દિલ્હી બ્લાસ્ટ Delhi blast કેસમાં તપાસ એજન્સીઓને એક વધુ મોટી સફળતા મળી છે. હરિયાણાના ફરીદાબાદ જિલ્લામાં પોલીસને ત્રીજી વખત વિસ્ફોટક સામગ્રી મળી આવી છે. આ વખતે ક્રાઇમ બ્રાન્ચની ટીમને સેક્ટર-56માં બનાવેલા એક મકાનમાંથી આ વિસ્ફોટક મળ્યા Explosives found છે. પોલીસે આ મકાનમાં ભાડે રહેતા બે યુવકોની અટકાયત કરી છે. ટીમે ઘરમાં તપાસ શરૂ કરતા બે કોથળામાં સફેદ રંગનો વિસ્ફોટક પદાર્થ મળી આવ્યો છે. ક્રાઈમ બ્રાન્ચે આ મામલે ઊંડાણપૂર્વક તપાસ શરૂ કરી દીધી છે. પ્રાથમિક માહિતી મુજબ આ ઘરનો માલિક બલ્લભગઢમાં રહે છે.

360 કિલોગ્રામ એમોનિયમ નાઈટ્રેટ જપ્ત
ફ્લેટમાંથી 360 કિલોગ્રામ એમોનિયમ નાઈટ્રેટ જેવો જ્વલનશીલ પદાર્થ, એક અસોલ્ટ રાઈફલ, ત્રણ મેગેઝીન, 83 જીવતા કારતૂસ, એક પિસ્તોલ, આઠ ગોળીઓ, બે ખાલી કારતૂસ, બે વધારાની મેગેઝીન, 12 સૂટકેસ અને એક ડોલ વિસ્ફોટકથી ભરેલી મળી આવી છે. આ ઉપરાંત 20 ટાઈમર, ચાર બેટરી, રીમોટ, પાંચ કિલોગ્રામ ભારે ધાતુ અને એક વોકી-ટોકી સેટ પણ જપ્ત કરવામાં આવ્યું છે. અધિકારીઓનું માનવું છે કે આ વસ્તુઓનો ઉપયોગ મોટા આતંકી હુમલાઓને અંજામ આપવા માટે થવાનો હતો.

અગાઉ ધૌજ અને ફતેહપુરમાંથી વિસ્ફોટક પદાર્થ મળી આવ્યો હતો
અગાઉ ફરીદાબાદના ધૌજ અને ફતેહપુર તગામાંથી પણ વિસ્ફોટક પદાર્થ મળી આવ્યો હતો. આ ઉપરાંત ફરીદાબાદની અલફલાહ યુનિવર્સિટીમાં પણ સર્ચ ઓપરેશન હાથ ધરાયું હતું, આ દરમિયાન ક્રાઇમ બ્રાન્ચે પાંચથી સાત લોકોની અટકાયત કરી હતી.

મોટા આતંકી મોડ્યુલનો પર્દાફાશ
આ પહેલા સોમવારે (10 નવેમ્બર) હરિયાણા અને જમ્મુ-કાશ્મીર પોલીસે એક મોટા આતંકી મોડ્યુલનો પર્દાફાશ કર્યો હતો. ફરીદાબાદના એક ભાડાના મકાનમાંથી મોટી માત્રામાં વિસ્ફોટક અને હથિયારો મળી આવ્યા હતા. આ ઘટનાના 10 દિવસ પહેલા પુલવામાના એક ડૉક્ટરની ધરપકડ કરવામાં આવી હતી, તેના પર પાકિસ્તાન સમર્થિત જૈશ-એ-મોહમ્મદ સાથે જોડાયેલા હોવાની શંકા છે.

ફરીદાબાદના પોલીસ કમિશનર સતેન્દ્ર કુમાર ગુપ્તાએ કહ્યું કે, હરિયાણા અને જમ્મુ-કાશ્મીર પોલીસના સંયુક્ત પ્રયાસોથી એક મોટા આતંકી મોડ્યુલને ખતમ કરવામાં આવ્યું છે. આ મોડ્યુલનો એક અન્ય સભ્ય પહેલા સહારનપુરથી પકડાયો હતો અને ટૂંક સમયમાં જ વધુ સભ્યોની ધરપકડ થવાની અપેક્ષા છે.

દિલ્હીમાં આતંકી ષડયંત્રની ગંભીર આશંકા વચ્ચે એક ભયાનક બ્લાસ્ટની ઘટના સામે આવી છે. 10 નવેમ્બરની સાંજે લાલ કિલ્લાથી માત્ર 300 મીટર દૂર મેટ્રો સ્ટેશન નજીક એક કારમાં પ્રચંડ વિસ્ફોટ થયો હતો, જેમાં શરુઆતમાં 8 લોકોના મોત થયા હતા, જેનો મૃત્યુઆંક આજે વધીને 13 પર પહોંચી ગયો છે. હવે આ ગંભીર કેસની તપાસ હવે નેશનલ ઇન્વેસ્ટિગેશન એજન્સી (NIA)ને સોંપવામાં આવી છે, જે આ મામલે આતંકી કાવતરાના એંગલથી તપાસ શરુ કરશે.

કેન્દ્રીય ગૃહ મંત્રાલયે લીધો નિર્ણય
અહેવાલો અનુસાર, દિલ્હીમાં લાલ કિલ્લા નજીક થયેલા કાર બોમ્બ વિસ્ફોટની તપાસ હવે રાષ્ટ્રીય તપાસ એજન્સી (NIA) કરશે. કેન્દ્રીય ગૃહ મંત્રાલયે આ નિર્ણય લીધો છે અને તપાસ NIAને સોંપી દીધી છે. મંગળવારે (11મી નવેમ્બર) કેન્દ્રીય ગૃહમંત્રી અમિત શાહે એક ઉચ્ચ સ્તરીય બેઠક યોજી હતી જેમાં વિસ્ફોટની તપાસ NIA પાસે કરાવવાનો નિર્ણય લેવામાં આવ્યો હતો.

ત્રણ શંકાસ્પદોની અટકાયત
અહેવાલો અનુસાર, દિલ્હી બ્લાસ્ટ મામલે પોલીસે જમ્મુ અને કાશ્મીરમાંથી ત્રણ શંકાસ્પદોની અટકાયત કરી છે. તારિક અહેમદ મલિક (ગુલામ અહેમદ મલિકનો પુત્ર) એટીએમ ગાર્ડ છે. આમિર રાશીદ અને ઉમર રાશીદની અટકાયત કરાઈ છે, આ ત્રણેય પુલવામા જિલ્લાના રહેવાસી છે. અહેવાલો અનુસાર, તારિક અહેમદ અને આમિર રાશીદને શ્રીનગર લાવવામાં આવ્યા છે, જ્યારે ઉમર રાશીદ હાલમાં પંપોર પોલીસ સ્ટેશનમાં છે અને તેની પૂછપરછ કરવામાં આવી રહી છે.

વડા પ્રધાન નરેન્દ્ર મોદી ભૂટાન પ્રવાસે પહોંચ્યા હતા. આ પ્રવાસ દરમિયાન દિલ્હીમાં બનેલી ઘટના પર શોક વ્યક્ત કર્યો હતો. તેમજ પીડિત પરિવારો પ્રત્યે સંવેદનાઓ પાઠવી હતી. તેમણે કહ્યું કે તેઓ ભારે હૃદય સાથે ભૂટાન આવ્યા છે, ગઈકાલ સાંજની ઘટનાએ સમગ્ર રાષ્ટ્રને ઊંડા આઘાતમાં મૂકી દીધું છે.

શું કહ્યું પીએમ મોદીએ
વડા પ્રધાને જણાવ્યું કે તેઓ આખી રાત ઘટનાની તપાસમાં લાગેલી તમામ એજન્સીઓના સંપર્કમાં રહ્યા અને જરૂરી સૂચનાઓ આપતા રહ્યા. તેમણે સ્પષ્ટ શબ્દોમાં કહ્યું કે આ ષડયંત્રની ઊંડાઈ સુધી પહોંચવા માટે તમામ સંસાધનોનો ઉપયોગ કરવામાં આવશે અને તેની પાછળના ષડયંત્રકારીઓને બક્ષવામાં નહીં આવે.

વડા પ્રધાને કહ્યું કે અકસ્માતમાં જે પરિવારોએ પોતાના પ્રિયજન ગુમાવ્યા છે, આખો દેશ તેમના દુઃખમાં સહભાગી છે. તેમણે શોકગ્રસ્ત પરિવારોને સાંત્વના આપી અને ઘાયલ વ્યક્તિઓ જલ્દી સ્વસ્થ થાય તેવી કામના કરી. તે જ સમયે, સુરક્ષા અને કાયદા અમલીકરણ એજન્સીઓને સંપૂર્ણ આદેશ આપવામાં આવ્યો છે કે તેઓ નિષ્પક્ષ અને ત્વરિત તપાસ કરીને આરોપીઓ સુધી પહોંચે અને દોષિતો વિરુદ્ધ કડકમાં કડક કાર્યવાહી સુનિશ્ચિત કરે.