સામાન્ય રીતે બાળક પેદા થાય ત્યારે તેનું વજન ત્રણ કિલો આસપાસ હોય છે. જોકે કેટલાક બાળકો 4 કે 4.5 કિલોના પણ હોય છે. પરંતુ અમેરિકામાં એક મહિલાએ એટલા વજનદાર બાળકને જન્મ આપ્યો છે કે તેનું વજન સામાન્ય બાળક કરતા બેગણું વધારે છે. આ બાળકને જોઈ ન માત્ર પરિવાર પણ હોસ્પિટલના કર્મચારીઓની આંખો પણ પહોળી થઈ ગઈ છે. 31 જાન્યુઆરીના રોજ જન્મેલો શૉન જૂનિયર નામના આ બાળકનું વજન 5.9 કિલોગ્રામ એટલે કે અમેરિકન ભાષામાં 13 પાઉન્ડ છે.
અંગ્રેજી અખબારની રિપોર્ટ પ્રમાણે, બાળકના માતા પિતાનું નામ ટેરિકા અને શોન છે. બંનેએ કહ્યું હતું કે, એમને ખબર હતી કે તેમનું બાળક કદમાં આટલું મોટું છે. પરંતુ જ્યારે પહેલી વખત એને જોયો તો ચકિત્ત થઈ ગયા. આ બાળક હોસ્પિટલના ઇતિહાસનું અત્યાર સુધીનું સૌથી વજનદાર બાળક છે.
ચાર બાળકોની માતા ટેરિકાએ જણાવ્યું હતું કે નવજાત બાળક અત્યારથી ત્રણથી છ મહિનાના બાળકોના કપડાં પહેરે છે. બાળકની માતાએ કહ્યું હતું કે, એવું લાગે છે કે સીધી ત્રણ મહિનાના બાળકની માતા બની ચૂકી છું. બીજી બાજુ હોસ્પિટલની નર્સો અને ડૉક્ટરોએ જણાવ્યું હતું કે બાળકનો જન્મ અસામાન્ય હતો. પરંતુ બધું હેમખેમ પતી ગયું. હોસ્પિટલે જ પોતાના ફેસબુક પેજ પર બાળકની તસવીર પોસ્ટ કરી હતી. જેમાં શોન જૂનિયરની પાસે એક અન્ય નવજાત બાળકી માર્ગોટ જોવા મળી રહી છે. જેથી બાળકની વિશાળકાયાથી લોકો પરિચિત થાય.
ઇતિહાસના સૌથી વજનવાળા છોકરાનો જન્મ 19 જાન્યુઆરી 1897ના રોજ અમેરિકાના ઓહાયો રાજ્યના સેવિલ શહેરમાં થયો હતો. ગિનીઝ બુક ઓફ ધ વર્લ્ડ રેકોર્ડ મુજબ નવજાત બાળકનું વજન 9.88 કિલોગ્રામ હતું અને તેની લંબાઈ 28 ઇંચ એટલે કે 71.12 સેન્ટીમીટર હતી. ન માત્ર વજનદાર પણ લંબાઈની દૃષ્ટિએ પણ અત્યાર સુધીનું સૌથી લાંબું બાળક હતો. જોકે અસાધારણ આકારના કારણે આ બાળક માત્ર કેટલાક કલાક જ જીવતું રહ્યું હતું.
