અમદાવાદની મ્યુનિસિપલ કોર્પોરેશન સંચાલિત વાડીલાલ સારાભાઈ (VS) હોસ્પિટલમાં ક્લિનિકલ ટ્રાયલમાં 3નાં મોત થયાનો ગંભીર આક્ષેપ કોંગ્રેસના કોર્પોરેટર રાજશ્રી કેસરીએ કર્યો છે. 500થી વધારે દર્દીઓ પર ટ્રાયલ કરવામાં આવી હતી. ચાંદખેડા વોર્ડના કોંગ્રેસનાં કોર્પોરેટર રાજશ્રીબેન કેસરીએ દિવ્ય ભાસ્કર સાથેની વાતચીતમાં જણાવ્યું હતું કે મ્યુનિસિપલ કોર્પોરેશન દ્વારા જણાવવામાં આવ્યું છે કે ક્લિનિકલ રિસર્ચ મામલે કોઈ એથિકલ કમિટીની રચના કરવામાં આવી નથી પરંતુ મારી પાસે ક્લિનિકલ રિસર્ચ માટે હોસ્પિટલે કરેલા MOUની કોપી છે. જેમાં વીએસ હોસ્પિટલના ડીન ડો. પારુલ શાહની સહી પણ છે. ડો. દેવાંગ રાણાને NHL કોલેજના ડીન દ્વારા ક્લિનિકલ રિસર્ચ માટે નિમણૂક કરવામાં આવ્યા છે જેનો ઓર્ડર પણ છે.
રાજશ્રીબેન કેસરીએ આક્ષેપ કર્યો છે કે વી.એસ.હોસ્પિટલના સુપ્રિટેન્ડન્ટથી લઈ તમામ અધિકારીઓને આ બાબતોની જાણ હતી. 500થી વધારે દર્દીઓ ઉપર ક્લિનિકલ ટ્રાયલ થયું છે અને મારી જાણમાં આવ્યું છે ત્યાં સુધી ત્રણ દર્દીઓના મૃત્યુ પણ થયા છે જે અંગે અત્યારે અમે હાલમાં તપાસ કરી રહ્યા છીએ. ક્લિનિકલ રિસર્ચ વિભાગના વડા ડો. દેવાંગ રાણાએ જાન્યુઆરી મહિનામાં પણ પત્ર લખ્યો હતો. ડો. દેવાંગને વી.એસ.હોસ્પિટલના સુપ્રીટેન્ડન્ટ ડો. પારુલ શાહ અને ડો. ચેરી શાહ માનસિક હેરાન કરી રહ્યાં છે. તેઓના કૌભાંડને છાવરવા માટે ડો. દેવાંગ રાણાનો ભોગ લેવામાં આવ્યો છે. ખોટા વ્યક્તિને આશરો આપી રહ્યા છે. પ્રેસ કોન્ફરન્સમાં જે માહિતી આપવામાં આવી હતી તે સદંતર ખોટી આપવામાં આવી છે.
દેવાંગ રાણાએ ખુલાસો કર્યો છે જેમાં તેણે જણાવ્યું છે કે મારી કામગીરી માત્ર ક્લિનિકલ રિસર્ચ ટ્રાયલ એગ્રીમેન્ટ મુજબ થયું છે કે નહીં તે અંગે જોવાની છે. કોઈપણ નાણાકીય વ્યવહારો કરવાની જવાબદારી મારી નથી. નાણાની વહેંચણી સુપ્રિટેન્ડેન્ટના જ આદેશ મુજબ થઈ છે. હોસ્પિટલમાં જેટલા પણ ટ્રાયલ કરવામાં આવ્યા છે તે તમામની માહિતી હોસ્પિટલના સુપ્રિટેડન્ટના જાણમાં મૂકવામાં આવી છે. ક્લિનિકલ ટ્રાયલ વી.એસ. હોસ્પિટલના સુપ્રિટેન્ડન્ટની જાણમાં જ થયા છે. જે અંગેની ખરાઈ NHL મેડિકલ કોલેજના ફાર્મોકોલોજી વિભાગના વડા ડો. સુપ્રિયા મલ્હોત્રા દ્વારા કરવામાં આવી છે. જે પૈસા મારા ખાતામાં જમા થયા છે તે પૈસા મારા મહેનતાણાના પૈસા છે. તમામ એકાઉન્ટમાં હું જોઈન્ટ હોલ્ડર જ છું.
