ઇઝરાયલ અને અમેરિકાએ ઇરાન પર હુમલો કર્યો છે. ઇઝરાયલી અને અમેરિકન દળોએ ઇરાનની રાજધાની તેહરાન સહિત ઘણા શહેરોમાં મિસાઇલો છોડી છે. ઇરાનમાં રાષ્ટ્રપતિ મહેલને નિશાન બનાવવામાં આવ્યો હતો. ઇરાનના સુપ્રીમ લીડર આયાતુલ્લાહ અલી ખામેનીના કાર્યાલય પાસે પણ વિસ્ફોટ થયો હતો. ઇરાની રાજ્ય ટેલિવિઝન દ્વારા વિસ્ફોટોની પુષ્ટિ કરવામાં આવી છે.

ઇરાની સેનાએ ઇઝરાયલ પર મિસાઇલો છોડીને જવાબ આપ્યો છે. ઇરાને કહ્યું છે કે ઇઝરાયલ અને અમેરિકા દ્વારા કરવામાં આવેલા હુમલાનો સંપૂર્ણ બળથી જવાબ આપવામાં આવશે. આ લડાઈ માત્ર ઇઝરાયલ અને ઈરાનમાં જ નહીં પરંતુ સમગ્ર પશ્ચિમ એશિયામાં તણાવ વધારી શકે છે.

ઇરાનની સમાચાર એજન્સી IRNAના અહેવાલ મુજબ, અમેરિકા અને ઇઝરાયલ દ્વારા કરવામાં આવેલા હવાઈ હુમલા પછી દક્ષિણ ઇરાનના એક સ્કૂલમાં 40 વિદ્યાર્થીનીઓના મોત થયા હોવાનું જણાવાયું છે. આ ઘટનાએ વિસ્તારમાં ભારે ચિંતા અને આક્રોશ ફેલાવ્યો છે. જોકે, સ્વતંત્ર સ્ત્રોતો દ્વારા આ આંકડાની સત્તાવાર પુષ્ટિ અંગે વધુ માહિતી મળવાની રાહ જોવાઈ રહી છે.

ઈરાન પર અમેરિકા અને ઇઝરાયલના હુમલા બાદ, એર ઇન્ડિયાએ ટ્રાવેલ એડવાઇઝરી જારી કરી છે. એર ઇન્ડિયાએ જણાવ્યું હતું કે મધ્ય પૂર્વના ભાગોમાં વિકસતી પરિસ્થિતિને કારણે, અહીંના તમામ સ્થળોએ એર ઇન્ડિયાની ફ્લાઇટ્સ સ્થગિત કરવામાં આવી છે. “અમે અમારા મુસાફરો અને ક્રૂની સલામતી માટે પ્રતિબદ્ધ છીએ,” એર ઇન્ડિયાએ જણાવ્યું હતું. એર ઇન્ડિયાએ કહ્યું હતું કે તેની ટીમો મુસાફરોને જરૂરી સહાય પૂરી પાડશે.

ઇઝરાયલી અધિકારીઓનો અંદાજ છે કે ઇઝરાયલી-અમેરિકાના સંયુક્ત હુમલામાં ઇરાની લશ્કર (IRGC) ના વડા જનરલ મોહમ્મદ પાકપુરનું મોત થયું હતું. અગાઉ, 2025 ના યુદ્ધમાં ઇરાની લશ્કરી વડાનું મોત થયું હતું. ઇઝરાયલનો એવો પણ અંદાજ છે કે ઇરાનના સંરક્ષણ પ્રધાન અને ગુપ્તચર વડા પણ માર્યા ગયા હશે. આ માહિતીની હજુ સુધી ઇઝરાયલી કે ઇરાની લશ્કર દ્વારા પુષ્ટિ કરવામાં આવી નથી.

અમેરિકા અને ઇઝરાયલે શનિવારે ઇરાનના અનેક શહેરો પર હવાઈ હુમલા કર્યા. ઇઝરાયલે જણાવ્યું હતું કે તેણે સાવચેતીના પગલા તરીકે ઇરાની લશ્કરી ઠેકાણાઓને નિશાન બનાવ્યા હતા. અમેરિકાએ પણ આ હુમલાઓમાં ઇઝરાયલીઓના હાથ હોવાની પુષ્ટિ કરી હતી. દરમિયાન, ઇરાને ઇઝરાયલ અને મધ્ય પૂર્વમાં અમેરિકન લશ્કરી ઠેકાણાઓને નિશાન બનાવીને બદલો લીધો હતો. ઇરાને કતાર, કુવૈત, બહેરીન, સાઉદી અરેબિયા અને યુએઈમાં અમેરિકન લશ્કરી ઠેકાણાઓ પર મિસાઇલ હુમલા કર્યા હતા. જોકે, ઇરાની હુમલામાં અત્યાર સુધી કોઈ મોટું નુકસાન થયું નથી. આનાથી ઇરાનની મિસાઇલ ક્ષમતા અને તેની રેન્જ પર પ્રશ્ન ઊભો થાય છે.

યુએસ ઓફિસ ઓફ ધ ડાયરેક્ટર ઓફ નેશનલ ઇન્ટેલિજન્સ અનુસાર, ઈરાન પાસે મધ્ય પૂર્વમાં બેલિસ્ટિક મિસાઈલોનો સૌથી મોટો ભંડાર છે. ઈરાની મિસાઈલોની રેન્જ 2,000 કિલોમીટર (1,240 માઈલ) છે. આ મિસાઈલો ઈરાનથી ઈઝરાયલ સુધી સરળતાથી પહોંચી શકે છે. ઈરાન પાસે તેહરાનમાં અને તેની આસપાસ અનેક મિસાઈલ સ્થળો છે. કરમાનશાહ અને સેમનાન સહિત વિવિધ પ્રાંતોમાં ઓછામાં ઓછા પાંચ જાણીતા ભૂગર્ભ “મિસાઈલ શહેરો” છે. ઈરાને આમાં હજારો બેલિસ્ટિક મિસાઈલો છુપાવી છે.

સેન્ટર ફોર સ્ટ્રેટેજિક એન્ડ ઇન્ટરનેશનલ સ્ટડીઝ અનુસાર, ઈરાનના શસ્ત્રાગારમાં ઘણી લાંબા અંતરની મિસાઇલોનો સમાવેશ થાય છે જે ઇઝરાયલ સુધી પહોંચી શકે છે. તેમાં જણાવાયું છે કે સેજિલ મિસાઇલની રેન્જ 2,000 કિલોમીટર, ઇમાદ મિસાઇલની રેન્જ 1,700 કિલોમીટર, ગદર મિસાઇલની રેન્જ 2,000 કિલોમીટર, શહાબ-3 મિસાઇલની રેન્જ 1,300 કિલોમીટર, ખોરમશહર મિસાઇલની રેન્જ 2,000 કિલોમીટર અને હોવેઇઝેહ મિસાઇલની રેન્જ 1,350 કિલોમીટર છે.

દેશની નવ મિસાઈલો ઈઝરાયલ સુધી પહોંચી શકે છે. આ રિપોર્ટમાં સેજિલ મિસાઈલને હાઇલાઇટ કરવામાં આવી છે. ISNA એ કહ્યું કે તે 17,000 કિલોમીટર (10,500 માઇલ) પ્રતિ કલાકની ઝડપે ઉડી શકે છે અને તેની રેન્જ 2,500 કિલોમીટર છે. વોશિંગ્ટન સ્થિત થિંક ટેન્ક આર્મ્સ કંટ્રોલ એસોસિએશન કહે છે કે ઈરાનના બેલિસ્ટિક શસ્ત્રોના ભંડારમાં શહાબ-1 મિસાઈલનો સમાવેશ થાય છે, જેની રેન્જ અંદાજિત 300 કિલોમીટર છે. આ ઉપરાંત, ઝોલ્ફાઘર મિસાઈલની રેન્જ 700 કિલોમીટર, શહાબ-3 મિસાઈલની રેન્જ 800 થી 1,000 કિલોમીટર અને ઈમાદ-1 મિસાઈલની રેન્જ 2,000 કિલોમીટર છે.

ઈરાન પર ઈઝરાયલ અને અમેરિકાના હુમલા બાદ, આયાતુલ્લાહ ખામેનેઈના સમર્થકોમાં તેમની સલામતી અંગે ચિંતા વધી ગઈ છે. તેહરાન દ્વારા ઈરાનના સર્વોચ્ચ નેતા આયાતુલ્લાહ અલી ખામેનીના સ્થાનને ગુપ્ત રાખવામાં આવ્યું છે. ઈઝરાયલે તેહરાનમાં તેમના કાર્યાલય નજીક હુમલો કર્યો હોવાથી ખામેનીની સલામતી અંગે પ્રશ્નો ઉભા થઈ રહ્યા છે. જોકે, હુમલા દરમિયાન ખામેનીના મુખ્યાલયમાં હતા કે નહીં તે સ્પષ્ટ નથી. એવું માનવામાં આવે છે કે તેમને સલામત સ્થળે લઈ જવામાં આવ્યા છે.

રોઇટર્સે એક ઈરાની અધિકારીને ટાંકીને દાવો કર્યો છે કે સુપ્રીમ નેતાને સલામત સ્થળે લઈ જવામાં આવ્યા છે. ઈરાન પર ઈઝરાયલી હુમલાઓ, ખાસ કરીને તેહરાનમાં તેમના કાર્યાલય નજીક થયેલા વિસ્ફોટો બાદ ખામેનીની સુરક્ષા વધારી દેવામાં આવી છે. એવું માનવામાં આવે છે કે તેમને ભૂગર્ભ બંકરમાં રાખવામાં આવ્યા છે.

ઇઝરાયલ અને યુનાઇટેડ સ્ટેટ્સે વારંવાર જણાવ્યું છે કે તેમનો ધ્યેય તેહરાનમાં અલી ખામેનીના નેતૃત્વ હેઠળના ઇસ્લામિક શાસનને ઉથલાવી નાખવાનો છે. ગયા વર્ષે જૂનમાં 12 દિવસના યુદ્ધ દરમિયાન ખામેનીને ખતમ કરવાના ઇઝરાયલી અને અમેરિકન પ્રયાસોના અહેવાલો સામે આવ્યા હતા. તેહરાનને ડર છે કે તેના સર્વોચ્ચ નેતા પર હુમલો થઈ શકે છે.

ઇઝરાયલ સાથે યુદ્ધ શરૂ થયા બાદથી ઇરાને અલી ખામેની માટે સુરક્ષા કડક કરી દીધી છે. તેહરાનના સૂત્રો કહે છે કે ખામેની અને અન્ય મહત્વપૂર્ણ નેતાઓ માટે ભૂગર્ભ બંકરો પહેલાથી જ તૈયાર કરવામાં આવ્યા હતા. શનિવારે હુમલા શરૂ થયા ત્યારે ખામેનીને સુરક્ષિત રાખવામાં આવ્યા હતા. ફક્ત થોડા વરિષ્ઠ અધિકારીઓ જ તેમના સ્થાન વિશે જાણતા હતા.

શનિવારે અમેરિકા અને ઇઝરાયલે ઇરાન પર હુમલો કર્યો . ઇઝરાયલના સંરક્ષણ પ્રધાને કહ્યું છે કે તેઓ સાવચેતી રાખીને પહેલા ઇરાન પર હુમલો કરશે. યુએસ પ્રમુખ ડોનાલ્ડ ટ્રમ્પે સોશિયલ મીડિયા પ્લેટફોર્મ ટ્રુથ સોશિયલ પર પુષ્ટિ આપી છે કે ઇરાન પરના હુમલામાં અમેરિકા સામેલ છે.

અમેરિકા અને ઇઝરાયલી હુમલા બાદ ઇરાને પણ બદલો લીધો છે. ઇરાને ઇઝરાયલ પર મિસાઇલોનો વરસાદ કર્યો છે. ઇરાને મધ્ય પૂર્વમાં યુએસ લશ્કરી ઠેકાણાઓ પર પણ હુમલો કર્યો છે. આનાથી સમગ્ર પશ્ચિમ એશિયામાં મોટા યુદ્ધનો ભય ઉભો થયો છે.

ઈરાન પર વળતા પ્રહાર બાદ ઈઝરાયલ હાઇઍલર્ટ પર : દેશભરમાં શૈક્ષણિક પ્રવૃત્તિઓ અને મેળાવડાઓ પર પ્રતિબંધ લગાવવામાં આવ્યો છે. ઈઝરાયલ દ્વારા ઈરાન પર કરવામાં આવેલા હવાઈ હુમલા બાદ ‘ઈઝરાયલ ડિફેન્સ ફોર્સીસ'(IDF)ના હોમ ફ્રન્ટ કમાન્ડે દેશભરમાં કડક પ્રતિબંધો લાગુ કર્યા છે.

પરિસ્થિતિની સમીક્ષા કર્યા બાદ નિર્ણય
પરિસ્થિતિની નવી સમીક્ષા કર્યા બાદ, સેનાએ જાહેરાત કરી છે કે તમામ શૈક્ષણિક પ્રવૃત્તિઓ, જાહેર મેળાવડાઓ અને બિન-આવશ્યક ક્ષેત્રોમાં કામકાજ પર પ્રતિબંધ રહેશે. માત્ર આવશ્યક સેવાઓ સાથે જોડાયેલા ક્ષેત્રોને જ કાર્યરત રહેવાની છૂટ આપવામાં આવી છે. ઈઝરાયલી સૈન્યએ શૈક્ષણિક સંસ્થાઓ, જાહેર કાર્યક્રમો અને કાર્યસ્થળો પર આ વ્યાપક પ્રતિબંધની જાહેરાત ઈરાન સામેના ‘પ્રી-એમ્પટિવ સ્ટ્રાઇક’ (અગમચેતીના ભાગરૂપે કરાયેલા હુમલા) બાદ કરી છે. ઈઝરાયલના સંરક્ષણ મંત્રીએ આ હુમલાને એક અનિવાર્ય અને જરૂરી પગલું ગણાવ્યું છે.

માત્ર જરૂરી ક્ષેત્રોને જ કાર્યરત રહેવા માટે આદેશ
સેનાએ એક નિવેદનમાં ભારપૂર્વક જણાવ્યું છે કે, આ પ્રતિબંધો વચ્ચે પણ આવશ્યક ક્ષેત્રો કાર્યરત રહેશે. ઈરાન તરફથી આવતા સંભવિત જોખમોને પહોંચી વળવા માટે વધારાના પ્રયાસોના ભાગરૂપે આ ગંભીર પગલાં લેવામાં આવ્યા છે. આ પ્રતિબંધો આ ક્ષેત્રમાં વધી રહેલા ભારે તણાવને સ્પષ્ટપણે દર્શાવે છે. ઈઝરાયલ સંભવિત જોખમોનો સામનો કરવા માટે મક્કમ પગલાં લઈ રહ્યું છે, જેની અસર ત્યાંની સામાન્ય જનતા પર લાદવામાં આવેલા આ વ્યાપક નાગરિક પ્રતિબંધોમાં જોવા મળી રહી છે.