મુખ્ય વૈશ્વિક મુદ્દાઓ પર ચર્ચા કરવા માટે G7 સમિટ માટે ફ્રાન્સના એવિયન શહેરમાં વિશ્વ નેતાઓ એકઠા થઈ રહ્યા છે, ત્યારે ઔપચારિક બેઠકો અને નીતિગત ચર્ચાઓની બહાર એક વિડિઓ પર ચર્ચા થઈ રહી છે. ઇટાલીના વડા પ્રધાન જ્યોર્જિયા મેલોની અને વડા પ્રધાન નરેન્દ્ર મોદી વચ્ચેની બીજી એક રમુજી વાતચીતે બધાનું ધ્યાન ખેંચ્યું છે.

જ્યારે નેતાઓ શિખર સંમેલનમાં પરંપરાગત ગ્રુપ ફોટો માટે ભેગા થયા, ત્યારે મેલોની અને પીએમ મોદી એકબીજાને ઉષ્માભર્યું અભિવાદન કરતા જોવા મળ્યા. મેલોની પીએમ મોદીને કહેતા સાંભળવામાં આવ્યા, “તમને ફરીથી જોઈને આનંદ થયો.”

સોશિયલ મીડિયા પર “મેલોડી” ટ્રેન્ડનો ઉલ્લેખ કરતા, પીએમ મોદીએ ઇન્સ્ટાગ્રામ પર તેમની લોકપ્રિયતાનો ઉલ્લેખ કર્યો. મેલોનીએ તરત જ રમતિયાળ જવાબ આપ્યો, “હા, અમે ઇન્સ્ટાગ્રામ પર સૌથી વધારે ફેમસ છીએ.”

મેલોડી ટ્રેન્ડ વાયરલ થયો
પીએમ મોદી અને મેલોનીની અટકનું સંયોજન, મેલોડી, છેલ્લા ત્રણ વર્ષમાં એક લોકપ્રિય ઓનલાઈન ટ્રેન્ડ બની ગયું છે. 2023 માં દુબઈમાં COP28 સમિટ દરમિયાન મેલોની દ્વારા પોસ્ટ કરાયેલી એક સેલ્ફી વૈશ્વિક ઇન્ટરનેટ ટ્રેન્ડ બની હતી. ઇટાલિયન નેતાએ પીએમ મોદી સાથેનો એક ફોટો શેર કર્યો હતો અને તેના કેપ્શનમાં લખ્યું હતું, “COP28 માં સારા મિત્રો #Melodi.” આ હેશટેગ વાયરલ થયો હતો. ત્યારથી, G7 સમિટ, આંતરરાષ્ટ્રીય પરિષદો અથવા દ્વિપક્ષીય બેઠકો જેવા કાર્યક્રમોમાં તેનો વારંવાર ઉપયોગ કરવામાં આવે છે.

પછી, ગયા મહિને રોમની મુલાકાત દરમિયાન, ભારતીય વડા પ્રધાને મેલોનીને “મેલોડી” કેન્ડીનું પેકેટ ભેટમાં આપ્યું હતું. શેર કરેલા વિડીયોમાં, મેલોનીએ કહ્યું હતું કે, “વડાપ્રધાન મોદી અમને ભેટ લાવ્યા છે… કેટલીક ખૂબ જ સરસ કેન્ડી.” આ વિડીયો ઝડપથી વાયરલ થયો, ઓનલાઈન પોસ્ટ થયાના છ કલાકમાં જ તેને 100 મિલિયનથી વધુ વ્યૂઝ મળ્યા હતા. હાલમાં તેમને 13 મિલિયનથી વધુ લાઈક્સ મળ્યા છે.

વડોદરામાં મેટ્રોમોનિયલ સાઇટના માધ્યમથી લગ્ન કરવા યુવકને બોલાવી હનીટ્રેપમાં ફસાવતી ગેંગનો પર્દાફાશ થયો હતો. સુરતના યુવકને દિલ્લીની યુવતીએ વડોદરા લગ્નના બહાને બોલાવી ખંખેરવામાં આવ્યો હતો. આ કેસમાં લીવ ઈનમાં રહેતા યુવક-યુવતીની ધરપકડ કરવામાં આવી હતી. આ કેસમાં યુવતીના પૂર્વ પતિની પણ સંડોવણી બહાર આવી હતી.

સુરતના વતની અને સુપરવાઇઝર તરીકે કામ કરતા યુવકના 7 વર્ષ પહેલાં છૂટાછેડા થઈ ચૂક્યા હતા. યુવકે બીજા લગ્ન માટે મેટ્રિમોનિયલ સાઇટ પર પ્રોફાઇલ બનાવી હતી. ત્યાં તેનો સંપર્ક હાલ વડોદરામાં રહેતી મૂળ દિલ્લીની યુવતી સાથે થયો હતી. યુવતીએ તેને મળવા માટે વડોદરા બોલાવ્યો હતો. ભાયલી વિસ્તારમાં યુવતી યુવકની કારમાં બેસી ગઈ અને તેને ‘સિટીમાં ફરવા’ જવા કહ્યું હતું.

કારમાં ફરતી વખતે યુવતીએ ઘરેથી ફોન આવે છે તેમ કહીને ગાડી સાઇડમાં રખાવી અને પોતે નીચે ઉતરી ગઈ હતી. યુવતી નીચે ઉતરતા જ ત્યાં બે અજાણ્યા માણસો આવ્યા હતા. તેમણે યુવકને લાફા માર્યા, મારી નાખવાની ધમકી આપી અને કારની બાજુની સીટ પર બેસાડી દીધો હતો. એક માણસ પોતે ડ્રાઇવિંગ કરવા લાગ્યો હતો.

યુવતી અને તેના સાગરીતોએ ભેગા મળીને યુવકનો ફોન અને પાકીટ લૂંટી લીધા હતા. કાર ચાલુ હતી ત્યારે જ યુવકે હિંમત કરીને ડ્રાઇવરને લાત મારી, જેથી કાર ધીમી પડી હતી. જેના કારણે યુવક કારનો દરવાજો ખોલી કૂદીને ભાગી છૂટ્યો હતો અને નજીકના ફ્લેટમાં મદદ માગી હતી. શરૂઆતમાં કોઈએ મદદ ન કરી, પણ આખરે તેણે પોલીસનો સંપર્ક કર્યો હતો.

જે બાદ આરોપીઓ યુવકની કાર ભાયલી કેનાલ રોડ પર છોડીને પોતાના ફ્લેટ પર ભાગી ગયા હતા. ગોત્રી પોલીસે ગણતરીના કલાકોમાં જ ફ્લેટ પર દરોડો પાડીને યુવક અને યુવતીને પકડી લીધા હતા. જ્યારે આ કાવતરામાં સામેલ યુવતીનો પૂર્વ પતિ ફરાર થઈ ગયો હતો, જેને ઝડપવાના ચક્રો ગતિમાન કર્યા હતા.

ઉત્તર-પશ્ચિમ ચીનનો કિંગહાઈ પ્રાંત મંગળવારે સાંજે આવેલા શક્તિશાળી ભૂકંપથી હચમચી ગયો હતો. કિંગહાઈ પ્રાંતના હાઈક્સી મોંગોલ અને તિબેટીયન સ્વાયત્ત પ્રીફેક્ચર વિસ્તારમાં રિક્ટર સ્કેલ પર 6.3ની તીવ્રતાનો ભૂકંપ નોંધાયો હતો. ભૂકંપના જોરદાર આંચકાના કારણે સમગ્ર વિસ્તારમાં લોકોમાં અફરાતફરીનો માહોલ સર્જાયો હતો. ઘણા લોકો સુરક્ષા માટે પોતાના ઘરો, દુકાનો અને ઓફિસોમાંથી બહાર નીકળી ખુલ્લી જગ્યાઓ તરફ દોડી ગયા હતા.

ભૂકંપનો આંચકો એટલો શક્તિશાળી હતો કે દૂરના વિસ્તારોમાં પણ ધરતી ધ્રૂજવાની અસર અનુભવાઈ હતી. સ્થાનિક લોકોના જણાવ્યા મુજબ, અચાનક આવેલા આંચકાથી લોકો ગભરાઈ ગયા હતા અને કેટલાક સમય સુધી ઘરોમાં પરત જવાની હિંમત કરી શક્યા નહોતા. પ્રશાસને લોકોને સાવચેતી રાખવા અને કોઈપણ અફવાઓથી દૂર રહેવાની અપીલ કરી છે.

ભૂકંપનું કેન્દ્ર અને સમય
ચીન ભૂકંપ નેટવર્ક સેન્ટર દ્વારા જાહેર કરવામાં આવેલી માહિતી મુજબ, આ ભૂકંપ બેજિંગના સ્થાનિક સમય અનુસાર સાંજે 5:06 વાગ્યે નોંધાયો હતો. ભારતીય સમય પ્રમાણે આ ભૂકંપ લગભગ બપોરે 2:36 વાગ્યે આવ્યો હતો. ભૂકંપનું કેન્દ્રબિંદુ કિંગહાઈ પ્રાંતના હાઈક્સી વિસ્તારમાં નોંધાયું હતું. વૈજ્ઞાનિક માહિતી અનુસાર, ભૂકંપનું કેન્દ્ર 37.80 ડિગ્રી ઉત્તર અક્ષાંશ અને 95.56 ડિગ્રી પૂર્વ રેખાંશ પર હતું. આ ભૂકંપ જમીનની સપાટીથી લગભગ 10 કિલોમીટર ઊંડાઈએ સર્જાયો હતો.

નિષ્ણાતોના મતે, ઓછી ઊંડાઈએ આવતા ભૂકંપ વધુ ખતરનાક બની શકે છે કારણ કે ભૂકંપની ઊર્જા જમીનની સપાટી સુધી ઓછા નુકસાન સાથે પહોંચે છે અને તેના કારણે ઇમારતો, રસ્તાઓ તથા અન્ય માળખાઓ પર વધુ અસર થઈ શકે છે.

મુખ્ય ભૂકંપ બાદ સતત આફ્ટરશોક્સ, 40 મિનિટમાં 7 આંચકા
કિંગહાઈમાં આવેલા મુખ્ય ભૂકંપ બાદ સૌથી મોટી ચિંતા આફ્ટરશોક્સને લઈને જોવા મળી રહી છે. મુખ્ય આંચકા બાદ માત્ર 40 મિનિટની અંદર 7 જેટલા આફ્ટરશોક્સ નોંધાયા હતા. આ આફ્ટરશોક્સમાંથી કેટલાક હળવા હતા, પરંતુ એક આંચકાની તીવ્રતા લગભગ 5.0ની આસપાસ માપવામાં આવી હતી. સતત આવતા આંચકાઓને કારણે લોકોમાં ભય ફેલાયો હતો. ઘણા લોકોએ રાત્રી દરમિયાન પણ બહાર રહેવાનું પસંદ કર્યું હતું. ભૂકંપ નિષ્ણાતોના જણાવ્યા અનુસાર, મોટા ભૂકંપ બાદ નાના આંચકા આવવા સામાન્ય પ્રક્રિયા છે, પરંતુ તેની તીવ્રતા અને સંખ્યા પર સતત નજર રાખવી જરૂરી હોય છે.

કિંગહાઈ વિસ્તારની ભૌગોલિક સ્થિતિ
કિંગહાઈ ચીનનો એક વિશાળ પરંતુ ઓછી વસ્તી ધરાવતો પ્રાંત છે. આ વિસ્તાર તિબેટીયન ઉચ્ચપ્રદેશ નજીક આવેલો છે અને અહીં મોટા ભાગે પહાડી તથા પથરાળ ભૂમિ જોવા મળે છે. ભૂકંપનું કેન્દ્ર જે વિસ્તારમાં આવ્યું છે ત્યાં વસ્તીનું પ્રમાણ ઓછું હોવાથી મોટી જાનહાનિ ટળી હોવાની શક્યતા છે. જોકે પહાડી વિસ્તારોમાં આવેલા કેટલાક નાના ગામોમાં મકાનો, દિવાલો અને સ્થાનિક માળખાને નુકસાન પહોંચ્યું હોવાના અહેવાલો સામે આવ્યા છે. પ્રારંભિક માહિતી મુજબ, અત્યાર સુધી મોટા પાયે જાનહાનિ અંગે કોઈ સત્તાવાર પુષ્ટિ કરવામાં આવી નથી. પરંતુ બચાવ ટીમો દ્વારા અસરગ્રસ્ત વિસ્તારોમાં તપાસ ચાલુ છે.

ચીનમાં ભૂકંપનું મોટું કારણ શું છે?
ચીનના પશ્ચિમ અને ઉત્તર-પશ્ચિમ વિસ્તારો ભૂકંપની દ્રષ્ટિએ અત્યંત સંવેદનશીલ ગણાય છે. કિંગહાઈ, સિચુઆન અને તિબેટ જેવા વિસ્તારો ટેક્ટોનિક પ્લેટોની હલચલવાળા વિસ્તારમાં આવે છે. અહીં ભારતીય પ્લેટ અને યુરેશિયન પ્લેટ વચ્ચે સતત અથડામણ થાય છે. આ ભૂગર્ભીય દબાણના કારણે પૃથ્વીની અંદર ઊર્જા એકઠી થાય છે અને અચાનક મુક્ત થતાં ભૂકંપ સર્જાય છે. ભૂતકાળમાં પણ ચીનના આ વિસ્તારોમાં અનેક મોટા ભૂકંપ આવ્યા છે, જેના કારણે જાનમાલનું ભારે નુકસાન થયું છે.

રાહત અને બચાવ કામગીરી શરૂ
ભૂકંપ બાદ ચીનના સ્થાનિક પ્રશાસન અને આપત્તિ વ્યવસ્થાપન વિભાગે તાત્કાલિક કાર્યવાહી શરૂ કરી છે. અસરગ્રસ્ત વિસ્તારોમાં સ્થિતિનું નિરીક્ષણ કરવા માટે નિષ્ણાતોની ટીમો મોકલવામાં આવી છે. રેસ્ક્યૂ ટીમો દ્વારા અસરગ્રસ્ત ગામડાઓની તપાસ, રસ્તા અને પુલોની સ્થિતિનું મૂલ્યાંકન, વીજળી અને સંચાર વ્યવસ્થાની ચકાસણી તેમજ ઇમરજન્સી સેવાઓને તૈયાર રાખવાની કામગીરી શરૂ કરવામાં આવી છે. નજીકની હોસ્પિટલોને પણ એલર્ટ પર રાખવામાં આવી છે જેથી કોઈપણ ઇમરજન્સી પરિસ્થિતિમાં તરત સારવાર મળી શકે.

હાલ સ્થિતિ પર પ્રશાસનની નજર
હાલમાં ચીનનું પ્રશાસન ભૂકંપ પછીની સ્થિતિ પર સતત નજર રાખી રહ્યું છે. ખાસ કરીને આફ્ટરશોક્સની સંભાવનાને ધ્યાનમાં રાખીને લોકોને સાવચેત રહેવા જણાવાયું છે. કિંગહાઈના આ ભૂકંપે ફરી એકવાર યાદ અપાવ્યું છે કે પૃથ્વીની ટેક્ટોનિક હલચલને કારણે વિશ્વના કેટલાક વિસ્તારોમાં કુદરતી આફતોનો ખતરો સતત રહે છે. બચાવ અને સર્વે કામગીરી પૂર્ણ થયા બાદ જ નુકસાનની સંપૂર્ણ તસવીર સ્પષ્ટ થશે.

ભુજ સહિત સમગ્ર કચ્છ માટે ગૌરવની ક્ષણ સર્જાઈ છે. સુરતમાં યોજાયેલી ગુજરાત સ્ટેટ પાવરલિફ્ટિંગ ચેમ્પિયનશિપ-2026માં કચ્છના બે યુવા ખેલાડીઓએ શાનદાર પ્રદર્શન કરીને સુવર્ણ ચંદ્રક પોતાના નામે કર્યા છે. ખાસ કરીને દિવ્યાંગ યુવાન નિત્ય અશોક હાથીએ પોતાની અદમ્ય ઈચ્છાશક્તિ અને મહેનતના બળે ગોલ્ડ મેડલ જીતીને સૌને પ્રેરણા આપી છે.

દિવ્યાંગ હોવા છતાં નિત્ય હાથીએ રચ્યો ઇતિહાસ
ભુજના 20 વર્ષીય નિત્ય અશોક હાથીએ બેન્ચ પ્રેસ સ્પર્ધામાં ઉત્કૃષ્ટ દેખાવ કરીને ગોલ્ડ મેડલ મેળવ્યો છે. પગમાં શારીરિક તકલીફ હોવા છતાં તેણે ભારે વજન ઉપાડીને પોતાની ક્ષમતા સાબિત કરી છે. આ સિદ્ધિ સાથે નિત્ય કચ્છમાંથી બેન્ચ પ્રેસ કેટેગરીમાં રાજ્ય સ્તરે ગોલ્ડ મેડલ જીતનાર પ્રથમ દિવ્યાંગ યુવાન બન્યો હોવાનું માનવામાં આવે છે. નિત્ય ભુજ નગરપાલિકાના ભૂતપૂર્વ પ્રમુખ અશોક હાથીના પુત્ર છે. તેમની આ સફળતાએ માત્ર પરિવાર જ નહીં પરંતુ સમગ્ર કચ્છને ગૌરવ અપાવ્યું છે.

ધારા શર્માએ પણ ગોલ્ડ જીતી વધાર્યું કચ્છનું ગૌરવ
આ જ સ્પર્ધામાં ભુજની 18 વર્ષીય ધારા શર્માએ પણ પાવરલિફ્ટિંગ સ્પર્ધામાં સુવર્ણ ચંદ્રક હાંસલ કરીને કચ્છનું નામ રોશન કર્યું છે. ધારા હાલમાં ડિગ્રી અભ્યાસના અંતિમ વર્ષમાં અભ્યાસ કરી રહી છે. અભ્યાસ સાથે રમતગમતમાં પણ શ્રેષ્ઠ પ્રદર્શન કરીને તેણે યુવા ખેલાડીઓ માટે પ્રેરણારૂપ ઉદાહરણ પૂરું પાડ્યું છે.

કોચ વત્સલ મહેશ્વરીના માર્ગદર્શનનો મળ્યો લાભ
નિત્ય હાથી અને ધારા શર્મા બંનેએ વિશ્વ ચેમ્પિયન પાવરલિફ્ટર વત્સલ મહેશ્વરીના માર્ગદર્શન હેઠળ તાલીમ મેળવી હતી. ભુજ સ્થિત જીમ 360 ફિટનેસ પોઈન્ટમાં બંને ખેલાડીઓએ સઘન પ્રેક્ટિસ કરી હતી. સ્પર્ધા દરમિયાન પણ વત્સલ મહેશ્વરી કોચ તરીકે હાજર રહી ખેલાડીઓને માર્ગદર્શન આપ્યું હતું.

યુવા ખેલાડીઓ માટે પ્રેરણાસ્ત્રોત બની સફળતા
કચ્છના આ બંને ખેલાડીઓની સિદ્ધિએ સાબિત કર્યું છે કે મજબૂત મનોબળ, સતત મહેનત અને યોગ્ય માર્ગદર્શન મળે તો કોઈપણ પડકારને પાર કરી શકાય છે. ખાસ કરીને દિવ્યાંગ યુવાન નિત્ય હાથીની સફળતા અનેક યુવાનો માટે પ્રેરણાનું જીવંત ઉદાહરણ બની છે. આ સિદ્ધિ બદલ બંને ખેલાડીઓને વિવિધ સામાજિક, રમતગમત અને શૈક્ષણિક સંસ્થાઓ તરફથી અભિનંદન મળી રહ્યા છે.

યસ બેંક સાથે સંકળાયેલા કથિત મની લોન્ડરિંગ અને લોન ટ્રાન્સફરમાં થયેલી ગેરરીતિઓના કેસમાં એન્ફોર્સમેન્ટ ડિરેક્ટોરેટ (ED) દ્વારા મોટા પાયે કાર્યવાહી હાથ ધરવામાં આવી છે. એજન્સીએ મુંબઈ, ખંડાલા અને નવી દિલ્હી સહિત કુલ 17 સ્થળોએ એકસાથે દરોડા પાડીને મહત્વપૂર્ણ પુરાવા એકત્ર કરવાની કાર્યવાહી શરૂ કરી છે.

તપાસનો મુખ્ય ફોકસ ડિસ્ટ્રેસ્ડ એસેટ્સના સંપાદન, શંકાસ્પદ નાણાકીય વ્યવહારો અને કથિત ગેરકાયદેસર સોદાઓ પર છે. EDની મુંબઈ ઝોનલ ઓફિસ-1 દ્વારા ચલાવવામાં આવેલા આ ઓપરેશનમાં રિયલ એસ્ટેટ અને એસેટ રિકન્સ્ટ્રક્શન ક્ષેત્રની કેટલીક જાણીતી કંપનીઓને તપાસના દાયરામાં લેવામાં આવી છે.

દરોડાની ઝપેટમાં આવેલી કંપનીઓમાં સુરક્ષા એસેટ રિકન્સ્ટ્રક્શન કંપની લિમિટેડ (SARCL), સુરક્ષા રિયલ્ટી લિમિટેડ અને ખ્યાતિ રિયલ્ટર્સ પ્રાઇવેટ લિમિટેડનો સમાવેશ થાય છે. આ ઉપરાંત કંપનીઓના પ્રમોટર્સ, ડિરેક્ટર્સ, અધિકારીઓ અને કર્મચારીઓના રહેઠાણો તથા ઓફિસોમાં પણ તપાસ હાથ ધરવામાં આવી છે. યસ બેંકના એક પૂર્વ કર્મચારીની ભૂમિકા પણ એજન્સીની તપાસ હેઠળ હોવાનું જાણવા મળ્યું છે.

તપાસ એજન્સીના સૂત્રો મુજબ, નાણાકીય વર્ષ 2016-17 અને 2017-18 દરમિયાન મેસર્સ મેકસ્ટાર માર્કેટિંગ પ્રાઇવેટ લિમિટેડ સહિત કેટલીક કંપનીઓના લોન ખાતાઓના ટ્રાન્સફરમાં ગંભીર ગેરરીતિઓ થઈ હોવાની આશંકા છે. આરોપ છે કે બેંકના કેટલાક તત્કાલીન અધિકારીઓએ નિયમોનું ઉલ્લંઘન કરીને લોન ટ્રાન્સફર પ્રક્રિયામાં ચોક્કસ પક્ષકારોને ગેરકાયદેસર લાભ પહોંચાડ્યો હતો.

EDને શંકા છે કે કેટલીક એસેટ રિકન્સ્ટ્રક્શન કંપનીઓ (ARC) અને બેંકના અધિકારીઓ વચ્ચે સાંઠગાંઠ થઈ હતી. આ ગઠબંધન મારફતે પરિપત્ર નાણાકીય વ્યવહારો કરીને કરોડો રૂપિયાની તણાવગ્રસ્ત સંપત્તિઓ પર નિયંત્રણ મેળવવાનો પ્રયાસ કરવામાં આવ્યો હતો. ઉપરાંત હરાજી પ્રક્રિયા દરમિયાન સંપત્તિઓનું ઓછું મૂલ્યાંકન કરીને બેંકને આર્થિક નુકસાન પહોંચાડવામાં આવ્યું હોવાના પણ આરોપો સામે આવ્યા છે.

તપાસનો વ્યાપ હવે નેશનલ કંપની લો ટ્રિબ્યુનલ (NCLT) હેઠળની કોર્પોરેટ ઇન્સોલ્વન્સી રિઝોલ્યુશન પ્રોસેસ (CIRP) સુધી પહોંચ્યો છે. ED એ પણ તપાસી રહી છે કે લેણદારોના મતાધિકારોનો દુરુપયોગ થયો હતો કે નહીં અને સમગ્ર પ્રક્રિયામાં પારદર્શિતાનો ભંગ કરવામાં આવ્યો હતો કે નહીં. હાલ તમામ 17 સ્થળોએ તપાસ અને સર્ચ ઓપરેશન ચાલુ છે. દરોડા દરમિયાન મળેલા ડિજિટલ ડેટા, નાણાકીય દસ્તાવેજો અને અન્ય પુરાવાઓની ફોરેન્સિક તપાસ બાદ આગામી દિવસોમાં વધુ મહત્વના ખુલાસા અને સંભવિત કાનૂની કાર્યવાહી થવાની શક્યતા વ્યક્ત કરવામાં આવી રહી છે.

રાષ્ટ્રીય સુરક્ષાને ધ્યાનમાં રાખીને ગુરુગ્રામ પોલીસ દ્વારા ગેરકાયદેસર ઘૂસણખોરો વિરુદ્ધ અભિયાન સતત ચાલુ રાખવામાં આવ્યું છે. ક્રાઈમ બ્રાન્ચની ટીમોએ 800થી વધુ શંકાસ્પદ લોકોના દસ્તાવેજોની તપાસ કરી હતી. આ દરમિયાન 13 બાંગ્લાદેશી નાગરિકોની ધરપકડ કરવામાં આવી છે. આ તમામ લોકો બાંગ્લાદેશ સરહદ મારફતે ગેરકાયદેસર રીતે ભારતમાં પ્રવેશ્યા હતા અને હાલમાં ગુરુગ્રામમાં રહેતા હતા. પોલીસ હવે તેમને તેમના દેશમાં પરત મોકલવાની કાર્યવાહી કરશે.

ગેરકાયદેસર રીતે રહેતા બાંગ્લાદેશી નાગરિકો
ગુરુગ્રામ જિલ્લામાં ગેરકાયદેસર રીતે રહેતા બાંગ્લાદેશી નાગરિકોની ઓળખ અને ચકાસણી માટે ગુરુગ્રામ પોલીસ દ્વારા વિશેષ ચેકિંગ અભિયાન ચલાવવામાં આવી રહ્યું છે. આ અભિયાન દરમિયાન જેમના દસ્તાવેજો શંકાસ્પદ જણાય છે અથવા જે લોકો ભારતમાં કાયદેસર રીતે રહેતા હોવાના પુરાવા રજૂ કરી શકતા નથી, તેમના વિરુદ્ધ નિયમ મુજબ કાર્યવાહી કરવામાં આવી રહી છે.

નિર્માણાધીન સાઇટ્સ અને ઝૂંપડપટ્ટીઓમાં તપાસ
ક્રાઈમ બ્રાન્ચ સેક્ટર-39, ગુરુગ્રામની પોલીસ ટીમે નિર્માણાધીન સાઇટ્સ અને ઝૂંપડપટ્ટીઓમાં રહેતા શંકાસ્પદ બાંગ્લાદેશી નાગરિકોની તપાસ હાથ ધરી હતી. ગુરુગ્રામની વિવિધ કન્સ્ટ્રક્શન સાઇટ્સ અને ઝૂંપડપટ્ટીઓમાં ચેકિંગ કરીને શંકાસ્પદ લોકોના દસ્તાવેજોની તપાસ કરવામાં આવી અને તેમની નાગરિકતાની ચકાસણી કરવામાં આવી. આ કાર્યવાહી દરમિયાન ગેરકાયદેસર રીતે રહેતા 13 બાંગ્લાદેશી નાગરિકોની ઓળખ કરવામાં આવી હતી. તેમની પાસેથી બાંગ્લાદેશની નાગરિકતા સંબંધિત દસ્તાવેજો પણ મળી આવ્યા હતા.

કાલિયાગંજ બોર્ડર મારફતે ભારતમાં પ્રવેશ્યા હતા
પોલીસની પૂછપરછ દરમિયાન જાણવા મળ્યું કે આ તમામ બાંગ્લાદેશી નાગરિકો બાંગ્લાદેશી એજન્ટોની મદદથી કાલિયાગંજ બોર્ડર મારફતે ગેરકાયદેસર રીતે ભારતમાં પ્રવેશ્યા હતા. તેઓ અહીં મજૂર તરીકે કામ કરીને ગુરુગ્રામમાં રહેતા હતા. હવે કાયદાકીય પ્રક્રિયા પૂર્ણ કર્યા બાદ તેમને તેમના દેશમાં પરત મોકલવામાં આવશે.

આ વિસ્તારોમાં ચાલી રહ્યું છે ચેકિંગ અભિયાન
ગુરુગ્રામ પોલીસ દ્વારા ઝૂંપડપટ્ટીઓ, કોલોનીઓ, ભાડાના મકાનો, ઔદ્યોગિક વિસ્તારો તેમજ હોટલોમાં રહેતા લોકોના દસ્તાવેજો અને ઓળખની ચકાસણી કરવામાં આવી રહી છે. શહેરના વિવિધ વિસ્તારોમાં પોલીસ દ્વારા સઘન તપાસ અભિયાન ચલાવવામાં આવી રહ્યું છે.

પોલીસે નાગરિકોને કરી અપીલ
ગુરુગ્રામ પોલીસે તમામ નાગરિકોને અપીલ કરી છે કે જો કોઈ શંકાસ્પદ અથવા ગેરકાયદેસર રીતે રહેતા વિદેશી નાગરિક અંગે માહિતી મળે તો તેની જાણ તાત્કાલિક પોલીસને કરે. ઉપરાંત, પોતાના ભાડૂતો, ઘરેલુ મદદનીશો, કર્મચારીઓ તેમજ હોટલ અથવા વ્યાવસાયિક સંસ્થાઓમાં કામ કરતા લોકોનું પોલીસ વેરિફિકેશન જરૂર કરાવે.

જો તમારા આસપાસ કોઈ શંકાસ્પદ વ્યક્તિ રહેતી હોય તો તેની જાણ તરત જ પોલીસ કંટ્રોલ રૂમ નંબર 112 અથવા નજીકના પોલીસ સ્ટેશનને કરો. સામાન્ય નાગરિકોની સુવિધાનું સંપૂર્ણ ધ્યાન રાખવામાં આવશે. રાષ્ટ્રીય સુરક્ષા અને જનહિતને સર્વોચ્ચ પ્રાથમિકતા આપીને આ અભિયાન સતત ચાલુ રાખવામાં આવશે.

દેશના પ્રથમ હાઈ સ્પીડ રેલ પ્રોજેક્ટ એટલે કે મુંબઈ-અમદાવાદ બુલેટ ટ્રેન પ્રોજેક્ટમાં નોકરી મેળવવા ઈચ્છતા ઉમેદવારો માટે મહત્વપૂર્ણ સમાચાર સામે આવ્યા છે. નેશનલ હાઈ સ્પીડ રેલ કોર્પોરેશન લિમિટેડ (NHSRCL) દ્વારા વિવિધ વિભાગોમાં ભરતી પ્રક્રિયા શરૂ કરવામાં આવી છે. આ ભરતી અંતર્ગત કુલ 224 જગ્યાઓ પર લાયક ઉમેદવારોની પસંદગી કરવામાં આવશે.

NHSRCL દ્વારા જાહેર કરાયેલી ભરતીમાં ટેકનિકલ અને ઓપરેશન ક્ષેત્ર સાથે જોડાયેલી મહત્વની પોસ્ટનો સમાવેશ કરવામાં આવ્યો છે. બુલેટ ટ્રેન પ્રોજેક્ટના નિર્માણ અને સંચાલનને વધુ ગતિ આપવા માટે જુનિયર એન્જિનિયર, સ્ટેશન/ટ્રેન મેનેજર, ડેપો ઓપરેશન કંટ્રોલર સહિતની જગ્યાઓ માટે અરજીઓ મંગાવવામાં આવી છે. આ ભરતી ખાસ કરીને એન્જિનિયરિંગ ક્ષેત્રમાં અભ્યાસ કરેલા અને રેલવે, મેટ્રો અથવા ટ્રાન્સપોર્ટ ક્ષેત્રમાં અનુભવ ધરાવતા ઉમેદવારો માટે સારી તક બની શકે છે. પસંદ થયેલા ઉમેદવારોને દેશના સૌથી મોટા પરિવહન પ્રોજેક્ટ સાથે કામ કરવાની તક મળશે.

224 જગ્યાઓ પર થશે ભરતી
NHSRCLની ભરતીમાં કુલ 224 ખાલી જગ્યાઓ ભરવામાં આવશે. જેમાં મોટાભાગની જગ્યાઓ નોન-એક્ઝિક્યુટિવ કેટેગરીમાં રાખવામાં આવી છે, જ્યારે કેટલીક મહત્વપૂર્ણ પોસ્ટ માટે એક્ઝિક્યુટિવ લેવલની ભરતી કરવામાં આવશે.

આ ભરતીમાં:
209 નોન-એક્ઝિક્યુટિવ પોસ્ટ 15 એક્ઝિક્યુટિવ પોસ્ટ માટે ઉમેદવારોની પસંદગી કરવામાં આવશે.

કઈ પોસ્ટ માટે મળશે તક?
આ ભરતીમાં જુનિયર એન્જિનિયર માટે વિવિધ ટેકનિકલ વિભાગોમાં જગ્યાઓ ઉપલબ્ધ છે. જેમાં સિવિલ, ટ્રેક, ઇલેક્ટ્રિકલ, સિગ્નલિંગ અને ટેલિકોમ (S&T), રોલિંગ સ્ટોક અને ઓટોમેટિક ફેર કલેક્શન (AFC) જેવા વિભાગો સામેલ છે. આ ઉપરાંત સ્ટેશન અને ટ્રેન મેનેજરની પોસ્ટ માટે પણ મોટી સંખ્યામાં જગ્યાઓ ખાલી છે. જ્યારે ડેપો અને ઓપરેશન કંટ્રોલર જેવી જવાબદારીવાળી પોસ્ટ માટે પણ ઉમેદવારો પાસેથી અરજીઓ મંગાવવામાં આવી છે. એક્ઝિક્યુટિવ કેટેગરીમાં IT અને સેફ્ટી વિભાગ માટે ભરતી કરવામાં આવશે. આ પોસ્ટ પર કામ કરનાર ઉમેદવારોને પ્રોજેક્ટની ટેકનિકલ અને સુરક્ષા વ્યવસ્થામાં મહત્વની ભૂમિકા ભજવવાની રહેશે.

ઉમેદવારની લાયકાત શું હોવી જોઈએ?
આ ભરતી માટે ઉમેદવાર પાસે સંબંધિત ક્ષેત્રમાં ટેકનિકલ લાયકાત હોવી જરૂરી છે. ઉમેદવારે માન્યતા પ્રાપ્ત સંસ્થામાંથી સંબંધિત ટ્રેડમાં 3 વર્ષનો ડિપ્લોમા અથવા B.E./B.Tech ડિગ્રી પૂર્ણ કરેલી હોવી જોઈએ. આ ઉપરાંત ઉમેદવાર પાસે રેલવે, મેટ્રો અથવા RRTS ક્ષેત્રમાં ઓપરેશન અને મેન્ટેનન્સ (O&M)નો અનુભવ હોવો જરૂરી છે. અનુભવ ધરાવતા ઉમેદવારોને પસંદગીમાં મહત્વ મળી શકે છે.

ઉંમર મર્યાદા
NHSRCL ભરતી માટે ઉમેદવારની ઉંમર પણ નક્કી કરવામાં આવી છે. 31 મે 2026ની સ્થિતિ પ્રમાણે ઉમેદવારની મહત્તમ ઉંમર 45 વર્ષથી વધુ હોવી જોઈએ નહીં. સરકારી નિયમો મુજબ અનામત વર્ગના ઉમેદવારોને ઉંમરમાં છૂટછાટ આપવામાં આવી શકે છે.

પગાર અને અન્ય સુવિધાઓ
બુલેટ ટ્રેન પ્રોજેક્ટમાં પસંદ થયેલા ઉમેદવારોને આકર્ષક પગાર આપવામાં આવશે. ભરતીમાં પસંદગી પામનાર કર્મચારીઓને IDA પે સ્કેલ મુજબ પગાર મળશે. ઉમેદવારોને દર મહિને ₹40,000 થી ₹1,25,000 સુધીનો પગાર મળી શકે છે. આ ઉપરાંત નિયમ મુજબ હાઉસ રેન્ટ એલાઉન્સ (HRA), મેડિકલ સુવિધા સહિતના અન્ય લાભો પણ આપવામાં આવશે. જોકે પસંદ થયેલા ઉમેદવારોએ કંપનીના નિયમ મુજબ 4 વર્ષના સેવા સમયગાળા માટે ₹3 લાખના સિક્યોરિટી બોન્ડ પર સહી કરવાની રહેશે.

અરજી ફી
અરજી પ્રક્રિયા માટે અલગ અલગ કેટેગરી પ્રમાણે ફી નક્કી કરવામાં આવી છે.

સામાન્ય (UR), EWS અને OBC ઉમેદવારો માટે: ₹400
SC, ST અને મહિલા ઉમેદવારો માટે: કોઈ અરજી ફી નહીં
અરજી કરવાની છેલ્લી તારીખ: ઉમેદવારોએ પોસ્ટ પ્રમાણે નક્કી કરેલી તારીખ પહેલાં ઓનલાઈન અરજી કરવાની રહેશે.

એક્ઝિક્યુટિવ પોસ્ટ માટે અરજી કરવાની છેલ્લી તારીખ: 9 જુલાઈ 2026
નોન-એક્ઝિક્યુટિવ પોસ્ટ માટે અરજી કરવાની છેલ્લી તારીખ: 14 જુલાઈ 2026

કેવી રીતે થશે પસંદગી?
NHSRCL દ્વારા ઉમેદવારોની પસંદગી પ્રક્રિયા ત્રણ તબક્કામાં પૂર્ણ કરવામાં આવશે.

સૌ પ્રથમ ઉમેદવારો માટે કોમ્પ્યુટર આધારિત ટેસ્ટ (CBT) લેવામાં આવશે. ત્યારબાદ પરીક્ષામાં સફળ ઉમેદવારોના દસ્તાવેજોની ચકાસણી કરવામાં આવશે અને અંતે મેડિકલ પરીક્ષણ બાદ અંતિમ પસંદગી કરવામાં આવશે.

કેવી રીતે કરવી અરજી?
લાયક અને રસ ધરાવતા ઉમેદવારો NHSRCLની સત્તાવાર વેબસાઈટ પર જઈને ઓનલાઈન અરજી કરી શકે છે. અરજી કરતી વખતે ઉમેદવારોએ પોતાની શૈક્ષણિક માહિતી, અનુભવની વિગતો અને જરૂરી દસ્તાવેજો યોગ્ય રીતે અપલોડ કરવા પડશે.

બુલેટ ટ્રેન પ્રોજેક્ટ દેશના પરિવહન ક્ષેત્રમાં એક મહત્વપૂર્ણ પહેલ છે. આવી સ્થિતિમાં આ ભરતી ટેકનિકલ ક્ષેત્રના યુવાનો માટે એક મોટી કારકિર્દીની તક સાબિત થઈ શકે છે.