યુક્રેનની નૌકાદળે રશિયાના વોરોનેઝ ક્ષેત્રમાં આવેલા બોરીસોગ્લેબ્સ્ક એરફિલ્ડ પર હુમલો કરીને રશિયાના છ Su-34M સૈન્ય વિમાનોને નષ્ટ કરવાનો દાવો કર્યો છે. આ હુમલો રાતભર ચાલ્યો હોવાની માહિતી સામે આવી છે. આ દરમિયાન બંને દેશો વચ્ચે ઊર્જા માળખા અને જહાજોને નિશાન બનાવવાના હુમલા પણ ચાલુ રહ્યા છે.
રોઇટર્સના અહેવાલ અનુસાર, યુક્રેનની નૌકાદળે ટેલિગ્રામ પર જાહેર કરેલા નિવેદનમાં જણાવ્યું કે આ હુમલા માટે નેપ્ચ્યુન કોસ્ટલ મિસાઇલ સિસ્ટમનો ઉપયોગ કરવામાં આવ્યો હતો.
બીજી તરફ, રશિયાના રિયાઝાન ક્ષેત્રના ગવર્નર પાવેલ માલ્કોવે જણાવ્યું કે યુક્રેનના ડ્રોન હુમલાને કારણે રશિયાની એક ઓઇલ રિફાઇનરીમાં આગ લાગી હતી.
હુમલામાં થયેલા નુકસાનનું આકલન શરૂ
ગવર્નર પાવેલ માલ્કોવે જણાવ્યું કે હુમલાને કારણે થયેલા નુકસાનનું આકલન કરવામાં આવી રહ્યું છે અને ઇમરજન્સી સેવાઓની ટીમો ઘટનાસ્થળે કામગીરી કરી રહી છે. તેમણે ટેલિગ્રામ પરની પોસ્ટમાં જણાવ્યું કે નુકસાનની તપાસ ચાલી રહી છે.
આ ઉપરાંત, આ વિસ્તારમાં અન્ય એક સ્થળે આવેલા ગોડાઉનને પણ નુકસાન પહોંચ્યું હોવાની માહિતી તેમણે આપી હતી. જોકે, આ નુકસાન અંગે વધુ વિગતો જાહેર કરવામાં આવી નથી.
રશિયાની અગ્રણી તેલ કંપની રોઝનેફ્ટની માલિકીની રિયાઝાન રિફાઇનરી મોસ્કોને ઇંધણ પૂરું પાડે છે. આ રિફાઇનરી રશિયાની કુલ તેલ શુદ્ધિકરણ ક્ષમતામાં આશરે 5 ટકા હિસ્સો ધરાવે છે. છેલ્લા કેટલાક મહિનામાં આ રિફાઇનરીને અનેક વખત ડ્રોન હુમલાનું નિશાન બનાવવામાં આવી છે.
આ કેવો સીઝફાયર? હુમલાઓ યથાવત્
ગવર્નર માલ્કોવે અગાઉ જણાવ્યું હતું કે મોટા પાયે થયેલા ડ્રોન હુમલાઓને કારણે બે જિલ્લાની શાળાઓ અને કિન્ડરગાર્ટનમાં અભ્યાસકાર્ય રદ કરવામાં આવ્યું હતું.
રવિવારે અમેરિકાના રાષ્ટ્રપતિ ડોનાલ્ડ ટ્રમ્પે જાહેરાત કરી હતી કે રશિયા અને યુક્રેન ઊર્જા ક્ષેત્રમાં સંઘર્ષવિરામ (સીઝફાયર) માટે સંમત થયા છે. જોકે, બંનેમાંથી કોઈ પણ દેશે સત્તાવાર રીતે આ સંઘર્ષવિરામની પુષ્ટિ કરી નથી.
આવી સ્થિતિમાં બંને દેશો વચ્ચે સતત થઈ રહેલા હુમલાઓને કારણે સીઝફાયરના દાવા અંગે સવાલો ઊભા થઈ રહ્યા છે.
