36 દિવસના આંદોલન, પોલીસ સાથેના ઘર્ષણ અને શિક્ષણ મંત્રી ધર્મેન્દ્ર પ્રધાનના રાજીનામા બાદ ‘Cockroach Janta Party’ (CJP)ના નેતાઓની કથિત ઉજવણી હવે નવી ચર્ચાનો વિષય બની છે. સોશિયલ મીડિયા પર વાયરલ થયેલા વીડિયોમાં CJPના પ્રવક્તા સૌરવ દાસ અને આશુતોષ રંકા સહિત કેટલાક નેતાઓ દિલ્હીની એક હોટેલમાં સંગીત પર ડાન્સ કરતા જોવા મળે છે. કેટલાક અહેવાલોમાં આ સ્થળને ફાઇવ-સ્ટાર હોટેલ ગણાવવામાં આવ્યું છે.
વીડિયો સામે આવ્યા બાદ ભાજપના રાજ્યસભા સાંસદ અને સુપ્રીમ કોર્ટના વરિષ્ઠ વકીલ મહેશ જેટમલાણીએ CJPના નેતાઓ પર સવાલો ઉઠાવ્યા છે. તેમણે પૂછ્યું કે આંદોલન દરમિયાન કાર્યકરોના પ્રવાસ, ભોજન, રહેવા, સાધનો અને અન્ય વ્યવસ્થાઓ માટે નાણાં કોણે આપ્યાં?
CJPએ NEET-UG પેપર લીક અને શિક્ષણ ક્ષેત્રની અનિયમિતતાઓને લઈને દિલ્હીના જંતર-મંતર ખાતે લાંબો વિરોધ કર્યો હતો. આંદોલનનું મુખ્ય માગણું કેન્દ્રીય શિક્ષણ મંત્રી ધર્મેન્દ્ર પ્રધાનનું રાજીનામું હતું, જે બાદ તેમણે પદ છોડ્યું. ત્યારબાદ CJPએ સરકાર સાથેની ચર્ચા બાદ આંદોલન સમાપ્ત કરવાની જાહેરાત કરી હતી.
હવે વાયરલ ‘રિઝાઇનેશન પાર્ટી’ના વીડિયોએ આંદોલનના નેતાઓની ઉજવણી અને તેના ખર્ચને લઈને સોશિયલ મીડિયા પર નવી ચર્ચા જગાવી છે. જોકે, વીડિયોની સંપૂર્ણ પૃષ્ઠભૂમિ અને પાર્ટીના ખર્ચ અંગેના સવાલો પર CJP તરફથી સ્પષ્ટ જવાબની રાહ જોવાઈ રહી છે.
