સુરત ગ્રામ્યના પલસાણા તાલુકાના બગુમરા ગામમાં આવેલી મહાદેવ વિલા એપાર્ટમેન્ટમાંથી એક યુવતીનો શંકાસ્પદ હાલતમાં મૃતદેહ મળી આવતા વિસ્તારમાં ચકચાર મચી ગઈ છે. રવિવારે બનેલી આ ઘટનાએ સ્થાનિક લોકોમાં ભયનો માહોલ ઉભો કર્યો છે. મૃતક યુવતી લિવ-ઇન રિલેશનશિપમાં રહેતી હોવાનું સામે આવ્યું છે, જ્યારે તેની સાથે રહેતો યુવક ઘટના બાદથી ફરાર છે. હાલ પોલીસ સમગ્ર મામલે ગંભીરતાથી તપાસ કરી રહી છે.
ફ્લેટ નંબર 506માંથી મૃતદેહ મળ્યો
આ ઘટના મહાદેવ વિલા એપાર્ટમેન્ટના પાંચમા માળે આવેલા ફ્લેટ નંબર 506માં બની હતી. મૃતક યુવતીની ઓળખ માહી ખાતૂન તરીકે થઈ છે. માહિતી મુજબ, માહી એક યુવક સાથે આ ફ્લેટમાં લિવ-ઇન રિલેશનશિપમાં રહેતી હતી.
ઘટનાનો ખુલાસો ત્યારે થયો જ્યારે યુવકનો એક મિત્ર તેને નોકરી પર સાથે લઈ જવા ફ્લેટ પર આવ્યો હતો. ફ્લેટનો દરવાજો ખોલતા જ યુવતી મૃત હાલતમાં જોવા મળી હતી, જ્યારે યુવક ત્યાંથી ગાયબ હતો.
પોલીસ અને ફોરેન્સિક ટીમે તપાસ શરૂ કરી
મિત્રે તરત જ મકાન માલિક અને પોલીસને ઘટનાની જાણ કરી હતી. માહિતી મળતા જ પલસાણા પોલીસની ટીમ સ્થળ પર પહોંચી ગઈ હતી અને મૃતદેહને કબ્જે લઈને પોસ્ટમોર્ટમ માટે હોસ્પિટલમાં મોકલી આપ્યો હતો.
પોલીસ હાલમાં આત્મહત્યા કે હત્યા – બંને એંગલથી તપાસ કરી રહી છે. પોસ્ટમોર્ટમ રિપોર્ટ આવ્યા બાદ જ યુવતીના મોતનું સાચું કારણ સામે આવશે.
યુવકની ભૂમિકા પર પોલીસની નજર
સુરત ગ્રામ્ય પોલીસ સ્ટેશનના પોલીસ ઇન્સ્પેક્ટર બી.ડી. જિલરિયાએ જણાવ્યું હતું કે, “પ્રાથમિક માહિતી મુજબ યુવતીનું નામ મેહવિશ ખાતૂન હતું અને તેની ઉંમર અંદાજે 22 વર્ષ હતી. હાલ પોસ્ટમોર્ટમની કાર્યવાહી ચાલી રહી છે. રિપોર્ટ આવ્યા બાદ જ સ્પષ્ટ થશે કે આ આત્મહત્યા છે કે પછી કોઈ ગુનાહિત કાવતરું.”
પોલીસે યુવકની શોધખોળ શરૂ કરી છે અને ફ્લેટ તેમજ આસપાસના CCTV ફૂટેજની પણ તપાસ હાથ ધરવામાં આવી છે. સમગ્ર ઘટનાને લઈને અનેક સવાલો ઉભા થયા છે અને હવે સૌની નજર પોલીસ તપાસ પર ટકેલી છે.
