એ.ટી.એસ. ગુજરાતના વરીષ્ઠ પોલીસ અધિકારીશ્રીઓ દ્વારા એ.ટી.એસ.ના અધિકારીઓને ઓર્ગેનાઈઝડ ક્રાઈમ પર સર્વેલન્સ રાખવા સૂચના કરેલ હતી. જે સૂચના અન્વયે નાર્કોટીક્સ, આર્મ્સ વિગેરે ઓર્ગેનાઈઝડ ક્રાઈમ પર સર્વેલન્સ રાખવામાં આવેલ હતું. જે દરમ્યાન એ.ટી.એસ.ના નાયબ પોલીસ અધિક્ષક શ્રી એસ. એલ. ચૌધરીનાઓને ગુપ્ત રાહે બાતમી મળેલ કે, (૧) મુકેશસિંહ હુકમસિંહ ચૌહાન, (૨) અભિષેક રાજદેવ ત્રિવેદી, (૩) વેદપ્રકાશસિંહ રામબાબુસિંહ, (૪) રાજેન્દ્રસિંહ લક્ષ્મણસિંહ સાંખલા, (૫) અજય ભુરેસિંહ સેંગર, (૬) શોલેસિંહ રામબાબુસિંહ સેંગર તથા (૭) વિજયસિંહ ભૂરેસિંહ સેંગર નાઓએ ઉત્તરપ્રદેશના એટા જિલ્લાના શ્યામસિંહ ઉર્ફે રાજુ હુકમસિંહ ચૌહાણ તથા શ્યામસિહ ઠાકુર નાઓની મદદથી દેવકાન્ત પાન્ડે નાઓને ઘણી મોટી રકમ આપી તેઓ પાસે ઉત્તરપ્રદેશ રાજ્યના બોગસ હથિયાર લાયસન્સો પોતાના નામે બનાવડાવી તેઓ પાસેથી હથિયારો ખરીદી લાવેલ છે. તેમજ તેઓએ પોતાની ગેંગના માણસો તથા ગુજરાતના બીજા ઘણા બધા માણસોને બોગસ હથિયાર લાયસન્સ તથા હથિયારો અપાવડાવેલ છે.

ઉપરોક્ત માહિતી અંગે તેઓએ ગુજરાત એ.ટી.એસ.ના વરીષ્ઠ પોલીસ અધિકારીશ્રીઓને જાણ કરી આ માહિતીને ખરાઈ અર્થે પો.ઇન્સશ્રી કે.બી.સોલંકીનાઓને સોપવામાં આવેલ. જે માહિતી અંગે પો.ઇન્સશ્રી કે.બી.સોલંકી, એ.ટી.એસ. ટીમના અન્ય અધિકારી તથા સ્ટાફના માણસો દ્વારા આ બાબતે તપાસ કરવામાં આવેલ. જે અંતર્ગત ઉપરોક્ત ઈસમોની પુછપરછ અને પ્રાથમિક તપાસ દરમ્યાન જાણવા મળેલ કે, ગુજરાતના ઘણા માણસોએ વર્ષ ૨૦૧૯થી ૨૦૨૨ના સમયગાળા દરમ્યાન યેનકેન પ્રકારે ઉત્તરપ્રદેશના એજન્ટ દેવકાન્ત પાન્ડે મારફતે એટા, ઉત્તરપ્રદેશ ખાતેથી ખોટા હથિયાર લાયસન્સો બનાવી હથિયારો મેળવેલ છે.

જે મળેલ માહિતીના આધારે ગુજરાત એ.ટી.એસ.ની અલગ-અલગ ટીમો બનાવી દરોડા પાડવામાં આવેલ જે દરમ્યાન ઉપરોક્ત ૦૭ ઇસમો પાસેથી ૦૩ રિવોલ્વર તથા તેના ૧૮૭ રાઉન્ડસ અને ૦૪ પિસ્ટલ તથા તેના ૯૮ રાઉન્ડસ મળી કુલ ૦૭ હથિયાર સાથે ૨૮૫ રાઉન્ડ્સ રિકવર કરી જપ્ત કરવામાં આવેલ છે. જે આધારે એ.ટી.એસ. પો.સ્ટે. ખાતે કુલ ૦૭ ઇસમો (૧) મુકેશસિંહ હુકમસિંહ ચૌહાન, (૨) અભિષેક રાજદેવ ત્રિવેદી, (૩) વેદપ્રકાશસિંહ રામબાબુસિંહ, (૪) રાજેન્દ્રસિંહ લક્ષ્મણસિંહ સાંખલા, (૫) અજય ભુરેસિંહ સેંગર, (૬) શોલેસિંહ રામબાબુસિંહ સેંગર તથા (૭) વિજયસિંહ ભૂરેસિંહ સેંગર વિરુદ્ધ તા.૧૨/૦૭/૨૦૨૫ ના રોજ ભારતીય ન્યાય સંહિતા ૨૦૨૩ ની કલમ ૩૩૬(૨), ૩૩૭, ૩૩૮, ૩૩૯,૩૪૧(૨)(૪) તથા ૫૪, ૬૧ તથા આર્મ્સ એક્ટ કલમ ૨૫(૧-બી)(એ) મુજબનો ગુનો નોંધી કાયદેસરની કાર્યવાહી હાથ ધરવામાં આવેલ છે.

ઉપરોક્ત ઈસમોની પુછપરછ દરમ્યાન જાણવા મળેલ છે કે, ઉપરોક્ત તમામ ઇસમો તેઓના હથિયાર લાયસન્સમાં જણાવેલ એટાના સરનામે કોઇ દિવસ રહેવા કે વેપારધંધો કે નોકરી કરવા ગયેલ નથી. તેમજ તેઓએ હથિયાર લાયસન્સ મેળવવા માટે એટા જિલ્લા મેજિસ્ટ્રેટ શ્રીનાઓ સમક્ષ કોઈ ઈન્ટરવ્યુ આપેલ નથી. આ ઉપરાંત ઉપરોક્ત ઈસમો પૈકી કોઇની પણ હથિયાર મેળવ્યા બદલની કોઈ ગન હાઉસ રજિસ્ટરમાં સહિ કરેલ નથી.

ગુજરાત એ.ટી.એસ. દ્વારા આ ગુના સંદર્ભે અન્ય બે ઈસમો (૧)શ્યામસિંહ રાજેન્દ્રસિંહ ઠાકુર ઉ.વ.૪૯, રહે. અમદાવાદ મુળ વતન-વિરબનીપીજરી, તા.અલીગંજ, જીલ્લો-એટા, ઉત્તરપ્રદેશ તથા (૨) હિમ્મતસિંહ કમલાકરસિંહ રાજપુત ઉ.વ.૩૧, રહે. અમદાવાદ. મુળ વતન – ગામ-ખેરહટ, તેહસીલ-બારા, પ્રયાગરાજ, ઉત્તરપ્રદેશ નાઓની અટકાયત કરી પુછપરછ ચાલુમાં છે તેમજ આ રીતના ગુનાઓમાં સંડોવાયેલ અન્ય ઇસમો વિરુદ્ધ સઘન તપાસ ચાલુ માં છે.