સુરત પોલીસ કમિશનર અનુપમસિંહ ગેહલોત હાલમાં એક્શન મૂડમાં જોવા મળી રહ્યા છે. પુણા પોલીસ મથકની હદમાં સ્થાનિક પોલીસની નજર સામે જ ચાલી રહેલા જુગારના અડ્ડા પર સ્ટેટ મોનિટરિંગ સેલ દ્વારા બે વખત સફળ રેડ કરવામાં આવી હતી. આ મામલાને ગંભીર બેદરકારી ગણાવી પોલીસ કમિશનરે પુણા પોલીસ મથકના PI વી.એમ. દેસાઈને તાત્કાલિક અસરથી સસ્પેન્ડ કરી દીધા છે.
પોલીસ વિભાગ દ્વારા કરવામાં આવેલી નવી નિમણૂક મુજબ, હવે પુણા પોલીસ મથકનો ચાર્જ ટ્રાફિક શાખાના PI સી.બી. ચૌધરીને સોંપવામાં આવ્યો છે. સ્થાનિક પોલીસની નાક નીચે ગેરકાયદે પ્રવૃત્તિઓ ચાલી રહી હોવા છતાં યોગ્ય કાર્યવાહી ન થતાં આ કડક પગલું લેવામાં આવ્યું હોવાનું માનવામાં આવી રહ્યું છે.
મહત્વનું છે કે અનુપમસિંહ ગેહલોત છેલ્લા બે વર્ષથી સુરત પોલીસ કમિશનર તરીકે ફરજ બજાવી રહ્યા છે. જોકે તેમના કાર્યકાળ દરમિયાન કોઈ ઉચ્ચ પોલીસ અધિકારીને સીધા સસ્પેન્ડ કરવામાં આવ્યો હોય એવો આ પહેલો કિસ્સો છે. સામાન્ય રીતે આવી બેદરકારીના કેસોમાં માત્ર બદલીની કાર્યવાહી કરવામાં આવતી હોય છે, પરંતુ આ વખતે સીધા સસ્પેન્શનના નિર્ણયથી પોલીસ બેડામાં ફફડાટ ફેલાઈ ગયો છે.
પોલીસ કમિશનરના આકરા વલણ બાદ સુરત પોલીસ વિભાગમાં હાલ ભારે ચર્ચાનો માહોલ છે. લાંચિયા અને બેદરકાર અધિકારીઓ માટે આ કાર્યવાહી ચેતવણીરૂપ માનવામાં આવી રહી છે.
