નવરાત્રિમાં જ્યાં ગરબાના તાલ અને ઉજવણીનો માહોલ હતો, ત્યાં વડોદરાની ભાયલી વિસ્તારમાં 16 વર્ષની સગીરા સાથે થયેલા જઘન્ય ગુનાએ સમગ્ર ગુજરાતને હચમચાવી દીધું હતું. લગભગ બે વર્ષ સુધી ચાલેલી કાનૂની પ્રક્રિયા, પોલીસની વિશાળ તપાસ અને કોર્ટમાં રજૂ થયેલા પુરાવાઓ બાદ હવે આ ચકચારી કેસમાં પાંચેય દોષિતોને આજીવન કેદની સજા ફટકારવામાં આવી છે. વડોદરાની વિશેષ પોક્સો કોર્ટે 31 ઓગસ્ટે સજા સંભળાવી હતી.
આ કેસમાં 4 ઓક્ટોબર 2024ની નવરાત્રિની બીજી રાત્રે સગીરા પોતાના એક મિત્ર સાથે ભાયલી વિસ્તારમાં ગઈ હતી. બંને એકાંત સ્થળે બેઠા હતા ત્યારે પાંચ શખસો બે બાઇક પર ત્યાં પહોંચ્યા હતા. આરોપીઓએ બંનેને ધમકાવી સગીરાના વાહનની ચાવી લઈ લીધી હતી. ત્યારબાદ ઘટનાએ ગંભીર વળાંક લીધો અને સગીરા પર સામૂહિક દુષ્કર્મ કરવામાં આવ્યું હતું. ફરિયાદ બાદ પોલીસ દ્વારા તરત જ તપાસ શરૂ કરવામાં આવી હતી.
પોલીસ માટે સૌથી મોટો પડકાર આરોપીઓને ઓળખવાનો હતો, કારણ કે ઘટનાસ્થળ એકાંત વિસ્તારમાં હતું. તપાસમાં CCTV ફૂટેજ, મોબાઇલ અને ટેકનિકલ ઇનપુટ સહિતના પુરાવાઓનો ઉપયોગ કરવામાં આવ્યો હતો. આરોપીઓ તાંદલજા વિસ્તારમાં રહેતા હોવાનું અને મજૂરી કરતા હોવાનું તપાસમાં સામે આવ્યું હતું. પોલીસે પાંચેયને ઝડપી લીધા બાદ કેસમાં મજબૂત પુરાવા એકત્ર કર્યા હતા.
ટ્રાયલ દરમિયાન પ્રોસિક્યુશને 45 સાક્ષીઓ રજૂ કર્યા હતા અને CCTV તથા મેડિકલ સહિતના વૈજ્ઞાનિક પુરાવા કોર્ટ સમક્ષ મૂક્યા હતા. લગભગ 22 મહિના ચાલેલી સુનાવણી બાદ 20 ઓગસ્ટ 2026ના રોજ પાંચેય આરોપીઓને દોષિત ઠેરવવામાં આવ્યા હતા. ત્યારબાદ સજા અંગેની દલીલો થઈ હતી. સરકાર પક્ષે ગુનાની ગંભીરતા ધ્યાનમાં રાખીને મહત્તમ સજાની માંગ કરી હતી અને મૃત્યુદંડ ન અપાય તો જીવનના અંતિમ સમય સુધી કેદની માગણી પણ કરી હતી.
આખરે 31 ઓગસ્ટે કોર્ટના ચુકાદા સાથે ભાયલી ગેંગરેપ કેસની લાંબી કાનૂની પ્રક્રિયાનો મહત્વપૂર્ણ તબક્કો પૂર્ણ થયો અને પાંચેય દોષિતોને આજીવન કેદની સજા ફટકારવામાં આવી છે.
