અફઘાનિસ્તાન ક્રિકેટ ટીમે ઇતિહાસ રચ્યો છે. બાંગ્લાદેશને હરાવી અફઘાનિસ્તાન ટી૨૦ વર્લ્ડ કપ ૨૦૨૪ સેમી ફાઇનલમાં પહોંચ્યું છે. અફઘાનિસ્તાન વર્લ્ડ કપ ક્રિકેટમાં પહેલી વખત સેમી ફાઇનલમાં પહોંચ્યું છે. અફઘાનિસ્તાનની જીત સાથે બીજો મોટો અપસેટ એ થયો છે કે, ઓસ્ટ્રેલિયા વર્લ્ડ કપ ૨૦૨૪ ટુર્નામેન્ટમાંથી બહાર ફેંકાયું છે.
T૨૦ વર્લ્ડ કપ ૨૦૨૪ અફઘાનિસ્તાન ક્રિકેટ ટીમે મોટો અપસેટ સર્જ્યો છે. બાંગ્લાદેશ સામેની મેચમાં ભારે રસાકસી અને વરસાદી માહોલ વચ્ચે બાંગ્લાદેશને હરાવી T૨૦ વર્લ્ડ કપ ૨૦૨૪ સેમી ફાઇનલમાં સ્થાન મેળવ્યું છે. અફઘાનિસ્તાન ટીમ માટે આ પહેલી વખત છે કે તેઓ સેમી ફાઇનલ સુધી પહોંચ્યા છે.
ICC મેન્સ T૨૦ વર્લ્ડ કપ ૨૦૨૪માં સુપર-૮ની છેલ્લી મેચમાં બાંગ્લાદેશ અને અફઘાનિસ્તાન વચ્ચે રોમાંચક મેચ રમાઈ હતી. બંને ટીમો વચ્ચેની આ મેચ કિંગ્સટાઉનના આર્નોસ વેલ ગ્રાઉન્ડમાં રમાઈ હતી. આ મેચમાં અફઘાનિસ્તાનની ટીમે બાંગ્લાદેશને ૮ રને હરાવીને સેમી ફાઇનલમાં જગ્યા બનાવી લીધી છે. બાંગ્લાદેશને આ મેચ જીતવા માટે ૧૧૪ (DLS)નો ટાર્ગેટ હતો. પરંતુ નવીન ઉલ હકે સતત ૨ વિકેટ ઝડપીને મેચ અફઘાન ટીમની તરફેણમાં ફેરવી દીધી હતી. આ જ મેચમાં કેપ્ટન રાશિદ ખાને ૪ વિકેટ ઝડપીને બાંગ્લાદેશની કમર તોડી નાખી હતી.
ટોસ જીતીને પ્રથમ બેટિંગ કરતા અફઘાનિસ્તાને પાંચ વિકેટ ગુમાવીને ૧૧૫ રન બનાવ્યા હતા. અફઘાન ટીમની શરૂઆત ઘણી ધીમી રહી હતી. ઈબ્રાહિમ ઝદરાન અને રહેમાનુલ્લા ગુરબાઝે ૧૦.૪ ઓવરમાં ૫૪ રનની પાર્ટનરશીપ કરી હતી. મેચમાં ગુરબાઝ અને ઝદરાન પાવરપ્લેનો ફાયદો ઉઠાવી શક્યા ન હતા. લેગ સ્પિનર રિશાદ હુસૈને ઝદરાનને આઉટ કરીને આ પાર્ટનરશીપ તોડી હતી. ત્યારબાદ અફઘાનિસ્તાને નિયમિત અંતરે વિકેટો ગુમાવી હતી.
આ પણ વાંચો :-