ઉત્તર પ્રદેશના કૌશાંબી જિલ્લાના તિમાલપુર ગામમાં એક દુર્લભ અને કરુણ ઘટના સામે આવી છે. યશોદા દેવીએ એક ખાનગી હોસ્પિટલમાં શરીરથી જોડાયેલા ટ્વિન બાળકોને જન્મ આપ્યો હતો. બાળકોની સ્થિતિ જોઈને ડૉક્ટરો પણ આશ્ચર્યચકિત થઈ ગયા હતા.
જન્મેલા બંને બાળકોના માથા અને હાથ અલગ હતા, પરંતુ તેઓ પેટના ભાગેથી એકબીજા સાથે જોડાયેલા હતા. તેમના આંતરિક અવયવો કેટલા અલગ અને કેટલા એકસાથે જોડાયેલા હતા તે શરૂઆતમાં સ્પષ્ટ થઈ શક્યું નહોતું. આ અનોખા બાળકોને જોવા માટે હોસ્પિટલમાં લોકોની ભારે ભીડ ઉમટી પડી હતી.
ખાસ વાત એ હતી કે યશોદા દેવીએ સામાન્ય પ્રસૂતિ દ્વારા આ બાળકોને જન્મ આપ્યો હતો. જોકે જન્મ બાદ બંને બાળકોની તબિયત અત્યંત નાજુક હતી. તેઓ સ્વતંત્ર રીતે દૂધ પી શકતા નહોતા અને તેમને ઇન્ટેન્સિવ કેર યુનિટમાં રાખીને કૃત્રિમ શ્વાસોચ્છ્વાસ સહિતની સારવાર આપવામાં આવી હતી.
તમામ પ્રયાસો છતાં જન્મના થોડા કલાકોમાં એક બાળકનું મૃત્યુ થયું હતું. ત્યારબાદ બીજા બાળકને બચાવવું પણ અત્યંત મુશ્કેલ બની ગયું હતું. નિષ્ણાતોના મતે બીજા બાળકને બચાવવા માટે તાત્કાલિક સર્જરી કરીને શરીરને અલગ કરવું જરૂરી હતું, પરંતુ તે ખૂબ જ જટિલ અને જોખમી પ્રક્રિયા હતી.
આ માટે બાળકને વધુ સારવાર માટે પ્રયાગરાજની એક મોટી હોસ્પિટલમાં ખસેડવામાં આવ્યો હતો. જોકે નિષ્ણાતો કોઈ નિર્ણય લઈ શકે તે પહેલાં જ બીજા બાળકનું પણ મૃત્યુ થઈ ગયું હતું. આ દુર્લભ ઘટનાએ પરિવાર સાથે તબીબી જગતને પણ શોકમાં મૂકી દીધું છે.
