ગુજરાતની અદાલતોમાં છેલ્લા કેટલાક દિવસોથી અનોખી સ્થિતિ સર્જાઈ છે. હાઇકોર્ટ દ્વારા કોર્ટમાં દાખલ થતી અરજીઓ માટે A4 સાઇઝના પેપર અને નિર્ધારિત ફૉન્ટ-ફોર્મેટ ફરજિયાત બનાવવાના નવા નિયમો અમલમાં આવ્યા બાદ રાજ્યભરના વકીલોમાં ભારે અસંતોષ ફેલાયો છે. પરિણામે અનેક જિલ્લા અદાલતોમાં વકીલો હડતાળ પર ઊતરી ગયા છે, જેના કારણે સામાન્ય નાગરિકો અને કેસના પક્ષકારોને ભારે હાલાકીનો સામનો કરવો પડી રહ્યો છે.
હાઇકોર્ટના એપ્રિલ 2026ના પરિપત્ર મુજબ 1 ઓગસ્ટથી તમામ અરજીઓ, શપથપત્રો અને અન્ય દસ્તાવેજો કમ્પ્યુટર પર ટાઇપ કરેલા અને નિર્ધારિત ફૉન્ટ તથા ફૉન્ટ સાઇઝમાં જ સ્વીકારવાના નિયમો અમલમાં આવ્યા છે. ગુજરાતી માટે Lohit Gujarati, Noto Sans Gujarati અથવા Noto Serif Gujarati ફૉન્ટ તથા અંગ્રેજી માટે Times New Romanનો ઉપયોગ ફરજિયાત રાખવામાં આવ્યો છે. સાથે જ 75 GSMના A4 પેપર અને ચોક્કસ માર્જિનનું પણ પાલન કરવાનું રહેશે.
વકીલ સંગઠનોનું કહેવું છે કે તેઓ ડિજિટાઇઝેશનના વિરોધમાં નથી, પરંતુ રાજ્યના ગ્રામ્ય અને આદિવાસી વિસ્તારોમાં હજુ પૂરતી ટેક્નિકલ સુવિધાઓ ઉપલબ્ધ નથી. ઘણા વકીલો હજુ ટાઇપિસ્ટ પર નિર્ભર છે અને તાત્કાલિક અરજીઓમાં હસ્તલિખિત દસ્તાવેજોની જરૂરિયાત રહેતી હોવાથી નવા નિયમો વ્યવહારિક મુશ્કેલીઓ ઊભી કરે છે.
સુરતમાં પણ આ મુદ્દે વકીલોએ બે દિવસની હડતાળ શરૂ કરી છે. મોટી સંખ્યામાં વકીલો જિલ્લા કોર્ટના મુખ્ય પ્રવેશદ્વાર પર ભેગા થયા છે, જેના કારણે કોર્ટની કામગીરી પર સીધી અસર પડી છે. જામીન અરજી, સોગંદનામા અને અન્ય મહત્વપૂર્ણ કેસોની સુનાવણી માટે આવેલા અરજદારોને મુશ્કેલીનો સામનો કરવો પડ્યો છે. પરિસ્થિતિને ધ્યાનમાં રાખીને પોલીસ પણ કોર્ટ પરિસરમાં તૈનાત કરવામાં આવી છે.
બીજી તરફ, ગુજરાત બાર કાઉન્સિલે મુખ્ય ન્યાયમૂર્તિને રજૂઆત કરીને નવા નિયમોના અમલને હાલ માટે સ્થગિત રાખવા, રાજ્યભરમાં જરૂરી ડિજિટલ માળખું ઉપલબ્ધ થાય ત્યાં સુધી છ મહિનાનો સંક્રમણ સમય આપવા તેમજ ટ્રાયલ કોર્ટોમાં હાલના ફૉન્ટ, લીગલ સાઇઝ પેપર અને તાત્કાલિક કેસોમાં હસ્તલિખિત અરજીઓને મંજૂરી આપવાની માંગ કરી છે. હવે હાઇકોર્ટ આ રજૂઆત પર શું નિર્ણય લે છે તેના પર રાજ્યભરના વકીલો અને ન્યાયિક કામગીરીની નજર ટકેલી છે.
