ગુજરાતમાં અત્યારે બેવડી ઋતુનો માર રહ્યો ચાલી રહ્યો છે. રાજ્યમાં તાપમાનમાં વધારો ઘટાડો થઈ રહ્યો છે. બીજી તરફ રાજ્યમાં કમોસમી વરસાદની પણ આગાહી થઈ રહી છે. ગુજરાતમાં ફરીથી મહત્તમ તાપમાને 41 ડિગ્રીની સપાટી વટાવી દીધી છે. રાજ્યમાં મોટાભાગના વિસ્તારોમાં 37 ડિગ્રીની આસપાસ મહત્તમ તાપમાન રહ્યું હતું.
છેલ્લા 24 કલાકમાં પંજાબ, હરિયાણા, ઉત્તર પ્રદેશ અને આસામમાં ખૂબ જ જોરદાર પવન ફૂંકાયો. આ પવનોથી તડકામાં બહાર નીકળેલા લોકોને થોડી રાહત મળી છે, પરંતુ કાળઝાળ ગરમીથી રાહત સરળતાથી મળશે નહીં. પશ્ચિમ બંગાળમાં ખૂબ જ ગરમ પવન ફૂંકાઈ રહ્યો છે. દરરોજ મહત્તમ તાપમાનનો રેકોર્ડ તૂટતો રહે છે. છત્તીસગઢના રાજનાંદગાંવ, મહારાષ્ટ્રના ચંદ્રપુર અને ઓડિશાના સંબલપુરમાં સૌથી વધુ 42 ડિગ્રી સેલ્સિયસ તાપમાન નોંધાયું હતું.
ગુજરાતમાં અત્યારે ઉનાળો કે ચોમાસુ ચાલે છે એ ખબર પડતી નથી. વાતાવરણમાં ગમે ત્યારે ફેરફાર થઈ જાય છે. હવામાન વિભાગની આગાહી પ્રમાણે આગામી બે દિવસ સૌરાષ્ટ્રના પોરબંદરમાં હીટવેવની આગાહી કરી હતી. જ્યારે ત્યારબાદ દક્ષિણ ગુજરાતમાં નર્મદા, તાપી અને ડાંગમાં વાવાઝોડા સાથે કમોસમી વરાસદ પડવાની શક્યતા છે.
હવામાન નિષ્ણાતે જણાવ્યું છે કે, અરવલ્લી, દાહોદ, ગોધરા, છોટા ઉદેપુર, મહીસાગરમાં એકથી પાંચ તારીખ સુધીમાં છૂટાછવાયા માવઠાના ઝાપટાં પડી શકે છે. આ સાથે દક્ષિણ ગુજરાતના સુરત, ભરૂચ, અંકલેશ્વર, વાપી, વલસાડ, નર્મદામાં પણ પાંચમી તારીખ સુધી હવામાનમાં અસ્થિરતા જોવા મળશે અને છૂટાછવાયા સ્થળો પર વરસાદી ઝાપટાં જોવા મળશે. ઉત્તર ગુજરાતના વિસ્તારોમાં તાપમાન એકંદરે ઊંચુ જોવા મળશે. આ સાથે અહીં કોઈક વિસ્તારમાં માવઠું થઈ શકે છે. આ સાથે મધ્ય ગુજરાતમાં પણ ઊંચુ તાપમાન રહેશે. અહીં માવઠાની શક્યતા ઓછી છે. પરંતુ કેટલાક વિસ્તારોમાં ઘાટા વાદળો જોવા મળી શકે છે.
