કેરળના મુખ્યમંત્રીના કાફલાને નડ્યો અકસ્માત!

કેરળમાં મુખ્યમંત્રીના કાફલામાં સામેલ કેટલીક કાર અકસ્માતનો ભોગ બની હતી. કેરળના મુખ્યમંત્રીનો કાફલો રાજધાની તિરુવનંતપુરમના વામનપુરમ વિસ્તારમાંથી પસાર થઈ રહ્યો હતો. દરમિયાન, એક સ્કૂટર સવાર કાફલાને એસ્કોર્ટ કરતા વાહનની સામે આવ્યો. સ્કૂટર સવાર રોડ ક્રોસ કરવાનો પ્રયાસ કરી રહ્યા હતા. ત્યારબાદ એસ્કોર્ટ વાહને તેને બચાવવા માટે અચાનક બ્રેક લગાવી દીધી હતી. આ પછી, કાફલાની પાછળ આવતી કાર એક પછી એક એકબીજા સાથે અથડાઈ હતી.

કેરળના સીએમ પિનરાઈ વિજયનના કાફલા સાથે કારની ટક્કરનો વીડિયો સોશિયલ મીડિયા પર વાયરલ થઈ રહ્યો છે. એક મહિલા સ્કૂટર ચલાવી રહી હતી. જે અચાનક જમણી તરફ વળી હતી. જે બાદ ડ્રાઈવરે તરત જ સફેદ રંગની SUV પર બ્રેક લગાવી દીધી. આ પછી, 5 એસ્કોર્ટ વાહનો અને પાછળ દોડતી એમ્બ્યુલન્સ એકબીજા સાથે અથડાઈ હતી. એવું કહેવામાં આવી રહ્યું છે કે મુખ્યમંત્રી રાજધાનીથી 150 કિલોમીટર દૂર કોટ્ટાયમની મુલાકાત લઈને પરત ફરી રહ્યા હતા. અકસ્માત બાદ તરત જ તેમના સુરક્ષાકર્મીઓ વાહનોમાંથી નીચે ઉતરી આવ્યા હતા અને પરિસ્થિતિને કાબુમાં લીધી હતી. વળી, વીડિયોમાં, મેડિકલ સ્ટાફના ઘણા સભ્યો પણ એમ્બ્યુલન્સમાંથી બહાર નીકળતા જોવા મળે છે. પોલીસ હજુ સુધી મહિલા ટુ-વ્હીલર ચાલકની ઓળખ થઇ નથી. પોલીસનું કહેવું છે કે મહિલા વિશે માહિતી મેળવવા માટે તપાસ કરવામાં આવી રહી છે.

પોલીસે અકસ્માતમાં સંભવિત ક્ષતિ કે બેદરકારીને ઓળખવા માટે ઝીણવટભરી તપાસ શરૂ કરી છે. આ દુર્ઘટનાથી તમામ એજન્સીઓને એલર્ટ કરી દેવામાં આવી છે અને સુરક્ષા વ્યવસ્થાની સમીક્ષા કરવામાં આવી રહી છે. આ એક ગંભીર ઘટના હતી, જેમાં એક સ્કૂટર ચાલક મુખ્યમંત્રીના કાફલાની સામેથી ધ્યાન વગર પસાર થઈ રહ્યો હોવાનું જોવા મળ્યું હતું. આ અકસ્માતમાં સ્કૂટર ચાલકને કંઈ થયું ન હતું અને તે સુરક્ષિત નીકળી ગયા હતા.