લંડનના હિથ્રો એરપોર્ટ પર એક મોટું વિજ સંકટ પેદા થયું છે. જેના કારણે હિશ્રો એરપોર્ટ આજે આખો દિવસ બંધ રાખવા માટેનો નિર્ણય લેવાયો છે. હિશ્રો એરપોર્ટ નજીકના એક ઇલેક્ટ્રિકલ સબ સ્ટેશનમાં આગ લાગવાના કારણે હીથ્રો એરપોર્ટ સંપુર્ણ ઠપ્પ થઇ ગયું છે. જેના કારણે એરપોર્ટમાં સંચાલિત થતી તમામ વસ્તુઓ બંધ થઇ ગઇ છે. આ આગ એટલી ભયાનક હતી કે, યુદ્ધના ધોરણે તેને ઠારવા છતા ભયાનક નુકસાન થયું છે. જેના રિપેરિંગમાં 24 કલાક જેટલો સમય લાગશે. જેના કારણે 24 કલાક માટે હિશ્રો એરપોર્ટ બંધ રાખવા માટેની જાહેરાત કરી દેવામાં આવી છે. અત્રે ઉલ્લેખનીય છે કે, હિશ્રો એરપોર્ટ વિશ્વના સૌથી વ્યસ્ત એરપોર્ટ પૈકીનું એક છે.
હિશ્રો એરપોર્ટ પર આવતી જતી તમામ ફ્લાઇટને રદ્દ કરી દેવામાં આવી છે. હિશ્રો પર ઉતરવા માટે તૈયાર ફ્લાઇટ્સને પણ ડાયવર્ટ કરી દેવામાં આવી છે. એરપોર્ટ કંટ્રોલ ટાવર પણ સંપુર્ણ ઠપ્પ થઇ જતા તમામ ફ્લાઇટ્સને રદ્દ કરવાની ફરજ પડી છે. લંડનનું ફાયર બ્રિગેડ પણ દુર્ઘટના બાદ તત્કાલ એક્શનમાં આવી ગયું છે. ફાયર બ્રિગેડે કહ્યું કે, 10 ફાયરની ગાડીઓ અને આશરે 70 અગ્નિશામક કર્મચારીઓ સતત કામગીરી કરી રહ્યા છે. 200 મીટરના વિસ્તારની ઘેરાબંધી કરી દેવામાં આવી છે. સ્થાનિક લોકોને પોતાના ઘરના બારી દરવાજા બંધ રાખવા માટે અથવા તો ઘર ખાલી કરી દેવા માટે સુચના આપવામાં આવી છે.
હિથ્રો એરપોર્ટે તમામ યાત્રીઓને સલાહ આપી છે કે, એરપોર્ટની યાત્રા કરવાનું ટાળે અને પોતાની ફ્લાઇટ હોય તો સંબંધિત માહિતી માટે એરલાઇન્સ કંપનીનો સંપર્ક કરે એરપોર્ટ તંત્ર સતત સમગ્ર પરિસ્થિતિ પર નજર રાખી રહ્યું છે. ઝડપથી સેવાઓ ફરી શરૂ કરવા માટે પ્રતિબદ્ધ છે. ફ્લાઇટ ટ્રેકિંગ વેબસાઇટ ફ્લાઇટ રડાર 24 અનુસાર અનેક ઉડ્યનોને ડાયવર્ટ થવા માટેની સુચના આપવામાં આવી છે.