દક્ષિણ ગુજરાતની સૌથી મોટી સુમુલ ડેરીએ પશુપાલકોને બોનસ આપવાની જાહેરાત કરી છે. આ નિર્ણયથી સુરત અને તાપી જિલ્લાના પશુપાલકોમાં આનંદમાં આવી ગયા છે. સુમુલ ડેરીએ પશુપાલકોને પ્રતિ કિલો ફેટ દીઠ 120 રૂપિયા બોનસ આપવાનું નક્કી કર્યું છે. સુમુલ ડેરીના વહીવટકર્તાઓનો દાવો છે કે, આ ભાવ સમગ્ર ગુજરાતમાં સૌથી વધુ છે.
ગયા નાણાકીય વર્ષ દરમિયાન સુમુલ ડેરી દ્વારા પશુપાલકોને સરેરાશ પ્રતિ કિલો ફેટ 870 રૂપિયા ચૂકવવામાં આવ્યા હતા. ત્યારબાદ બીસીયુ ફેટફેર પેટે અંદાજિત 30 રૂપિયા પ્રતિ કિલો ફેટ આપવામાં આવ્યા હતા. હવે તેમાં 120 રૂપિયા બોનસ ઉમેરાતા પશુપાલકોને પ્રતિ કિલો ફેટ દીઠ કુલ 1,020 રૂપિયા મળશે.
સુમુલ ડેરી દ્વારા કરવામાં આવેલા આ ઐતિહાસિક નિર્ણયના પગલે કુલ 425 કરોડ રૂપિયાની આ માતબર રકમ પશુપાલકોને બેન્ક એકાઉન્ટમાં જમા કરાશે. આગામી જૂન મહિનામાં પશુપાલકોના બેંક ખાતામાં આ રકમ સીધી ટ્રાન્સફર કરવામાં આવશે. સંસ્થાના મજબૂત નેતૃત્વ અને પારદર્શક વહીવટને કારણે આટલું મોટું બોનસ આપવું શક્ય બન્યું હોવાનું મનાઈ રહ્યું છે.
સુમુલના પૂર્વ ડિરેક્ટર અને ખેડૂત આગેવાન જયેશ દેલાડએ આ નિર્ણયને આવકારતા જણાવ્યું હતું કે, આઝાદી કાળથી વડીલોના આશીર્વાદથી શરૂ થયેલી આ સંસ્થા આજે વટવૃક્ષ બની છે. ગુજરાતમાં પ્રથમ હરોળનું બોનસ આપીને સુમુલે સાબિત કર્યું છે કે તે પશુપાલકોના હિત માટે કટિબદ્ધ છે. તેમણે ઉમેર્યું કે 1000 રૂપિયાથી વધુનો ભાવ મળવો એ પશુપાલકો માટે ગૌરવની વાત છે.
ભારત સરકારના ‘સહકારથી સમૃદ્ધિ’ના સૂત્રને સુમુલ ડેરી સાર્થક કરી રહી હોવાનું જણાવતા જયેશ દેલાડએ ઉમેર્યું કે, અમૂલની સ્થાપના બાદ દક્ષિણ ગુજરાતમાં સુમુલનો અભૂતપૂર્વ વિકાસ થયો છે. આજે અઢી લાખથી વધુ પરિવારોનું ગુજરાત ચલાવતી આ સંસ્થાની જે પ્રગતિ પાછળ પશુપાલકોએ પુરૂ પાડેલું મજબૂત નેતૃત્વ છે. આ ભાવફેર બોનસ ખેડૂતો માટે આશીર્વાદ સમાન સાબિત થશે.
