ગુજરાતમાં છેલ્લા કેટલાક દિવસોથી બફારા અને કાળઝાળ ગરમીનો પ્રકોપ યથાવત જોવા મળી રહ્યો છે. જોકે, કેટલાક જિલ્લાઓમાં છૂટાછવાયા વરસાદને કારણે લોકોને ગરમીથી આંશિક રાહત મળી રહી છે. બીજી તરફ રાજ્યભરના ખેડૂતો અને નાગરિકો હવે ચોમાસાના આગમનની આતુરતાપૂર્વક રાહ જોઈ રહ્યા છે.
ભારતમાં 4 જૂનથી દક્ષિણપશ્ચિમ ચોમાસાની સત્તાવાર શરૂઆત થઈ ચૂકી છે. ચોમાસું ગુજરાતના પાડોશી રાજ્ય મહારાષ્ટ્ર સુધી પહોંચી ગયું હોવાથી હવે રાજ્યમાં પણ તેના આગમનને લઈને આશા વધી છે. ખાસ કરીને ખેડૂતો વાવણીની તૈયારી સાથે મેઘરાજાની રાહ જોઈ રહ્યા છે.
હવામાન વિભાગના તાજેતરના બુલેટિન મુજબ 8, 9 અને 10 જૂન દરમિયાન દક્ષિણ ગુજરાતના ડાંગ, તાપી, નવસારી અને વલસાડ જિલ્લામાં છૂટાછવાયા સ્થળોએ ગાજવીજ સાથે હળવાથી મધ્યમ વરસાદ પડવાની શક્યતા છે. જ્યારે રાજ્યના અન્ય વિસ્તારોમાં મુખ્યત્વે શુષ્ક હવામાન રહેવાની આગાહી કરવામાં આવી છે.
- 8 જૂનના રોજ ડાંગ, તાપી, નવસારી અને વલસાડ ખાતે છૂટાંછવાયાં સ્થળોએ ગાજવીજ સાથે હળવાથી મધ્યમ વરસાદ પડવાની સંભાવના છે. આ ઉપરાંત રાજ્યના અન્ય જિલ્લામાં શુષ્ક હવામાન રહેવાની શક્યતા છે.
- 9 જૂનના રોજ પણ ડાંગ, તાપી, નવસારી અને વલસાડ ખાતે છૂટાંછવાયાં સ્થળોએ ગાજવીજ સાથે હળવાથી મધ્યમ વરસાદ પડવાની સંભાવના છે. આ ઉપરાંત રાજ્યના અન્ય જિલ્લામાં શુષ્ક હવામાન રહેવાની શક્યતા છે.
- 10 જૂનના રોજ પણ ડાંગ, તાપી, નવસારી અને વલસાડ ખાતે છૂટાંછવાયાં સ્થળોએ ગાજવીજ સાથે હળવાથી મધ્યમ વરસાદ પડવાની સંભાવના છે. આ ઉપરાંત રાજ્યના અન્ય જિલ્લામાં શુષ્ક હવામાન રહેવાની શક્યતા છે.
હવામાન નિષ્ણાતોના જણાવ્યા અનુસાર દક્ષિણપશ્ચિમ ચોમાસું આગામી બે-ત્રણ દિવસમાં મધ્ય અરબી સમુદ્ર, મહારાષ્ટ્ર, કર્ણાટક, આંધ્ર પ્રદેશ તેમજ ઉત્તરપૂર્વ ભારતના વધુ વિસ્તારોમાં આગળ વધશે. ત્યારબાદના ચારથી પાંચ દિવસ દરમિયાન તેલંગાણા, છત્તીસગઢ, ઓડિશા, પશ્ચિમ બંગાળ અને સિક્કિમ સહિતના વિસ્તારોમાં પણ ચોમાસાની પ્રગતિ માટે અનુકૂળ પરિસ્થિતિ સર્જાઈ રહી છે.
હાલ અરબી સમુદ્રમાં ચોમાસું સક્રિય છે અને ગોવાના તમામ વિસ્તારોને કવર કરી ચૂક્યું છે. તેમજ બંગાળની ખાડી તરફની બ્રાન્ચ પણ ઉત્તરપૂર્વના રાજ્યો સુધી પહોંચી ગઈ છે. જોકે, આંતરરાષ્ટ્રીય હવામાન મોડેલો અનુસાર ગુજરાતમાં 17-18 જૂન પહેલાં વ્યાપક વરસાદની શક્યતા ઓછી છે.
હવામાન વિભાગના મોડેલો સૂચવે છે કે 12થી 14 જૂન દરમિયાન ગુજરાતની આસપાસ એક હવામાનીય સિસ્ટમ સક્રિય થઈ શકે છે. આ સિસ્ટમના પ્રભાવથી 18થી 19 જૂન દરમિયાન રાજ્યના મોટાભાગના વિસ્તારોમાં વરસાદની ગતિવિધિ તેજ બનવાની સંભાવના છે. કેટલાક વિસ્તારોમાં ભારેથી અતિભારે વરસાદ પણ પડી શકે છે અને આ સમયગાળા દરમિયાન ગુજરાતમાં ચોમાસાનું સત્તાવાર આગમન થઈ શકે છે.
રાજ્યના ખેડૂતો માટે આ આગાહી મહત્વપૂર્ણ માનવામાં આવી રહી છે, કારણ કે વરસાદની શરૂઆત સાથે જ ખરીફ પાકની વાવણીને વેગ મળશે અને ગરમીથી પણ રાહત મળશે.
