અજમેરની ડિગ્ગી બજારમાં આવેલી નાઝ હોટલમાં ભીષણ આગની ઘટના ઘટી હતી. સૂત્રો દ્વારા મળતી જાણકારી પ્રમાણે આગની ઘટનામાં 4 લોકો જીવતા ભડથું થયા હતાં. જ્યારે બીજા ચાર લોકોની હાલત વધારે ગંભીર હોવાથી હોસ્પિટવલમાં સારવાર હેઠળ છે. હોટલમાં આગ શોર્ટ સર્કિટના કારણે લાગી હોવાની આશંકા છે. અકસ્માત સમયે હોટલમાં મોટી સંખ્યામાં યાત્રાળુઓ રોકાયેલા હતા. અનેક લોકોએ તો બારીઓમાંથી કૂદીને પોતાનો જીવ બચાવ્યો હતો.
આજે ગુરૂવારે સવારે ડિગ્ગી બજારમાં આવેલી હોટલ નાઝમાં ભીષણ આગ લાગી હતી. આગના કારણે બે પુરૂષ, એક મહિલા અને એક બાળક સહિત ચાર લોકોએ જીવ ગુમાવ્યા હતા. પોલીસ ઘટનાની જાણ થતાં જ તુરંત ઘટનાસ્થળે પહોંચી બચાવ કામગીરી હાથ ધરી હતી. એમ્બ્યુલન્સ અને ફાયર ફાઈટર્સ પણ બચાવ કામગીરી કરી રહ્યા છે. તેઓએ બેભાન થઈ ગયેલા પાંચ લોકોને બચાવ્યા છે. બે મહિલાઓ આગમાં દાઝતાં ઈજાગ્રસ્ત થઈ છે. એક મહિલા ફાયર ફાઈટર પણ આગની ઝપેટમાં આવી જતાં ઈજાગ્રસ્ત થઈ હતી.
ફાયર વિભાગના અધિકારીઓએ જણાવ્યું કે, ‘એસી ફાટવાનો જોરદાર અવાજ આવ્યો, ત્યારબાદ તરત જ આગ ફેલાઈ ગઈ. લોકો બારી તોડીને બહાર નીકળતા જોવા મળ્યા. એક મહિલાએ મારા ખોળામાં એક બાળક ફેંકી દીધું. ફાયર બ્રિગેડ અડધા કલાક પછી આવી’ ફાયર બ્રિગેડની કામગીરી પર લોકોએ રોષ વ્યક્ત કર્યો અને સવાલો કર્યો હતાં. પોલીસે આપેલી વિગતો પ્રમાણે આગની ઘટનામાં મોહમ્મદ ઝાહિદ, 30 વર્ષીય મહિલા, 20 વર્ષીય પુરુષ અને 40 વર્ષીય પુરુષનું દર્દનાક મોત થયું છે.
