રાજકોટના સોરઠીયાવાડી આવાસ યોજના ક્વાર્ટર વિસ્તારમાં રહેતી 14 વર્ષીય સગીરાએ આઠ શખ્સો સામે ગેંગરેપ, જાતીય સતામણી અને ધમકીની ગંભીર ફરિયાદ નોંધાવી છે. ભક્તિનગર પોલીસે ફરિયાદના આધારે તાત્કાલિક ગુનો નોંધી ચાર આરોપીઓને ઝડપી લઈને વધુ તપાસ શરૂ કરી છે. આરોપીઓમાં દેવીલ ઉર્ફે સાહિલ, સાહિલ ઉર્ફે ઝેરી, મિહીર કુગશીયા, રજાક ઠેબા, ધવલ, આસીફ શાહમદાર અને અન્ય શખ્સોના નામ સામે આવ્યા છે.
સગીરાને ઓળખાણ મારફતે ફસાવવામાં આવી
ફરિયાદ મુજબ, સગીરાને તેની સખી દ્વારા કેટલાક યુવકો સાથે પરિચય કરાવવામાં આવ્યો હતો. ત્યારબાદ આરોપીઓએ મિત્રતા અને ફરવા જવાના બહાને તેને અલગ અલગ સ્થળોએ બોલાવી હતી. સગીરાએ જણાવ્યું કે એક આરોપી તેને જંગલેશ્વર વિસ્તારમાં આવેલા ઘરે લઈ ગયો હતો, જ્યાં છરી બતાવી તેની સાથે બળજબરીથી દુષ્કર્મ આચરવામાં આવ્યું હતું અને કોઈને વાત ન કરવા ધમકી આપવામાં આવી હતી.
હોટેલ અને કારમાં વારંવાર દુષ્કર્મના આક્ષેપ
સગીરાના જણાવ્યા મુજબ, બાદમાં અન્ય આરોપીઓએ પણ તેને અલગ અલગ સ્થળોએ લઈ જઈ દુષ્કર્મ આચર્યું હતું. એક આરોપીએ પોતાને પોલીસકર્મી તરીકે ઓળખાવી બસ સ્ટેશન પાછળની હોટેલમાં લઈ જઈ બળજબરીથી શરીર સંબંધ બાંધ્યો હતો. અન્ય આરોપીઓએ પણ હોટેલ અને કારમાં લઈ જઈ ધમકી આપી વારાફરતી દુષ્કર્મ આચર્યું હોવાના આક્ષેપ કરવામાં આવ્યા છે.
પરિવારને જાણ કર્યા બાદ પોલીસ ફરિયાદ નોંધાઈ
સગીરાએ જણાવ્યું કે સતત મળતી ધમકીઓના કારણે તે લાંબા સમય સુધી ડરી ગઈ હતી અને કોઈને વાત કરી શકી નહોતી. આખરે સમગ્ર ઘટનાની જાણ તેણે પોતાના માતા-પિતાને કરતાં તેઓ તેને પોલીસ સ્ટેશન લઈ ગયા હતા. ત્યારબાદ ભક્તિનગર પોલીસે મહિલા પોલીસ અને શી ટીમની હાજરીમાં એફઆઈઆર નોંધી કાર્યવાહી શરૂ કરી હતી.
ચાર આરોપીઓની ધરપકડ, અન્યની શોધખોળ ચાલુ
પોલીસે તાત્કાલિક કાર્યવાહી કરતાં ચાર આરોપીઓને ઝડપી લીધા છે, જ્યારે અન્ય આરોપીઓની શોધખોળ શરૂ કરવામાં આવી છે. પોલીસ તપાસમાં સામે આવ્યું છે કે આરોપી મિહીર કુગશીયા અગાઉ પણ નકલી પોલીસ બની લૂંટ ચલાવવાના ગુનાઓમાં સંડોવાયેલો રહ્યો છે. સમગ્ર મામલે ડીસીપી હેતલ પટેલ અને એસીપી બી.વી. જાધવના માર્ગદર્શન હેઠળ તપાસ આગળ ધપાવવામાં આવી રહી છે.
