કહેવાય છે કે જેમના સપનાઓમાં જાન હોય છે, તેમના જ પાંખોમાં ઉડાન હોય છે. થાઇલેન્ડના બેંગકોક ખાતે યોજાયેલી પ્રતિષ્ઠિત ‘મિસ્ટર એન્ડ મિસ યુનિવર્સ 2026’ના ગ્લોબલ સ્ટેજ પર આવો જ એક રોમાંચક અને રૂંવાડા ઉભા કરી દે તેવો ઈતિહાસ રચાયો છે. ‘માય ફિટનેસ એકેડેમી’ના સીઈઓ અને આંતરરાષ્ટ્રીય કોચ રવિ રાંદેરીએ ૨૫થી વધુ શક્તિશાળી દેશોના દિગ્ગજ બોડીબિલ્ડર્સની હાજરીમાં ભારત દેશનો ડંકો વગાડ્યો છે. 12, 13 અને 14 જૂન દરમિયાન બેંગકોકની ‘અવાના બેંગકોક હોટેલ’ ખાતે રમાયેલી આ હાઈ-વોલ્ટેજ સ્પર્ધામાં અમેરિકા, જર્મની, ઈટાલી અને કેનેડા જેવા મજબૂત પ્રતિસ્પર્ધીઓ સામે કાંટાની ટક્કર હતી. પરંતુ, ભારતપુત્ર રવિ રાંદેરી સામે કોઈ ટકી શક્યું નહીં. તેમણે પોતાની કલ્પનાતીત ફિટનેસનું પ્રદર્શન કરતા ‘ઓપન સિનિયર બોડીબિલ્ડિંગ’માં ચમકતો ગોલ્ડ મેડલ પોતાના નામે કરી લીધો, જ્યારે ‘માસ્ટર બોડીબિલ્ડિંગ ઓવરઓલ’ અને ‘માસ્ટર મેન્સ ફિઝિક ઓવરઓલ’ જેવી ટફ કેટેગરીઝમાં વિશ્વના રનર્સ-અપ બનીને ૨ શાનદાર સિલ્વર મેડલ્સ ભારતની ઝોળીમાં નાખી દીધા.
વર્લ્ડ બોડી બિલ્ડિંગ ફેડરેશન (WBBF) અને ઇન્ડિયન બોડી બિલ્ડિંગ ફેડરેશન (IBBF) સહિત વિશ્વના ૬ જાયન્ટ ફેડરેશન્સના સહયોગથી આયોજિત આ મેગા ઇવેન્ટમાં ફિટનેસ, ફેશન અને અદભુત યુનિટીનો નજારો જોવા મળ્યો હતો. પરંતુ, આ ચમકતા મેડલ્સ પાછળની કહાની લોહી અને પરસેવાથી લખાયેલી છે. સ્ટેજ પર પગ મૂકતા પહેલાં રવિ રાંદેરીએ એક જ વાત કહી હતી: “યા તો જીતુંગા, યા ફિર મરતે દમ તક લડુંગા.” અને તેઓ ખરેખર લડ્યા! આ સફર બિલકુલ આસાન નહોતી. કેમેરાની પાછળ અસહ્ય શારીરિક પીડા હતી, રાતોની ઊંઘ ગાયબ હતી, કડક ડાયટ અને કિલર વર્કઆઉટના કારણે શરીર ઘણીવાર સાથ છોડી દેતું અને તેઓ બેભાન પણ થઈ જતા. છતાં, હાર ન માનવાની તેમની જીદ આખરે 1 ગોલ્ડ અને 2 સિલ્વર મેડલ બનીને થાઇલેન્ડના આકાશમાં ચમકી ઉઠી.
મેડલ જીત્યા બાદ એક વિશેષ નિવેદનમાં રવિ રાંદેરીએ પોતાની લાગણીઓ ઠાલવતા કહ્યું કે, “જ્યારે હું તિરંગો ઓઢીને સ્ટેજ પર ઉભો હતો, ત્યારે મારી આંખોમાં ખુશીના આંસુ હતા અને છાતી ગર્વથી ફૂલી ગઈ હતી. આ મેડલ્સ માત્ર ધાતુના ટુકડા નથી, પણ લોહી-પરસેવો એક કરીને જોયેલા સપનાનું પરિણામ છે. હું આ જીત મારા દેશને અને એ દરેક ભારતીયને સમર્પિત કરું છું જેમણે મારી ક્ષમતા પર વિશ્વાસ રાખ્યો. આ તો બસ વૈશ્વિક મંચ પર ભારતના દબદબાની શરૂઆત છે.”
2,00,000 થાઈ બાહ્ટની માતબર ઈનામી રકમ અને અપ્રતિમ સન્માન સાથે ભારત પરત ફરી રહેલા રવિ રાંદેરીએ સાબિત કરી દીધું કે ભારતીય લોહી ગમે તેવા વૈશ્વિક પડકારોને ધૂળ ચટાડી શકે છે. સમગ્ર દેશ આજે આ સુવર્ણ સફળતા પર ગર્વથી ઝૂમી રહ્યો છે, પણ સિંહ ક્યાંય અટકતો નથી… કારણ કે ખુદ રવિ રાંદેરીના શબ્દોમાં કહીએ તો: “સફર હજી પૂરો નથી થયો, આ તો બસ શરૂઆત છે!”