જવાહર ભગત નામના ચા સ્ટોલ સંચાલકે PM મોદીના 76મા જન્મદિવસે 76 કપ ચા મફતમાં પીરસી ઉજવણી કરી હોવાનું આજે પ્રકાશિત થયેલા અહેવાલમાં જણાવાયું છે. ચા પીરસવાની સાથે તેમણે PM મોદીના લાંબા આયુષ્ય અને સારા સ્વાસ્થ્ય માટે પ્રાર્થના પણ કરી હતી.
આ રીતે 76મા જન્મદિવસની ઉજવણીમાં દીવડાં, ગાય, છોડ, ધાર્મિક કાર્યક્રમો, બાઇક યાત્રા અને અંતે 76 કપ ચા જેવી અલગ-અલગ પહેલો જોવા મળી રહી છે.
