યુરોપમાં ભયાનક તોફાન ‘ગોરેટ્ટી’નો કહેર: ઉત્તર જર્મનીમાં હિમવર્ષા અને પ્રચંડ પવનથી ટ્રેન સેવાઓ સંપૂર્ણ બંધ

યુરોપ અત્યારે શિયાળાના સૌથી ભયાનક તોફાન ગોરેટ્ટીનો સામનો કરી રહ્યું છે. શુક્રવારે ઉત્તરી જર્મનીમાં કુદરતે એવું રૌદ્ર સ્વરૂપ ધારણ કર્યું કે સમગ્ર પરિવહન વ્યવસ્થા પડી ભાંગી છે. હિમવર્ષા અને પ્રચંડ પવનને કારણે રાષ્ટ્રીય રેલ ઓપરેટર, ડોઇશ બાહનને લાંબા અંતરની તમામ ટ્રેન સેવાઓ તાત્કાલિક અસરથી સ્થગિત કરવાની ફરજ પડી છે. રેલવે તંત્રએ સ્પષ્ટ શબ્દોમાં જણાવ્યું છે કે, હાલની પરિસ્થિતિમાં ઉત્તરી જર્મનીમાં રેલ મુસાફરી કરવી અશક્ય છે.

મુખ્ય રૂટ પર બ્રેક અને મુસાફરોની હાલાકી
આ વાવાઝોડાની સૌથી વધુ અસર જર્મનીના આર્થિક અને વહીવટી કેન્દ્રો પર પડી છે. બર્લિનથી હેમ્બર્ગ અને પશ્ચિમના ઔદ્યોગિક રાજ્ય નોર્થ રાઈન-વેસ્ટફેલિયાને જોડતા રેલવે ટ્રેક બરફની યાદર નીચે ઢંકાઈ ગયા છે. લાંબા અંતરની ટ્રેનો બંધ થવાને કારણે હજારો મુસાફરો રેલવે સ્ટેશનો પર અટવાઈ પડ્યા છે. તોફાનની તીવ્રતા એટલી વધારે છે કે પાટા પરથી બરફ હટાવવાની કામગીરી પણ જોખમી બની છે.

માત્ર જમીન પર જ નહીં. પરંતુ આભમાં પણ જોખમ વધ્યું છે. ખરાબ દ્રશ્યતા અને તેજ પવનને કારણે હવાઈ સેવાઓ પર ગંભીર અસર પડી છે.યુનાઇટેડ કિંગડમ (UK) જઈ રહેલી એર ઇન્ડિયાની ફ્લાઇટ્સ સહિત અનેક આંતરરાષ્ટ્રીય ફ્લાઇટ્સને અન્ય સુરક્ષિત એરપોર્ટ્સ પર ડાયવર્ટ કરવામાં આવી છે. રનવે પર બરફ જામી જવાને કારણે વિમાનોનું લેન્ડિંગ અને ટેક-ઓફ કરવું જોખમી બન્યું છે.

યુરોપમાં રેડ એલર્ટ’: 160 કિમીની ઝડપે ફૂંકાતો પવન
હવામાન વિભાગે બ્રિટનથી લઈને જર્મની સુધીના વિસ્તારોમાં દુર્લભ એવી ‘લાલ ચેતવણી’ જારી કરી છે. પવનની ગતિ 160 કિમી પ્રતિ કલાક સુધી પહોંચી ગઈ છે, જે વૃક્ષો અને વીજળીના થાંભલાઓને ઉખેડી નાખવા માટે પૂરતી છે. યુકેના અમુક ભાગોમાં તો 30 સેમી જેટલી ભારે બરફવર્ષા નોંધાઈ છે, જેના કારણે શાળાઓ બંધ કરી દેવામાં આવી છે અને લોકોને ઘરમાં જ રહેવાની કડક સલાહ આપવામાં આવી છે.