એર ઈન્ડિયાનું વધુ એક વિમાન ટેક્નિકલ ખામીના કારણે ચર્ચામાં આવ્યું છે. ભારતથી અમેરિકાના સાન ફ્રાન્સિસ્કો જતી ફ્લાઇટમાં ઉડાન દરમિયાન ટેક્નિકલ સમસ્યા સર્જાતા વિમાનને તાત્કાલિક દિલ્હી પરત લાવવામાં આવ્યું હતું. આ ઘટનાના કારણે વિમાનમાં સવાર અંદાજે 230 મુસાફરોમાં ભયનો માહોલ ફેલાઈ ગયો હતો અને લગભગ આઠ કલાક સુધી મુસાફરો ચિંતામાં રહ્યા હતા.
સૂત્રોના જણાવ્યા અનુસાર, બોઇંગ 777-300 ER વિમાન દ્વારા સંચાલિત ફ્લાઇટ Al173, લગભગ 230 મુસાફરોને લઈને જઈ રહી હતી, જ્યારે તેને માનક સલામતી પ્રક્રિયાઓ અનુસાર રાષ્ટ્રીય રાજધાની પરત ફરવાની ફરજ પડી હતી.
ભારતથી અમેરિકા જઈ રહેલા એર ઈન્ડિયાના વિમાનમાં ટેક્નિકલ ખામી સર્જાઈ હોવાની માહિતી સામે આવી છે. સમાચાર એજન્સીએ સૂત્રોના હવાલાથી જણાવ્યું હતું કે વિમાન આઠ કલાકથી વધુ સમય સુધી હવામાં રહ્યા બાદ દિલ્હી પરત ફર્યું હતું. પ્રાથમિક માહિતી અનુસાર સાન ફ્રાન્સિસ્કો જઈ રહેલા આ વિમાનમાં અંદાજે 230 મુસાફરો સવાર હતા. બુધવારે સવારે ટેક્નિકલ ખામીની જાણ થતાં જ વિમાનને રાષ્ટ્રીય રાજધાની દિલ્હી તરફ પરત ફેરવવાનો નિર્ણય લેવામાં આવ્યો હતો. જોકે, આ મામલે એર ઈન્ડિયા તરફથી હજુ સુધી કોઈ સત્તાવાર નિવેદન જાહેર કરવામાં આવ્યું નથી.
એર ઈન્ડિયા, IGI એરપોર્ટ અને DGCAના નિવેદનની રાહ
પ્રારંભિક મીડિયા રિપોર્ટ્સ અનુસાર, વિમાનમાં ખામીની જાણ થતાં જ પાયલટ્સે ફ્લાઇટને દિલ્હી સ્થિત ઈન્દિરા ગાંધી આંતરરાષ્ટ્રીય એરપોર્ટ (IGI) તરફ ડાયવર્ટ કરી હતી. હાલમાં એરલાઈન કંપની, એરપોર્ટ મેનેજમેન્ટ અને ડિરેક્ટોરેટ જનરલ ઓફ સિવિલ એવિએશન (DGCA) તરફથી કોઈ સત્તાવાર નિવેદન બહાર પાડવામાં આવ્યું નથી.
