સોમવારની સવાર ભારતીય શેરબજાર માટે કોઈ આંચકાથી ઓછી નહોતી. સોમવારે વહેલી સવારે ભારતીય શેરબજારમાં ભારે વેચવાલી થવાને કારણે, રોકાણકારોને શરૂઆતના કારોબારમાં જ 12 લાખ કરોડ રૂપિયાથી વધુનું નુકસાન થવાની આશંકા છે. બેન્ચમાર્ક સૂચકાંકો ભારે વેચાણ દબાણ સાથે ખુલ્યા. સેન્સેક્સ 2,320 પોઈન્ટ ઘટીને 76,598 પર પહોંચી ગયો, જ્યારે નિફ્ટી લગભગ 700 પોઈન્ટ ઘટીને 23,764 પર પહોંચી ગયો. બેંક નિફ્ટીમાં પણ 2,288 પોઈન્ટનો ભારે ઘટાડો નોંધાયો. શરૂઆતના કારોબારમાં ડોલર સામે રૂપિયો પણ 43 પૈસા ઘટીને 92.25 પર પહોંચી ગયો.
શેરબજારમાં કડકાથી રોકાણકારોને અધધધ ₹ 12 લાખ કરોડનું નુકસાન
શેરબજારમાં કડકાથી રોકાણકારોને જંગી નુકસાન થયું છે. સેન્સેક્સમાં 2400 પોઇન્ટ અને નિફ્ટીમાં 700 પોઇન્ટનો કડાકો બોલાયો છે. શેરબજારમાં સાર્વત્રિક વેચવાલીથી આજે ઓપનિંગ સેશનમાં બીએસઇ પર લિસ્ટેડ કંપનીઓની કૂલ માર્કેટકેપ 437.18 લાખ કરોડ રૂપિયા થઇ હતી, જે ગત શુક્રવારે 449.79 લાખ કરોડ રૂપિયા થઇ હતી. આમ સોમવારે શેરબજારના રોકાણકારોને અધધધ… 12 લાખ કરોડ રૂપિયાનું નુકસાન થયું છે.
ક્રૂડ ઓઇલમાં ભડકો, 1 બેરલનો ભાવ 115 ડોલર પાર
ઈઝરાયલ ઇરાન યુદ્ધથી ક્રૂડ ઓઇલમાં ભડકો થયો છે અને 1 બેરલનો ભાવ 115 ડોલરને વટાવી ગયો છે, જે સાડા 3 વર્ષની સૌથી ઉંચી સપાટી છે. મિડલ ઇસ્ટમાં યુદ્ધના પગલે ખાડી દેશોમાં ક્રૂડ ઓઇલનું ઉત્પાદન ઘટ્યું છે, જેના પરિણામ ભાવ સતત વધી રહ્યા છે. બ્રેન્ટ ક્રૂડ વાયદો 22 ટકા વધી 115 ડોલર બેરલ આસપાસ ટ્રેડિંગ કરી રહ્યું છે. તો યુએસ ક્રૂડ ફ્યૂચરનો ભાવ 27 ટકા ઉછળી 115.2 ડોલર પ્રતિ બેરલ બોલાય છે. યુએસ ક્રૂડ ફ્યૂચર પાછલા સપ્તાહમાં 35 ટકા ઉછળ્યો છે, જે વર્ષ 1983માં આ ક્રૂડ વાયદામાં ટ્રેડિંગ શરૂ થયા પછીનો સૌથી મોટો ઉછાળો છે. તો પાછલા અઠવાડિયે બ્રેન્ટ ક્રૂડ વાયદો 28 ટકા ઉછળ્યો છે, જે એપ્રિલ 2020 પછીનો સૌથી મોટો ઉછાળો છે.
એશિયન શેરબજારોમાં હાહાકાર, જાપાન માર્કેટ 3600 પોઇન્ટ ધડામ
ક્રૂડ ઓઇલમાં ભડાકાની આગ દુનિયાભરના શેરબજારોને દઝાડી રહી છે. જાપાનીઝ શેરબજારમાં 3640 પોઇન્ટનો કડાકો બોલાયો છે. તાઇવાન બજાર 1767 પોઇન્ટ, કોરિયા 407 પોઇન્ટ, જકાર્તા માર્કેટ 300 પોઇન્ટ તૂટ્યા છે. ભારતનો ગિફ્ટ નિફ્ટી ઇન્ડેક્સમાં 800 પોઇન્ટનો કડાકો બોલાયો છે.
