સુરત શહેરના પુણા વિસ્તારમાંથી નકલી ડોક્ટરો દ્વારા ચલાવાતી ફેક ક્લિનિકનો ભંડાફોડ થયો છે. ઝોન-1 LCB સ્કોડે મળેલી ચોક્કસ માહિતીના આધારે રેડ કરતાં પ્રસાંત માલાકર અને તેજ બહાદુર નિસાદ નામના બે ઈસમોને ઝડપી પાડ્યા છે. બંનેએ કોઈ માન્ય ડોક્ટરેટ ક્વોલિફિકેશન લીધું નથી, છતાં છેલ્લા 10 વર્ષથી તેઓ ડોક્ટર તરીકેની ઓળખ સાથે દર્દીઓને સારવાર આપી રહ્યા હતા.
ઝડપાયેલા ઇસમોમાંથી એક ધોરણ 10 અને બીજો ધોરણ 12 પાસ છે. ભારતમાં જ્યાં માત્ર નોંધાયેલ અને લાઈસન્સ ધરાવતા તબીબોને જ દર્દીઓનું સારવાર કરવાનો કાનૂની અધિકાર હોય છે, ત્યાં આવા નકલી તબીબો ન માત્ર કાયદાનું ઉલ્લંઘન કરે છે, પરંતુ દર્દીઓના આરોગ્ય સાથે ગંભીર ખીલવાડ પણ કરે છે. પુણા વિસ્તારમાંથી પોલીસે તેમની ક્લિનિક પરથી મોટી સંખ્યામાં દવાઓનો જથ્થો પણ કબ્જે કર્યો છે, જે સામાન્ય જનતાની સુરક્ષા માટે ચિંતા જનક બાબત છે.
આ મામલે પુણા પોલીસ સ્ટેશનમાં ગુનો દાખલ કરવામાં આવ્યો છે અને પોલીસે વધુ તપાસ હાથ ધરી છે. અત્યારથી પોલીસ આ લોકોના સંપર્કમાં રહેલા અન્ય કોઈ નકલી ડોક્ટર તો નથી ને તે દિશામાં તપાસ ચલાવી રહી છે. તેમજ તેઓ દવાઓ ક્યાંથી મેળવતા હતા તેનું પણ પતાવું કરવામાં આવશે. સુરત પોલીસની આ કાર્યવાહી લોકોને નકલી તબીબો સામે જાગૃત કરતી હોવાથી પ્રશંસનીય માનવામાં આવી રહી છે. લોકો માટે જરૂર બની જાય છે કે તેઓ કોઈપણ તબીબ પાસે સારવાર લેતાં પહેલાં તેમની લાયકાત અને પ્રમાણિત લાઈસન્સ હોવાની ખાતરી કરો.
