ચશ્મા અત્યાર સુધી નજર સુધારવાનું સાધન રહ્યું છે, પરંતુ હવે તે તમારી જેબમાં રહેલા ફોનનું કામ પણ કરી શકે છે. બિન્દી-તિલક મુદ્દે તાજેતરમાં વિવાદોમાં રહેલી Lenskart એ પોતાના સ્માર્ટ ગ્લાસેસ ‘B by Lenskart’ની જાહેરાત કરી છે, જે ભારત માં અર્લી એક્સેસ માટે ઉપલબ્ધ છે. જો તમે તેને અજમાવવા માંગતા હો, તો કંપનીની વેબસાઈટ પર જઈને વેઇટિંગ લિસ્ટમાં જોડાઈ શકો છો.
રિપોર્ટ્સ મુજબ, ગૂગલ Gemini AI આસિસ્ટન્ટથી સજ્જ આ સ્માર્ટ ચશ્મા અર્લી એક્સેસ માટે આશરે ₹22,000માં ઉપલબ્ધ રહેશે, જ્યારે તેની મૂળ કિંમત ₹27,000 રાખવામાં આવશે.
ડિઝાઇન અને હાર્ડવેર
‘B by Lenskart’ દેખાવમાં જેટલું સ્ટાઇલિશ છે, અંદરથી એટલું જ શક્તિશાળી છે. આ ચશ્મામાં Snapdragon AR1 Gen 1 ચિપસેટ આપવામાં આવશે, જે તેને ઝડપી કામગીરી માટે સક્ષમ બનાવે છે. તેમાં 32GB ઇનબિલ્ટ સ્ટોરેજ આપવામાં આવી છે, જેથી જરૂરી ડેટા સરળતાથી સ્ટોર કરી શકાય.
આ સિવાય તેમાં જાપાનીઝ અલ્ટ્રા-થિન બ્લૂ લાઇટ લેન્સ આપવામાં આવ્યા છે, જે -6 થી +6 સુધીની આંખની પાવર માટે યોગ્ય છે. આ બ્લેક અને સિલ્વર કલર વિકલ્પોમાં ઉપલબ્ધ રહેશે. રિપોર્ટ મુજબ તેનું વજન માત્ર 45 ગ્રામ છે, જેથી લાંબા સમય સુધી પહેરવામાં કોઈ તકલીફ નહીં થાય. આ ચશ્મું સ્ટાઇલ અને ટેક્નોલોજીનું ઉત્તમ સંયોજન ગણાઈ રહ્યું છે.
કેમેરા અને AIનો મજબૂત મિશ્રણ
આ સ્માર્ટ ચશ્મામાં 12 મેગાપિક્સલનો અલ્ટ્રાવાઇડ Sony સેન્સર આપવામાં આવ્યો છે, જે લૅન્ડસ્કેપમાં 1080p અને પોર્ટ્રેટ મોડમાં 1440p ગુણવત્તામાં વીડિયો રેકોર્ડિંગ કરી શકે છે.
ગૂગલ Gemini AIનું ઇન્ટિગ્રેશન તેને વધુ ખાસ બનાવે છે. તમે તેને અવાજ દ્વારા સરળતાથી નિયંત્રિત કરી શકશો. આ ચશ્મા 40થી વધુ ભાષાઓને સપોર્ટ કરે છે અને તેમાં Look and Tell તથા Live Note Taking જેવા અદ્યતન ફીચર્સ આપવામાં આવ્યા છે.
ટચ કંટ્રોલ્સ અને ડ્યુઅલ ડાયરેક્શનલ સ્પીકર્સ સાથે આ ચશ્મું સંપૂર્ણ સ્માર્ટ ડિવાઇસ બની જાય છે, જેથી નાનાં કામ માટે પણ ફોન કાઢવાની જરૂર નહીં પડે.
બેટરી અને કનેક્ટિવિટી
સ્માર્ટ ચશ્માની બેટરીને લઈને ઘણી વખત ચિંતા રહેતી હોય છે, પરંતુ ‘B by Lenskart’માં બેટરી લાઇફ પર ખાસ ધ્યાન આપવામાં આવ્યું છે. એક વખત ચાર્જ કર્યા પછી આ ચશ્મું લગભગ 4 કલાક સુધી સતત કામ કરી શકે છે.
તે સાથે આવતું વાયરલેસ ચાર્જિંગ કેસ કુલ મળીને 48 કલાક સુધીનો બેકઅપ આપે છે. જો તમે ઉતાવળમાં હો, તો તેની ફાસ્ટ ચાર્જિંગ ટેક્નોલોજી માત્ર 15 મિનિટમાં 50% સુધી ચાર્જ કરી શકે છે.
