માત્ર ₹175 પાછા મેળવવા માટે કરેલું Google સર્ચ રાજકોટની 63 વર્ષીય નિવૃત્ત મહિલા માટે ₹1.91 લાખના સાયબર ફ્રોડમાં ફેરવાઈ ગયું હતું. Zeptoના કસ્ટમર કેર તરીકે ઓળખાવી ઠગએ રિફંડ અપાવવાના બહાને મહિલાને અનેક UPI ટ્રાન્ઝેક્શન કરાવ્યાં અને તેમના બેંક ખાતામાંથી મોટી રકમ ટ્રાન્સફર કરાવી લીધી હતી.
પોલીસ ફરિયાદ મુજબ, મહિલાએ 12 જૂન, 2026ના રોજ Zepto પરથી પાંચ થેલી દૂધ મંગાવ્યું હતું. દૂધ બગડેલું હોવાથી તેમણે ₹175ના રિફંડ માટે Google પર કસ્ટમર કેર નંબર શોધ્યો તેમાં સર્ચ દરમિયાન મળેલા મોબાઈલ નંબર પર સંપર્ક કરતાં સામેથી વાત કરનાર વ્યક્તિએ પોતાનું નામ ઇસ્માઇલ અન્સારી જણાવી Zepto કર્મચારી હોવાનો દાવો કર્યો હતો.
આરોપીએ WhatsApp મારફતે રિફંડની પ્રક્રિયા સમજાવી મહિલાને અલગ-અલગ UPI ટ્રાન્ઝેક્શન કરાવ્યાં હતા. પરિણામે બેંક ઓફ બરોડાના ખાતામાંથી ₹97,072 અને ICICI બેંકના ખાતામાંથી ₹94,262, એટલે કે કુલ ₹1,91,334 ટ્રાન્સફર થઈ ગયા હતા.
છેતરપિંડીની જાણ થતાં મહિલાએ 1930 સાયબર હેલ્પલાઇન પર ફરિયાદ કરી હતી. રાજકોટ સાયબર ક્રાઈમ પોલીસે BNS અને IT Actની સંબંધિત કલમો હેઠળ ગુનો નોંધી તપાસ શરૂ કરી છે.
કસ્ટમર કેર નંબર માટે Google પર મળેલા અજાણ્યા નંબર પર વિશ્વાસ ન કરો. રિફંડ માટે UPI PIN, OTP કે અજાણી વ્યક્તિના કહેવા મુજબ ટ્રાન્ઝેક્શન ન કરો.
