દિલ્હી પોલીસે નકલી ટૂથપેસ્ટ બનાવતી ફેક્ટરીનો પર્દાફાશ કર્યો છે. આ ફેક્ટરીમાં પ્રખ્યાત સેન્સોડાઇન બ્રાન્ડના 7,000થી વધુ નકલી ટૂથપેસ્ટ તૈયાર થઈ રહ્યા હતા. આ નકલી ઉત્પાદનો દિલ્હી-એનસીઆરથી લઈને સદર બજાર દ્વારા દેશભરમાં વેચાણ માટે તૈયાર કરવામાં આવતા હતા, જે લોકોના આરોગ્યને ગંભીર જોખમમાં મુકી દે છે. આ મામલે પોલીસ દ્વારા મોટી કાર્યવાહી કરવામાં આવી છે, તેમાં અત્યારે એક આરોપીની ધરપકડ પણ કરી લેવામાં આવી છે.
ખાનગી બાતમીના આધારે પોલીસે પાડ્યાં દરોડા
ખંજવાલાના મહાવીર વિહાર વિસ્તારમાં એક વેરહાઉસમાં નકલી સેન્સોડાઇન ટૂથપેસ્ટ બનાવવામાં આવી રહી હોવાની પોલીસને બાતમી મળી હતી. જેથી બાતમીના આધારે ક્રાઈમ બ્રાન્ચની ટીમે દરોડો પાડ્યો અને સમગ્ર રેકેટનો પર્દાફાશ કર્યો છે. કાર્યવાહીની વાત કરવામાં આવે તો, પોલીસે સ્થળ પરથી મોટી માત્રામાં નકલી સેન્સોડાઇન ટૂથપેસ્ટ, ખાલી ટ્યુબ, પેકેજિંગ સામગ્રી અને મશીનરી જપ્ત કરી છે. આ કેસના સંદર્ભમાં ફેક્ટરી સંચાલક હરિઓમ મિશ્રાની ધરપકડ કરવામાં આવી છે.
પોલીસે નકલી માલનો જથ્થો જપ્ત કરી કાર્યવાહી શરૂ કરી
આ દરોડા દરમિયાન પોલીસે જોયું કે વેરહાઉસમાં છ મજૂરો ખાલી ટ્યુબને હલકી ગુણવત્તાવાળા પેસ્ટથી ભરવા માટે મશીનરીનો ઉપયોગ કરી રહ્યા હતા. આ ટ્યુબને સીલ કરવામાં આવી રહી હતી અને વાસ્તવિક સેન્સોડાઇન જેવી પેક કરવામાં આવી રહી હતી, જેથી તેને બજારમાં વેચી શકાય. આવી ટૂથપેસ્ટ લોકોના સ્વાસ્થ્ય સાથે જોખમી સાબિત થઈ શકે છે, જેથી પોલીસે સત્વરે આ કેસમાં તપાસ શરૂ કરી દીધી છે. આ કેસમાં વધુ તપાસ ચાલુ છે અને પોલીસ અન્ય આરોપીઓની ઓળખ કરવા માટે કામ લાગી ગઈ છે.
