આકાશમાંથી સીધું ઇન્ટરનેટ તમારા સુધી પહોંચાડવાનું સપનું હવે અગાઉ કરતાં વધુ નજીક આવ્યું છે. સેટેલાઇટ બ્રોડબેન્ડને સ્પેક્ટ્રમ ફાળવણી અંગે ડિજિટલ કમ્યુનિકેશન્સ કમિશન (DCC)ની મંજૂરી મળતાં ભારતમાં Starlink, Eutelsat OneWeb અને Jio Satellite જેવી કંપનીઓ માટે મોટી અડચણ દૂર થઈ છે. જોકે સામાન્ય મોબાઇલ યુઝર્સે હજુ થોડો સમય રાહ જોવી પડશે.
DCCએ 3 સપ્ટેમ્બર, 2026ની બેઠકમાં TRAIની સેટેલાઇટ સ્પેક્ટ્રમ અંગેની મોટાભાગની ભલામણોને મંજૂરી આપી છે. હવે ડિપાર્ટમેંટ ઓફ ટેલિકોમ (DoT) સ્પેક્ટ્રમની કિંમત અને ફાળવણીની પ્રક્રિયા અંગે કેન્દ્રીય કેબિનેટની અંતિમ મંજૂરી મેળવી શકે છે. ત્યારબાદ સેવા શરૂ કરવા માટે સંબંધિત કંપનીઓને સુરક્ષા એજન્સીઓ પાસેથી બીજી તબક્કાની સિક્યુરિટી ક્લિયરન્સ પણ લેવી પડશે.
હાલના નિર્ણય મુજબ સેટેલાઇટ કંપનીઓ માટે સ્પેક્ટ્રમ યુસેજ ચાર્જ 5 ટકા AGR રાખવાનો માર્ગ અપનાવવામાં આવ્યો છે, જ્યારે નિર્ધારિત ગ્રામ્ય અને રિમોટ વિસ્તારોમાં 4 ટકા અસરકારક દરની જોગવાઈ હોઈ શકે છે. સ્પેક્ટ્રમ પાંચ વર્ષ માટે ફાળવવાની અને વધુ બે વર્ષ સુધી વધારવાની ભલામણ પણ કરવામાં આવી હતી.
Starlinkનું નેટવર્ક તૈયાર હોવાને કારણે જરૂરી મંજૂરીઓ મળ્યા બાદ તે અન્ય સેવાઓની તુલનામાં વહેલું શરૂ થઈ શકે છે. બીજી તરફ Jio સપ્ટેમ્બર 2027માં પોતાના આશરે 1,600 LEO સેટેલાઇટ નેટવર્કનું ટેસ્ટ ફ્લાઇટ કરવાની તૈયારીમાં છે, જ્યારે મોટા પાયે કનેક્ટિવિટી 2028થી શરૂ થવાની શક્યતા છે.
