રાજકોટની સિવિલ હોસ્પિટલમાં દર્દીનો જીવ બચાવવા માટેની સારવાર અંગેનો વિવાદ એટલો વણસ્યો કે વાત કથિત મારામારી સુધી પહોંચી ગઈ હતી. ઇમરજન્સી વોર્ડમાં ફરજ બજાવતી 26 વર્ષીય મહિલા રેસિડેન્ટ ડૉક્ટરે સિનિયર તબીબ પર ગાળો આપવા, થપ્પડ મારવા અને ધમકી આપવાનો આરોપ લગાવતા હોસ્પિટલમાં ખળભળાટ મચી ગયો હતો. ઘટનાના પગલે જુનિયર ડૉક્ટરો વિરોધમાં હડતાળ પર ઉતર્યા હતા.
ફરિયાદ મુજબ, 20 ઓગસ્ટની સાંજે આશરે 7:30થી 7:45 દરમિયાન એક વૃદ્ધ મહિલા દર્દીને ગંભીર હાલતમાં સિવિલ હોસ્પિટલ લાવવામાં આવી હતી. દર્દીને વેન્ટિલેટર સપોર્ટની જરૂર હોવાનું જણાવતાં રેસિડેન્ટ ડૉક્ટર કૃષા સિંગાલાએ ઇમરજન્સી વોર્ડમાં દાખલ કરવાની રજૂઆત કરી હતી. આરોપ છે કે સિનિયર મેડિકલ ઓફિસર ડૉ. અશ્વિન રામાણીએ દર્દીને જનરલ વોર્ડમાં ખસેડવાનું કહ્યું હતું. આ મુદ્દે ફરી ચર્ચા થતાં બંને વચ્ચે બોલાચાલી થઈ અને રામાણીએ કથિત રીતે ગાળો આપી થપ્પડ મારી હતી. ઘટના સીસીટીવીમાં કેદ થયાનું પણ ફરિયાદમાં જણાવાયું છે.
પ્રદ્યુમ્નનગર પોલીસે ડૉ. રામાણી સામે BNSની કલમ 115(2), 352 અને 351(2) હેઠળ ગુનો નોંધ્યો છે. પોલીસે આ કેસને નોન-કોગ્નિઝેબલ ગણાવી ડૉ. રામાણીને મેજિસ્ટ્રેટ સમક્ષ જામીન મળ્યા હોવાનું અહેવાલો માં જાણવા મળી રહ્યું છે.
ઘટના બાદ જુનિયર ડૉક્ટરો હડતાળ પર ઉતર્યા હતા. હોસ્પિટલ પ્રશાસને બેઠક યોજી કાર્યવાહીનો વિશ્વાસ આપ્યો હતો. બાદમાં આરોગ્ય વિભાગે ડૉ. રામાણીની બદલીનો આદેશ કર્યો હોવાનું અહેવાલોમાં જણાવાયું છે.
