નવી દિલ્હી: મેટાના CEO માર્ક ઝકરબર્ગે ભારત સરકાર સમક્ષ બાળ યૌન શોષણ સંબંધિત સામગ્રી (CSAM), ડીપફેક કન્ટેન્ટ અને પ્લેટફોર્મના સંચાલનમાં થયેલી ખામીઓ બદલ માફી માંગી હોવાનું ન્યૂઝ એજન્સી PTIએ સૂત્રોના હવાલાથી જણાવ્યું છે. આ મામલો છેલ્લા કેટલાક દિવસોથી કેન્દ્ર સરકાર અને મેટા વચ્ચે ચર્ચાનો વિષય બન્યો છે.
સૂત્રોના જણાવ્યા અનુસાર, કેન્દ્ર સરકારે સોશિયલ મીડિયા પ્લેટફોર્મ પર બાળ સુરક્ષા, ડીપફેક જેવી ભ્રામક સામગ્રી અને કન્ટેન્ટ મોડરેશનમાં થયેલી બેદરકારી અંગે ગંભીર ચિંતા વ્યક્ત કરી હતી. ત્યારબાદ મેટા તરફથી સરકાર સમક્ષ ખેદ વ્યક્ત કરવામાં આવ્યો હોવાનું જાણવા મળ્યું છે.
આ પહેલા સંસદીય સમિતિએ મેટાને ત્રણ દિવસની અંદર બિનશરતી માફી માંગવા જણાવ્યું હતું. સમિતિએ ચેતવણી પણ આપી હતી કે જો નિર્ધારિત સમયમર્યાદામાં યોગ્ય જવાબ નહીં આપવામાં આવે તો ભારતમાં કંપનીને મળતી કેટલીક કાનૂની સુરક્ષા અને નિયમનકારી છૂટછાટો અંગે સરકાર પુનર્વિચાર કરી શકે છે.
આ સમગ્ર મામલે કેન્દ્રીય માહિતી પ્રૌદ્યોગિકી (IT) મંત્રાલય અને મેટાના અધિકારીઓ વચ્ચે દિલ્હીમાં બે દિવસીય ઉચ્ચસ્તરીય બેઠક યોજાઈ રહી છે. સરકારના નિર્દેશ બાદ મેટાની વૈશ્વિક ટીમને પણ ચર્ચા માટે દિલ્હી બોલાવવામાં આવી છે. 5 ઓગસ્ટે બેઠકનો પ્રથમ તબક્કો યોજાયો હતો, જ્યારે બીજા દિવસે પણ વિવિધ મુદ્દાઓ પર વિસ્તૃત ચર્ચા થવાની છે.
સરકારની નારાજગીનું એક મુખ્ય કારણ વડાપ્રધાન નરેન્દ્ર મોદીનો ફેસબુક પરથી હટાવવામાં આવેલ વીડિયો પણ હતો. વડાપ્રધાને 23 જુલાઈએ પોતાના સત્તાવાર ફેસબુક પેજ પર આ વીડિયો શેર કર્યો હતો. તેમાં તેમણે દેશભરમાં વધી રહેલી પેપર લીકની ઘટનાઓને ગંભીર સમસ્યા ગણાવી હતી અને આવા ગુનાઓમાં ઝડપથી ન્યાય મળી રહે તે માટે ફાસ્ટ ટ્રેક કોર્ટની વ્યવસ્થા કરવાની જરૂરિયાત પર ભાર મૂક્યો હતો. વીડિયો હટાવાયા બાદ સરકારે મેટા પાસેથી સ્પષ્ટીકરણ માંગ્યું હતું અને કન્ટેન્ટ મોડરેશનની પ્રક્રિયા અંગે પણ સવાલો ઉઠાવ્યા હતા.
સરકાર અને મેટા વચ્ચે ચાલી રહેલી બેઠકમાં બાળ સુરક્ષા, ડીપફેક કન્ટેન્ટ પર નિયંત્રણ, પ્લેટફોર્મની જવાબદારી, કન્ટેન્ટ મોડરેશનની નીતિ તેમજ ભારતીય કાયદાના પાલન જેવા મુદ્દાઓ પર ખાસ ભાર મૂકવામાં આવી રહ્યો છે. બેઠક બાદ આ મુદ્દે સરકાર અથવા મેટા તરફથી વધુ સત્તાવાર માહિતી જાહેર થવાની શક્યતા છે.
