ઉત્તર પ્રદેશના એટામાં એક વ્યક્તિએ ૮ વખત મતદાન કર્યું હોવાનો દાવો કર્યા બાદ હવે સંબંધિત મતદાન કેન્દ્ર પર ફરીથી મતદાન કરવામાં આવશે. દરમિયાન મતદાન કરનાર વ્યક્તિની ધરપકડ કરવામાં આવી છે. ચૂંટણી પંચે આ મતદાન મથક પર ફરી મતદાન કરવાની ભલામણ કરી છે. આ સાથે પોલિંગ પાર્ટીના તમામ સભ્યોને સસ્પેન્ડ કરવામાં આવ્યા છે. સમાજવાદી પાર્ટીએ આરોપી યુવક સગીર હોવાનું જણાવ્યું છે.
ઉત્તર પ્રદેશના એટાના આ મતદાન મથક પર, એક વ્યક્તિએ દાવો કર્યો હતો કે તેણે ૮ વખત મતદાન કર્યું છે. તેણે આનો એક વીડિયો પણ બનાવ્યો હતો, જે સોશિયલ મીડિયા પર ઝડપથી વાયરલ થઈ રહ્યો છે. આ વાત કોંગ્રેસ નેતા રાહુલ ગાંધી અને સપા ચીફ અખિલેશ યાદવે પણ શેર કર્યો છે.
કોંગ્રેસ નેતા રાહુલ ગાંધીએ પણ આ મામલે પોતાની પ્રતિક્રિયા આપી છે. તેમણે X.com પર લખ્યું હતું કે, ભાજપ પોતાની હાર સામે જોઈને જનાદેશને નકારવા માટે સરકારી તંત્ર પર દબાણ લાવી લોકશાહી લૂંટવા માંગે છે. કોંગ્રેસ ચૂંટણી ફરજ બજાવતા તમામ અધિકારીઓ પાસેથી અપેક્ષા રાખે છે કે તેઓ સત્તાના દબાણમાં તેમની બંધારણીય જવાબદારીઓ ભૂલી ન જાય. નહિંતર, ભારતની સરકાર બનતાની સાથે જ એવી કાર્યવાહી કરવામાં આવશે કે ભવિષ્યમાં કોઈ પણ વ્યક્તિ ‘બંધારણના શપથ’નું અપમાન કરતા પહેલા ૧૦ વાર વિચાર કરે.
વીડિયોમાં એક યુવક ઈવીએમ પાસે ઉભો છે. આ વીડિયોમાં તે ૮ વખત વોટ કર્યાનો દાવો કરી રહ્યો છે. સમાજવાદી પાર્ટીના વડા અખિલેશ યાદવે સોશિયલ મીડિયા એકાઉન્ટ X પર વીડિયો શેર કર્યો છે. આને સાથે લખ્યું છે કે ‘જો ચૂંટણી પંચને લાગે છે કે આ ખોટું થયું છે તો તેણે કંઈક પગલાં લેવા જોઈએ, નહીંતર… ભાજપની બૂથ કમિટી ખરેખર તો લૂંટ કમિટી છે.
