કાશ્મીરના પહેલગાવના આતંકવાદી હુમલામાં ૨૮ નિર્દોષ લોકોની કરપીણ હત્યાને પગલે ગુજરાત સહિત સમગ્ર દેશમાં ભારે આક્રોશ ફાટી નીકળ્યો છે. લોકો કહી રહ્યા છે કે, હવે પાકિસ્તાનને જડબાતોડ જવાબ આપવાનો સમય પાકી ગયો છે. લોકોની લાગણીને વાચા આપતા કેન્દ્ર સરકારે વળતા પ્રહાર રૂપે પાકિસ્તાન સામે આકરાં રાજદ્વારી પગલાંનું શસ્ત્ર ઉગામ્યું છે.
જેમાં સાર્ક સહિતના વિવિધ પ્રકારના વિઝા મારફતે ભારત આવેલા પાકિસ્તાની નાગરિકોના વિઝા તત્કાળ અસરથી રદ કરવાની જાહેરાત કરી છે. એટલું જ નહીં, સમગ્ર દેશમાં પાકિસ્તાનથી આવેલા તમામ લોકોને નિયમ સમય મર્યાદામાં ભારત છોડવા આદેશ જારી રહ્યા છે. જેના ભાગરૂપે શુક્રવારે કેન્દ્રીય ગૃહમંત્રી અમિતભાઇ શાહે ગુજરાત સહિત તમામ રાજ્યોના મુખ્યમંત્રીઓ સાથે વાત કરીને જે તે રાજ્યમાં રહેલા પાકિસ્તાની નાગરિકોને શોધીને શક્ય તેટલી ઝડપથી ડિપોર્ટ કરવાની સૂચના આપી છે. ગુજરાતમાં ટૂંકા અને લાંબાગાળાના વિઝા ધરાવતા લગભગ ૪૩૮ પાકિસ્તાની નાગરિકો હોવાની વિગતો જાણવા મળી છે. આ તમામને ડિપોર્ટ કરવા રાજ્યના ગૃહમંત્રી હર્ષ સંઘવીએ સંબંધિત જિલ્લા તંત્રને સૂચના આપી છે. જેમાં ભરૂચ આવેલી એક મહિલાને આજે જ અટારી બોર્ડરથી ડિપોર્ટ કરવામાં આવી હતી.
૨૨ એપ્રિલે પહેલગાવ ખાતે આતંકવાદીઓએ ૨૮ જણાને ઠાર માર્યા હતા. આ ઘટનાને ભારત સરકારે ગંભીર નોંધ લીધી છે અને પાકિસ્તાન સાથેના તમામ સંબંધો કાપી નાખવાનો નિર્ણય કર્યો છે. ભારતે પાંચ મહત્વનાં પગલાં લીધા છે, જેમાં મેડિકલ વિઝા પર ભારત આવેલા લોકોને ભારત છોડી દેવા ઉપરાંત અને પાકિસ્તાની નાગરિકોના વિઝા તાત્કાલિક અસરથી રદ કરી દેવાયા છે. એમાં સાર્ક વિઝા એક્ઝમ્પશન સ્કીમ હેઠળ ભારત આવેલા પાકિસ્તાની નાગરિકોને પણ ૪૮ કલાકમાં પોતાના દેશ પરત જવાની સૂચના આપવામાં આવી છે.
ભારત સરકારે જાહેર કરેલા પગલાં બાદ સૌ પ્રથમ ભરૂચ ખાતે ૧૪ એપ્રિલે આવેલા શાહીદા બીબી નામના પાકિસ્તાની નાગરિકને અટારી બોર્ડર ખાતેથી શુક્રવારે ડિપોર્ટ કરાયા હતા. ૭૧ વર્ષીય શાહીદાબીબી પાસે ૨૬ જૂન સુધી સુધી રોકાવાના વિઝા હતા. જોકે, કેન્દ્રની સૂચના બાદ સ્થાનિક વહીવટી તંત્ર દ્વારા તેમને ડિપોર્ટ કરી દેવાયા હતા. આ સંદર્ભે ગૃહ રાજ્યમંત્રી હર્ષ સંઘવીને પૂછતાં તેમણે જણાવ્યું હતું કે, પહેલગાવ આતંકી હુમલા બાદ તેની પાછળ જવાબદાર પાકિસ્તાન સામે હવે સખતાઇથી પગલાં લેવાની શરૂઆત થઇ છે એમાં વિવિધ વિઝા પર ભારત અને ગુજરાત આવેલા નાગરિકોના વિઝા રદ કરાયા છે એમને ડિપોર્ટ કરવામાં આવશે. આ માટે સંબંધિત જિલ્લા વહીવટી અને પોલીસ તંત્રને સૂચના આપી દેવામાં આવી છે.
ગૃહ વિભાગ પાસે ઉપલબ્ધ ડેટા મુજબ રાજ્યમાં શોર્ટ ટર્મ વિઝા ધરાવતા કુલ ૭ પાકિસ્તાની નાગરિકો છે એમાં સૌથી વધુ પાંચ અમદાવાદ અને એક એક ભરૂચ તથા વડોદરામાં છે. આ નાગરિકોને શોધી એમને ભારત છોડી દેવાની સૂચના આપી દેવામાં આવી રહી છે. આ સિવાય લોંગ ટર્મ વિઝા ધરાવતા નાગરિકોમાં સૌથી વધુ ૭૭ પાક નાગરિકો અમદાવાદમાં વસવાટ કરી રહ્યા છે. જ્યારે સુરતમાં ૪૪ અને કચ્છમાં ૫૩ નાગરિકો છે. જ્યારે ૨૯ જેટલા પાકિસ્તાની નાગરિકો ગાંધીનગર જિલ્લામાં મુખ્યત્ત્વે ગાંધીનગર શહેર, કલોલ, માણસા તથા દહેગામમાં રહે છે. આ તમામ નાગરિકોને શોધીને તેમને પરત મોકલવા માટે મોટાપાયે અભિયાન શરૂ કરવામાં આવી રહ્યું છે.
ગૃહ વિભાગના સૂત્રોના કહેવા પ્રમાણે, અલગ અલગ ૧૭ પ્રકારના વિઝા પર પાકિસ્તાની નાગરિકો ભારત આવતા હોય છે. ભારતમાં શરણાર્થી તરીકે આવેલા પાકિસ્તાની હિન્દુ(લઘુમતીઓ)ના વિઝા રદના નિર્ણયની કોઇ અસર થશે નહીં એ નોંધનીય છે. થોડા મહિના અગાઉ જ ગુજરાતે ૧૮ પાકિસ્તાની લઘુમતીઓને ભારતીય નાગરિકત્ત્વ આપ્યું હતું. એકલા અમદાવાદ જિલ્લા કલેક્ટરે અત્યાર સુધીમાં ૧૧૬૭ લોકોને આ રીતે નાગરિકત્ત્વ આપ્યું છે.
