ચૂંટણી પૂરી થયા બાદ પેટ્રોલ- ડીઝલના ભાવ વધશે જ એવી અટકળો હતી જ અને એ સાચી પડી છે. હવે પેટ્રોલ અને ડીઝલના ભાવમાં લિટર દીઠ 3 રૂપિયાનો વધારો કરવામાં આવ્યો છે. આ ભાવ વધારા સાથે જ અન્ય ચીજોના ભાવ પણ વધશે જ અને મોંઘવારી વિકરાળ બનશે. જો કે જે રીતે ક્રૂડના ભાવમાં વધારા બાદ પેટ્રોલિયમ કંપનીઓને ભારે ખોટ ભોગવવી પડી રહી છે, એ જોતાં આ વધારો છેલ્લો નહીં જ હોય. હજુ થોડા થોડા કરીને ભાવ વધારો થતો રહેશે.
દિલ્હીમાં, પેટ્રોલ હવે લિટરે 94.77 ને બદલે 97.77 રૂપિયાના ભાવે મળશે. જ્યારે ડીઝલના ભાવ લિટરે 87.67 થી વધીને 90.67 રૂપિયા થયા છે. નવા ભાવ આજથી, 15 મેના રોજ અમલમાં આવ્યા છે.
પેટ્રોલ અને ડીઝલના ભાવમાં વધારાનું મુખ્ય કારણ આંતરરાષ્ટ્રીય બજારમાં ક્રૂડ ઓઇલના ભાવમાં વધઘટ છે. ઈરાન અને અમેરિકા વચ્ચેના યુદ્ધ પહેલા ક્રૂડ ઓઇલના ભાવ પ્રતિ બેરલ 70 ડોલર હતા, જે હવે વધીને બેરલે 100 ડોલર થઈ ગયા છે. જો કે કોરોનાના સમયે ક્રૂડના ભાવ સાવ ઓછા થઈ ગયા હતા, એમ છતાં પેટ્રોલિયમ કંપનીઓએ ઊંચા ભાવે જ આપણને પેટ્રોલ અને ડીઝલ વેચ્યા હતા, ત્યારે હવે તેઓ લાંબા સમય સુધી કેમ ખોટ સહન કરી શકતી નથી ?
ક્રૂડ ઓઇલના ભાવમાં વધારો થવાને કારણે તેલ કંપનીઓ દબાણ હેઠળ હતી. તેથી, કંપનીઓએ તેમના નુકસાનને પહોંચી વળવા માટે આ પગલું ભર્યું છે. જો લાંબા સમય સુધી ક્રૂડ ઓઇલના ભાવ ઊંચા રહેશે, તો પેટ્રોલ અને ડીઝલના ભાવમાં વધુ વધારો થઈ શકે છે.
