અમદાવાદ અને ગાંધીનગરમાં 10 જૂનથી 30 સપ્ટેમ્બર દરમિયાન વિવિધ સ્થળોએ બોમ્બ બ્લાસ્ટ કરવાની ગંભીર ધમકીભર્યા ઈ-મેલ મળતાં સુરક્ષા એજન્સીઓ સતર્ક બની ગઈ છે. અલગ-અલગ ઈ-મેલ આઈડી પરથી મોકલાયેલા સંદેશાઓમાં CM ઓફિસ, અમદાવાદ મ્યુનિસિપલ કોર્પોરેશન (AMC)ની મુખ્ય કચેરી અને RSS કચેરીને નિશાન બનાવવાની ધમકી આપવામાં આવી છે.
ધમકીભર્યા ઈ-મેલમાં CM ઓફિસને બપોરે 1:11 વાગ્યે, AMC ઓફિસને બપોરે 3:11 વાગ્યે અને RSS કચેરીને સાંજે 5:11 વાગ્યે બોમ્બથી ઉડાવી દેવાનો ઉલ્લેખ કરવામાં આવ્યો છે. નોંધનીય છે કે મુખ્યમંત્રી ભૂપેન્દ્ર પટેલ હાલમાં વડાપ્રધાન નરેન્દ્ર મોદી સાથે બેઠક માટે દિલ્હીમાં છે, ત્યારે આ ધમકી મળતાં સુરક્ષા તંત્ર વધુ સતર્ક બન્યું છે.
ધમકી મળતા જ અમદાવાદ મ્યુનિસિપલ કોર્પોરેશનની દાણાપીઠ સ્થિત મુખ્ય કચેરી તાત્કાલિક ખાલી કરાવવામાં આવી હતી. મેયર, ડેપ્યુટી મેયર, સ્ટેન્ડિંગ કમિટીના ચેરમેન, શાસક પક્ષના નેતા, દંડક સહિત તમામ અધિકારીઓ અને કર્મચારીઓને બિલ્ડિંગની બહાર કાઢવામાં આવ્યા હતા.
ફાયર બ્રિગેડ, પોલીસ અને બોમ્બ ડિસ્પોઝલ સ્ક્વોડની ટીમો સ્થળ પર પહોંચી તપાસ શરૂ કરી છે. સાથે જ સાયબર ક્રાઈમ સેલ દ્વારા ધમકીભર્યા ઈ-મેલના સોર્સ અને મોકલનારની ઓળખ માટે સઘન તપાસ હાથ ધરવામાં આવી છે.
આ હાઈ-એલર્ટની સ્થિતિને ધ્યાનમાં રાખીને અમદાવાદ અને ગાંધીનગરના તમામ સંવેદનશીલ સ્થળોએ સુરક્ષા વ્યવસ્થા વધુ કડક બનાવવામાં આવી છે. પોલીસ દ્વારા સમગ્ર મામલે સતત નજર રાખવામાં આવી રહી છે.
