સુરત મહાનગરપાલિકા (SMC) દ્વારા વેરા વસૂલાતની કામગીરી ઝડપી કરવામાં આવી છે. શહેરના પોશ વિસ્તાર ગણાતા સાઉથ-વેસ્ટ (અઠવા) ઝોનમાં બાકીદારો સામે મનપાએ કડક કાર્યવાહી હાથ ધરી છે. મંગળવારે હાથ ધરવામાં આવેલી ઝુંબેશ દરમિયાન પાલિકાની ટીમે વિવિધ વિસ્તારોમાં કુલ 168 જેટલી મિલકતોને સીલ મારી દીધી હતી. આ સાથે જ રૂપિયા 70 લાખથી વધુની વસૂલાત કરી હતી.
સુરત મહાનગરપાલિકાના સાઉથ-વેસ્ટ (અઠવા) ઝોનના આકારણી અને વસૂલાત વિભાગ દ્વારા 17 ફેબ્રુઆરી, 2026ના રોજ એક વિશેષ ડ્રાઈવનું આયોજન કરવામાં આવ્યું હતું. આ કામગીરી હેઠળ અઠવાલાઇન્સ, વેસુ, ડુમસ, ભટાર, મજુરા, અલથાણ, સિટીલાઇટ તેમજ ભીમરાડ જેવા વિસ્તારોમાં ટીમો ત્રાટકી હતી. જે મિલકતદારો લાંબા સમયથી વેરો ભરપાઈ કરવામાં આનાકાની કરી રહ્યા હતા, તેમની સામે સ્થળ પર જ કાર્યવાહી કરવામાં આવી હતી.
પાલિકાની આ કડક કાર્યવાહીને પગલે અનેક બાકીદારોમાં ફફડાટ વ્યાપી ગયો હતો. જેવી મિલકતો સીલ કરવાની પ્રક્રિયા શરૂ થઈ, કે તુરંત જ અનેક મિલકતદારોએ બાકી લેણાં ચૂકવવાની તૈયારી બતાવી હતી. મળતી માહિતી મુજબ, આ ઝુંબેશ દરમિયાન મનપાએ એક જ દિવસમાં કુલ ₹70,67,183 (સિત્તેર લાખ સડસઠ હજાર એકસો ત્યાસી રૂપિયા)ની રોકડ વસૂલાત કરી હતી.
સાઉથ-વેસ્ટ ઝોન દ્વારા સતત વસૂલાત પર ધ્યાન કેન્દ્રિત કરવામાં આવ્યું છે. કડક વસૂલાત અને ઝુંબેશના કારણે ચાલુ નાણાકીય વર્ષમાં આજ દિન સુધીમાં આ ઝોન દ્વારા કુલ ₹189.54 કરોડની આવક મેળવવામાં સફળતા મળી છે. હજુ પણ માર્ચ મહિના સુધી આ કામગીરી વધુ તેજ બનાવવામાં આવશે તેવા સંકેતો મળી રહ્યા છે.
