ઇઝરાયલે ઇરાનની રાજધાની તેહરાન સહિત અનેક શહેરો પર હુમલો કર્યો છે. ભારતીય સમય મુજબ શનિવારે સવારે તેહરાન સહિત અનેક શહેરોમાં ધડાકા સંભળાયા છે અને હવાઈ હુમલાના સાયરન વાગી રહ્યા છે.
અત્યાર સુધી તેહરાનમાં જે સ્થળો પર હુમલાના સમાચાર છે, તેમાં ગુપ્તચર મંત્રાલય, સંરક્ષણ મંત્રાલય, સુપ્રીમ લીડર ખામેનીની ઓફિસ અને ઇરાનનું પરમાણુ ઊર્જા સંગઠન સામેલ છે. હુમલા બાદ ખામેનીને સુરક્ષિત સ્થળે ખસેડવામાં આવ્યા છે. ઇરાને પણ ઇઝરાયલ પર જવાબી હુમલા શરૂ કર્યા છે. મીડિયા રિપોર્ટ મુજબ, ઇરાને વળતો પ્રહાર કરતા લગભગ 400 મિસાઇલો છોડી છે.
ઈરાનનો પલટવાર, કતાર, બહેરીન સહિત આ 7 દેશોમાં અમેરિકી સૈન્ય ઠેકાણાઓ પર મિસાઈલો છોડી
ઈરાને પોતાના પર થયેલા હુમલાઓનો વળતો પ્રહાર શરૂ કરી દીધો છે. ઈરાને કતાર, બહેરીન અને કુવૈત જેવા સાત દેશો પર હુમલો કર્યો છે. ઈરાન આ દેશોમાં અમેરિકાના બેઝને નિશાન બનાવી રહ્યું છે. હુમલાઓની તસવીરો ડરાવી દે તેવી છે. તેજ ધડાકા સ્પષ્ટ દેખાઈ રહ્યા છે. રાહદારીઓએ આ હુમલાઓના વીડિયો બનાવીને સોશિયલ મીડિયા પર જાહેર કર્યા છે. ઈરાને જે દેશોને નિશાન બનાવ્યા છે તેમાં કતાર, બહેરીન, કુવૈત, સાઉદી, જોર્ડન અને અબુ ધાબીનો સમાવેશ થાય છે. હુમલાના વીડિયો ખૂબ જ ભયાવહ છે. તેમાં આગના ગોળા અને ધુમાડાને સ્પષ્ટ જોઈ શકાય છે.
સૂત્રોએ અહેવાલ આપ્યો છે કે ઈરાની મિસાઈલોએ ઈઝરાયલના હાઈફા બંદર પર હુમલો કર્યો છે, જેના કારણે બંદરને નોંધપાત્ર નુકસાન થયું છે. ઈઝરાયલ સંરક્ષણ દળોએ તાજેતરમાં એક નિવેદન બહાર પાડ્યું હતું જેમાં કહેવામાં આવ્યું હતું કે, “થોડા સમય પહેલા, IDF એ ઈરાનથી ઈઝરાયલી પ્રદેશ તરફ છોડવામાં આવેલી મિસાઈલોને અટકાવી હતી.”
તેમણે લોકોને હોમ ફ્રન્ટ કમાન્ડની સૂચનાઓનું પાલન કરવા વિનંતી કરી. “આ સમયે, ઇઝરાયેલી વાયુસેના ખતરાને કાબુમાં લેવા અને ખતરાને દૂર કરવા માટે જરૂરી હોય ત્યાં હુમલો કરવા માટે કામ કરી રહી છે,” તેમણે કહ્યું. “સંરક્ષણ સંપૂર્ણપણે સુરક્ષિત નથી, અને તેથી લોકો હોમ ફ્રન્ટ કમાન્ડની માર્ગદર્શિકાનું પાલન કરવાનું ચાલુ રાખે તે મહત્વપૂર્ણ છે.”
ઈરાનનો બહેરીન પર હુમલો
બહેરીનની રાજધાની મનામામાં વિસ્ફોટો સંભળાયા હતા, જ્યાં યુએસ નેવીના પાંચમા ફ્લીટનું મુખ્ય મથક આવેલું છે. બહેરીનના ગૃહ મંત્રાલયે X પર શ્રેણીબદ્ધ ચેતવણીઓ જારી કરી હતી, જેમાં કહેવામાં આવ્યું હતું કે કટોકટીના સાયરન વગાડવામાં આવ્યા છે. તેણે લોકોને શાંત રહેવા અને નજીકના સલામત સ્થળે જવાની પણ વિનંતી કરી હતી.
ઈરાને કતાર પર પણ મિસાઈલ છોડી હતી
કતાર મધ્ય પૂર્વમાં સૌથી મોટું યુએસ લશ્કરી મથક ધરાવે છે. ઈરાને આ મથકને નિશાન બનાવીને અનેક મિસાઇલો છોડી છે. જોકે, કતારે જણાવ્યું છે કે તેણે મોટાભાગની ઇરાની મિસાઇલોને અટકાવી દીધી છે. જોકે, સોશિયલ મીડિયા પર ઘણા વીડિયો ફરતા થઈ રહ્યા છે જેમાં જમીન પર મોટા પાયે વિનાશ જોવા મળી રહ્યો છે. જોકે, આ વીડિયોની સત્યતાની હજુ પુષ્ટિ થઈ નથી.
યુએઈ અને કુવૈતે પણ ઈરાની હુમલાની પુષ્ટિ કરી છે.
યુએઈ અને કુવૈતે પણ ઈરાની મિસાઈલ હુમલાની જાણ કરી છે. જોકે, ઈરાની હુમલાથી કોઈ નોંધપાત્ર નુકસાનના અહેવાલ નથી. ઈરાન એવા બધા દેશોને નિશાન બનાવી રહ્યું છે જ્યાં યુએસ લશ્કરી થાણાઓ સ્થિત છે.
