આખરે, અમેરિકાના રાષ્ટ્રપતિ ડોનાલ્ડ ટ્રમ્પે ઈરાન યુદ્ધમાં પંદર દિવસના યુદ્ધ વિરામને ખત્મ થતાં પહેલાં લંબાવ્યો છે. જો કે એ માટેની મર્યાદા જણાવી નથી, સાથે જ 3 થી 5 દિવસમાં ઈરાનને યુરેનિયમ અને આણ્વિક પ્રોગ્રામ અંગે નક્કર જવાબ નહીં આપે તો ફરીથી હુમલા કરવાનો હૂંકાર કર્યો છે. બીજી તરફ ઈરાને યુદ્ધ વિરામ લંબાવવાના ટ્રમ્પના નિર્ણયને એકતરફી ગણાવવા સાથે હોર્મુઝમાં એક કોર્ગો શીપ પર હુમલો કર્યો હતો.
અમેરિકાના રાષ્ટ્રપતિ ડોનાલ્ડ ટ્રમ્પે જણાવ્યું છે કે પાકિસ્તાનની વિનંતી પર અમેરિકા ઈરાન સાથે યુદ્ધવિરામ લંબાવી રહ્યું છે. જોકે, તેમણે કેટલા સમય માટે તે સ્પષ્ટ કર્યું નથી. ટ્રમ્પે જણાવ્યું હતું કે ઈરાનમાં હાલમાં નેતૃત્વ અને સરકારમાં એકતાનો અભાવ છે. આ સમયે, પાકિસ્તાનના વડા પ્રધાન શાહબાઝ શરીફ અને આર્મી ચીફ અસીમ મુનીરે તેમને ઈરાન પર હુમલાઓ અસ્થાયી રૂપે બંધ કરવા અપીલ કરી હતી જેથી ઈરાનને સંયુક્ત દરખાસ્ત તૈયાર કરવા માટે સમય મળે. ટ્રમ્પે જણાવ્યું હતું કે, આ વિનંતીના જવાબમાં, તેમણે અમેરિકન સૈન્યને હાલ પૂરતું હુમલાઓ બંધ કરવાનો આદેશ આપ્યો છે. જોકે, સૈન્યને પણ સંપૂર્ણ રીતે તૈયાર રહેવાની સૂચના આપવામાં આવી છે. આ સમય દરમિયાન, ઈરાન પર દબાણ જાળવી રાખવા માટે નાકાબંધી ચાલુ રહેશે. તેમણે સ્પષ્ટતા કરી હતી કે જ્યાં સુધી ઈરાન એક નક્કર અને એકીકૃત દરખાસ્ત રજૂ ન કરે અને વાટાઘાટો પૂર્ણ ન થાય ત્યાં સુધી યુદ્ધવિરામ ચાલુ રહેશે, પરિણામ ગમે તે હોય.
