સુરતમાં ભાજપના બે મોટા નેતાઓ વચ્ચે લાંબા સમયથી ચાલી રહેલા કોલ્ડ વોર વચ્ચે કતારગામના ભાજપના કોર્પોરેટરે ઝંપલાવતાં મામલો વધુ ગરમાયો છે. કતારગામની ત્રણ ટીપી સ્કીમમાં રિઝર્વેશન મુદ્દે ઊભેલા વિવાદે પહેલેથી જ આંતરિક અસંતોષ જગાવ્યો હતો, જે શરૂઆતમાં માત્ર મોટા નેતાઓ સુધી સીમિત હતો.
પરંતુ સરકારી સ્કૂલની જગ્યા બદલવાના મુદ્દે કતારગામના ભાજપના કોર્પોરેટર નરેન્દ્ર પાંડવ દ્વારા સોશિયલ મીડિયામાં કરાયેલા બેફામ નિવેદનો અને ધારાસભ્ય વિનોદ મોરડીયા સામે કરાયેલા સીધા-આડકતરા પ્રહારથી સમગ્ર મામલાને રાજકીય રંગ મળી ગયો હતો.
નરેન્દ્ર પાંડવ દ્વારા અગાઉ પણ અનેક વખત બેફામ નિવેદનો કરવામાં આવ્યા હોવા છતાં શહેર સંગઠન લાંબા સમય સુધી મૌન રહ્યું હતું. પરિણામે પાલિકાની ચૂંટણી પહેલાં જ વિપક્ષને તૈયાર મુદ્દો મળી ગયો હોવાનું રાજકીય વર્તુળોમાં ચર્ચાઈ રહ્યું છે.
પાલિકાની ચૂંટણી નજીક આવતા સ્કૂલની જગ્યા બદલાયેલા સ્થળે જઈને કરાયેલા નિવેદનો અને ત્યારબાદ અસામાજિક તત્વો સામે ફરિયાદ બાદ તેમના પરિવાર તરફથી કરાયેલા નિવેદનોને કારણે વર્ગવિગ્રહ સર્જાય તેવી સ્થિતિ ઊભી થઈ હતી. આ ઘટનાક્રમથી ભાજપ બેકફૂટ પર આવી ગયું છે અને ચૂંટણીમાં નુકસાન થવાની શક્યતા પણ વ્યક્ત થઈ રહી છે.
આખરે મોડે મોડે શહેર સંગઠન હરકતમાં આવ્યું છે. શહેર ભાજપ પ્રમુખ પરેશ પટેલ દ્વારા વિવાદી કોર્પોરેટર નરેન્દ્ર પાંડવને શો-કોઝ નોટિસ પાઠવવામાં આવી છે. નોટિસમાં જણાવાયું છે કે છેલ્લા ઘણા સમયથી સોશિયલ મીડિયામાં કરેલી પોસ્ટ્સ તથા વોર્ડમાં મનસ્વી વર્તનના કારણે પાર્ટીને ક્ષોભજનક સ્થિતિનો સામનો કરવો પડ્યો છે અને આ અંગે સાત દિવસમાં સ્પષ્ટીકરણ રજૂ કરવા જણાવ્યું છે.
બે મોટા નેતાઓની ખેંચતાણ વચ્ચે ઝંપલાવનાર કોર્પોરેટર હવે પોતે જ રાજકીય ઘેરાબંધીમાં ફસાયા છે. પાલિકાની ચૂંટણી પહેલાં ભાજપ માટે આ આંતરિક વિખવાદ કેટલો નુકસાનકારક સાબિત થશે તે મુદ્દે રાજકીય વર્તુળોમાં અનેક અટકળો શરૂ થઈ ગઈ છે.
