રાજસ્થાનના મૂળની અને હાલ સુરતમાં રહેતી 25 વર્ષીય ભાવિકા ખત્રીએ ગત 30 એપ્રિલના રોજ ઉદયપુર શહેરમાં યોજાયેલી “મિસ ઈન્ડિયા મિલેનિયમ યુનિવર્સ” સ્પર્ધામાં વિજય મેળવીને પોતાની ક્ષમતા સાબિત કરી છે. દેશભરના 50થી વધુ સ્પર્ધકો વચ્ચે પોતાની અલગ ઓળખ બનાવતી ભાવિકા ટોપ 12 ફાઈનલિસ્ટ સુધી પહોંચી અને અંતે વિજેતાનું તાજ જીત્યું. રેમ્પ પર તેમની આત્મવિશ્વાસભર્યું ચરણ, વ્યક્તિત્વ અને વાતચીતના ઔજસ સાથે જ્યુરીને પણ પ્રભાવિત કર્યું. આ નેશનલ લેવલની જીત પછી હવે ભાવિકા પેરિસમાં યોજાનારી ઇન્ટરનેશનલ મિસ યુનિવર્સ સ્પર્ધામાં ભારતનું પ્રતિનિધિત્વ કરશે, જેનો સમગ્ર દેશને ગૌરવ છે.
મેડિકલ સ્ટુડન્ટ હોવા છતાં ભાવિકા ખત્રીએ કરિયર માટે ફિલ્મ જગતને પસંદ કર્યું છે. માત્ર 21 વર્ષની ઉંમરે તેણે એક્ટિંગ ક્ષેત્રમાં પ્રવેશ કર્યો હતો અને હવે સુધી 12થી વધુ ગુજરાતી ફિલ્મોમાં કામ કરી ચૂકી છે. તાજેતરમાં તેણે “છૂટાછેડા” નામની ગુજરાતી ફિલ્મમાં મુખ્ય પાત્ર ભજવ્યું હતું, જે દર્શકોમાં ખૂબ લોકપ્રિય બની. ભાવિકાનું લક્ષ્યાંક હંમેશા કલા ક્ષેત્રે કંઈક અનોખું કરવાનું રહ્યું છે. એક્ટિંગ ઉપરાંત તેણે મોડેલિંગ, થિએટર તથા નૃત્ય ક્ષેત્રે પણ પોતાનું ધ્યાન કેન્દ્રિત કર્યું છે, જેના કારણે તેની પ્રસ્તુતિ વધુ સશક્ત બને છે.
ટેલિવિઝન ક્ષેત્રમાં પણ ભાવિકાએ પોતાનું સ્થાન બનાવ્યું છે. DD નેશનલ પર આવનારી ધારાવાહિક “કાકભૂષુંડી રામાયણ”માં તે મહત્વપૂર્ણ પાત્રમાં જોવા મળશે. સાથે સાથે તે મ્યુઝિક આલ્બમ્સ અને ક્રાઈમ શો એક્સપોઝ પણ કરી રહી છે. ભાવિકા ખત્રીની સફળતા એ બતાવે છે કે અભ્યાસ અને કળાને એકસાથે આગળ લઈ જવાથી અઢળક સંભાવનાઓ ખૂલે છે. આજે ભાવિકા માત્ર એક મોડેલ કે અભિનેત્રી નથી, પણ નવી પેઢી માટે પ્રેરણાસ્ત્રોત બની ચૂકી છે.
