સુરત મહાનગરપાલિકા દ્વારા પ્રિ-મોન્સૂન કામગીરીના મોટા દાવાઓ કરવામાં આવી રહ્યા છે, પરંતુ ડીંડોલી વિસ્તારમાં બનેલી એક ઘટનાએ આ દાવાઓ પર ગંભીર પ્રશ્નચિહ્ન ઊભું કર્યું છે. શહેરના ન્યુ ડીંડોલી વિસ્તાર તરફ જતો કરોડો રૂપિયાના ખર્ચે તાજેતરમાં તૈયાર કરાયેલો રોડ ચોમાસાની શરૂઆત પહેલાં જ ધસી પડતા સ્થાનિકોમાં ભારે રોષ ફેલાયો છે.
માહિતી અનુસાર, ડીંડોલી વિસ્તારના મુખ્ય માર્ગ પર વહેલી સવારે એક ભારે માલસામાન ભરેલું ડમ્પર પસાર થઈ રહ્યું હતું. તે દરમિયાન અચાનક રોડનો મોટો ભાગ બેસી ગયો અને ડમ્પરનો પાછળનો ભાગ જમીનમાં ફસાઈ ગયો. ઘટનાના કારણે આસપાસના વિસ્તારમાં અફરાતફરીનો માહોલ સર્જાયો હતો.
ઘટનાની જાણ થતાં જ મનપા તંત્ર અને સંબંધિત વિભાગોના અધિકારીઓ સ્થળ પર દોડી આવ્યા હતા. હાલ JCB મશીનની મદદથી ડમ્પરને બહાર કાઢવાની કામગીરી હાથ ધરવામાં આવી છે અને સમગ્ર વિસ્તારને સુરક્ષિત બનાવવાના પ્રયાસો ચાલી રહ્યા છે.
સ્થાનિક લોકોમાં આ ઘટનાને પગલે ભારે રોષ જોવા મળી રહ્યો છે. હજુ માંડ થોડા દિવસો પહેલાં જ બનેલો ચકચકિત રોડ સામાન્ય દિવસોમાં જ બેસી જાય, તો ભારે વરસાદમાં આ રસ્તાની શું હાલત થશે તે વિચારવું જ રહ્યું. આ ઘટનાએ સુરત મનપાના પ્રિ-મોન્સૂન એક્શન પ્લાન અને રોડ કોન્ટ્રાક્ટરની કામગીરીની ગુણવત્તા પર મોટા સવાલો ઉભા કર્યા છે. લોકો પૂછી રહ્યા છે કે જનતાના ટેક્સના પૈસાનો આવો વેડફાટ કેમ?
આ અકસ્માતમાં સદનસીબે કોઈ જાનહાનિ થઈ નથી. પરંતુ આ એક મોટી દુર્ઘટનાની ચેતવણી છે. વહીવટી તંત્ર દ્વારા આ મામલે ઉચ્ચ સ્તરીય તપાસ કરવામાં આવે અને જવાબદાર કોન્ટ્રાક્ટર તેમજ અધિકારીઓ સામે કડક પગલાં લેવામાં આવે તેવી લોક માંગ ઉઠી રહી છે. જો વરસાદ પહેલા જ આવી સ્થિતિ હોય, તો આગામી ચોમાસામાં સુરતવાસીઓની સુરક્ષાનું શું?
