સામાન્ય રીતે સંતાન જન્મે એટલે પરિવારમાં ખુશી છવાઈ જતી હોય છે, પરંતુ મધ્યપ્રદેશના છતરપુર જિલ્લાના લવકુશનગરમાં એક પરિવારમાં સંતાન જન્મતા જ લોકોને આંચકો ખમવો પડ્યો હતો. આશ્ચર્યની સાથે સાથે ડરી પણ જવાય એવા એ બાળકને ચાર હાથ અને ચાર પગ છે ! એ ઓછું હોય એમ એ નવજાતના છાતી – પેટના ઉપરના ભાગે વધારાનું ધડ પણ જોડાયેલું જોવા મળે છે.
મળતી માહિતી મુજબ, લવકુશનગર સામુદાયિક આરોગ્ય કેન્દ્રમાં હરદ્વાર ગામની 29 વર્ષીય નીતા અહિરવારે બાળકને જન્મ આપ્યો હતો. જન્મ સમયે બાળકનું વજન આશરે 3 કિલોગ્રામ હતું. પ્રાથમિક તપાસમાં તેના ચાર હાથ અને ચાર પગ ઉપરાંત શરીરના ઉપરના ભાગ સાથે એક વધારાનો ધડ જોડાયેલો દેખાયો હતો. હાલ માતા અને નવજાતની સ્થિતિ પર તબીબી ટીમ સતત નજર રાખી રહી છે.
ડોક્ટરોના મતે આ સામાન્ય શારીરિક વિસંગતિ નથી, પરંતુ જોડિયા ભ્રૂણના અધૂરા વિકાસ સાથે સંકળાયેલો અત્યંત દુર્લભ કેસ હોઈ શકે છે. તબીબી ભાષામાં તેને હેટેરોપેગસ અથવા પરાસિટિક કન્જોઇન્ડ ટ્વિન સાથે સંબંધિત સ્થિતિ તરીકે જોવામાં આવે છે. આવી સ્થિતિમાં એક ભ્રૂણ પ્રમાણમાં વિકસિત થાય છે, જ્યારે બીજું ભ્રૂણ સંપૂર્ણ રીતે વિકસતું નથી અને તેના શરીરના કેટલાક ભાગો વિકસિત ભ્રૂણ સાથે જોડાયેલા રહી શકે છે.
જોકે, બાળકના શરીરમાં વધારાના અંગો મુખ્ય શરીરની રક્તવાહિનીઓ અથવા આંતરિક અંગો સાથે કેટલા પ્રમાણમાં જોડાયેલા છે, તે અંગે હજુ ચોક્કસ માહિતી ઉપલબ્ધ નથી. આ માટે વધુ વિગતવાર નિદાન અને વિશેષજ્ઞોની તપાસ જરૂરી રહેશે. આવા કેસમાં સર્જરીનો નિર્ણય સંપૂર્ણ તપાસ બાદ જ લેવામાં આવે છે.
બાળકને વધુ સઘન અને નિષ્ણાત સારવાર મળી રહે તે માટે તેને છતરપુરથી ઉચ્ચ તબીબી કેન્દ્રમાં મોકલવાની તૈયારી કરવામાં આવી રહી છે. તંત્ર અને આરોગ્ય વિભાગ દ્વારા તેને એર એમ્બ્યુલન્સ મારફતે જબલપુર મોકલવાની વ્યવસ્થા અંગે કાર્યવાહી ચાલી રહી હોવાનું અહેવાલોમાં જણાવાયું છે.
