ગુજરાત સરકારના ગૃહ વિભાગે રાજ્યના પોલીસ તંત્રમાં મહત્વપૂર્ણ વહીવટી ફેરફાર જાહેર કર્યો છે. અમદાવાદ શહેરના પોલીસ કમિશનર અને 1993 બેચના વરિષ્ઠ IPS અધિકારી જ્ઞાનેન્દ્રસિંહ મલિક (જી. એસ. મલિક)ને ગુજરાતના નવા ડાયરેક્ટર જનરલ ઓફ પોલીસ (DGP) અને ઇન્સ્પેક્ટર જનરલ ઓફ પોલીસ (IGP) તરીકે નિયુક્ત કરવામાં આવ્યા છે. આ સાથે રાજ્યના સર્વોચ્ચ પોલીસ પદને લઈને ચાલી રહેલી અટકળોનો અંત આવ્યો છે.
ગૃહ વિભાગના અધિક મુખ્ય સચિવ ડૉ. અંજુ શર્માના હસ્તાક્ષર સાથે 6 જૂન, 2026ના રોજ સત્તાવાર જાહેરનામું બહાર પાડવામાં આવ્યું હતું. જાહેરનામા મુજબ જી. એસ. મલિકની નિમણૂક તાત્કાલિક અસરથી અમલમાં આવી છે.
જી. એસ. મલિક 1993 બેચના અનુભવી IPS અધિકારી છે અને અત્યાર સુધી અમદાવાદ શહેરના પોલીસ કમિશનર તરીકે ફરજ બજાવી રહ્યા હતા. હવે તેઓ ગુજરાત પોલીસના સર્વોચ્ચ પદની જવાબદારી સંભાળશે. તેમની નિમણૂક પે-મેટ્રિક્સના એપેક્સ સ્કેલ લેવલ-17 હેઠળ રૂ. 2.25 લાખના નિશ્ચિત પગાર ધોરણ સાથે કરવામાં આવી છે.
મહત્વનું છે કે 1 જાન્યુઆરીથી કે. એલ. એન. રાવ ઇન્ચાર્જ ડીજીપી તરીકે ફરજ બજાવી રહ્યા હતા. લગભગ પાંચ મહિના સુધી આ જવાબદારી સંભાળ્યા બાદ હવે રાજ્યને કાયમી ડીજીપી મળ્યા છે. કે. એલ. એન. રાવ CID ક્રાઇમ અને જેલ વિભાગના ડીજી તરીકે યથાવત રહેશે.
જી. એસ. મલિકની નવી નિમણૂક બાદ અમદાવાદ શહેરને પણ ટૂંક સમયમાં નવા પોલીસ કમિશનર મળશે. રાજ્યપાલના આદેશથી જારી કરાયેલા આ નિર્ણયની નકલ મુખ્યમંત્રી કચેરી, કેન્દ્રીય ગૃહ મંત્રાલય, UPSC અને સંબંધિત વિભાગોને મોકલી આપવામાં આવી છે.
રાજ્યના કાયદો અને વ્યવસ્થા તંત્રને વધુ મજબૂત બનાવવા માટે જી. એસ. મલિકની નિમણૂકને મહત્વપૂર્ણ માનવામાં આવી રહી છે. હવે ગુજરાત પોલીસનું સુકાન તેમના હાથમાં રહેશે અને તેઓ રાજ્યની સુરક્ષા વ્યવસ્થાને નવી દિશા આપશે.
