નાસિકથી એક ખૂબ જ ગંભીર અને ચિંતાજનક કિસ્સો પ્રકાશમાં આવ્યો છે. નાસિક પોલીસે એક IT કંપનીની BPO સેવા સાથે સંકળાયેલા છ વ્યક્તિઓની ધરપકડ કરી છે. તેમના પર જુનિયર મહિલા કર્મચારીઓના જાતીય સતામણીનો આરોપ મૂકવામાં આવ્યો છે. અહેવાલો અનુસાર, કેટલીક મહિલા કર્મચારીઓએ વારંવાર ઉત્પીડનનો આરોપ લગાવતી ફરિયાદો નોંધાવી હતી. પોલીસે આ બાબતને ગંભીરતાથી લીધી અને કાર્યવાહી કરીને આરોપીની અટકાયત કરી.

દરમિયાન, આ મામલે કેટલાક દાવાઓ સામે આવ્યા છે, જેમાં ઓફિસમાં ધાર્મિક પ્રવૃત્તિઓ અને ધર્માંતરણ માટે દબાણનો આરોપ મૂકવામાં આવ્યો છે. મહારાષ્ટ્ર સરકારના મંત્રી નિતેશ રાણેએ આ મામલે તીવ્ર પ્રતિક્રિયા આપી છે. તેમણે નાસિકની ઘટનાને “કોર્પોરેટ જેહાદ” ગણાવી હતી અને કહ્યું હતું કે સમાજે આને ગંભીરતાથી લેવાની જરૂર છે. રાણેએ દાવો કર્યો હતો કે આશરે 15 પીડિત છોકરીઓએ ફરિયાદ નોંધાવી છે અને અન્ય પીડિતોને આગળ આવવા અપીલ કરી છે.

કંપનીના HR એ શું કાર્યવાહી કરી – નિતેશ રાણે
નિતેશ રાણેએ એમ પણ કહ્યું કે જો ક્યાંય પણ આવું વાતાવરણ સર્જાઈ રહ્યું છે, તો લોકોએ આગળ આવવું જોઈએ અને સરકાર તેમની સુરક્ષાની જવાબદારી લેશે. તેમણે એવો પણ પ્રશ્ન ઉઠાવ્યો કે જો આવી પ્રવૃત્તિઓ ચાલી રહી હોય તો કંપનીના HR વિભાગે શું પગલાં લીધાં. રાણેએ કહ્યું કે અમે જોયું કે જ્યારે આ આરોપીઓને કોર્ટમાં રજૂ કરવામાં આવ્યા ત્યારે 600 થી વધુ લોકો એકઠા થયા હતા. મારું સૂચન છે કે તેમની પૃષ્ઠભૂમિની પણ તપાસ કરવી જોઈએ. આતંકવાદીઓના અંતિમ સંસ્કારમાં અહીં ભીડ એકઠી થાય છે.

નિતેશ રાણેએ કહ્યું કે જ્યારે અશોક ખરાત કેસ પ્રકાશમાં આવ્યો ત્યારે કોઈ હિન્દુએ તેમનું સમર્થન કર્યું ન હતું, પરંતુ જ્યારે પણ આવું કંઈક બને છે ત્યારે આટલી ભીડ કેમ એકઠી થાય છે? રાણેએ પૂછ્યું કે હવે આ મુદ્દા પર કોઈ કેમ બોલતું નથી. જ્યારે પણ હું આવા મુદ્દાઓ ઉઠાવું છું, ત્યારે લોકો કહે છે કે હું બે સમુદાયો વચ્ચે નફરત પેદા કરી રહ્યો છું. હાલમાં, પોલીસ સમગ્ર મામલાની તપાસ કરી રહી છે અને આરોપો પાછળનું સત્ય શોધવાનો પ્રયાસ કરી રહી છે. આ કેસ સામે આવ્યા બાદ રાજ્યમાં રાજકારણ પણ તેજ બન્યું છે.

કેન્દ્રીય માધ્યમિક શિક્ષણ બોર્ડ દ્વારા રાષ્ટ્રીય શિક્ષણ નીતિ અંતર્ગત એક મહત્ત્વનો નિર્ણય લેવામાં આવ્યો છે, જે મુજબ હવે ધોરણ 6ના વિદ્યાર્થીઓ માટે ‘ત્રીજી ભાષા'(R3) ભણવી અનિવાર્ય બનશે. બોર્ડ દ્વારા બહાર પાડવામાં આવેલા તાજેતરના સર્ક્યુલર અનુસાર, તમામ સંબધિત શાળાઓને આગામી 7 દિવસમાં આ આદેશનો અમલ કરવા માટે કડક સૂચના આપવામાં આવી છે.

‘નેશનલ કરિક્યુલમ ફ્રેમવર્ક ફોર સ્કૂલ એજ્યુકેશન 2023′(NCF-SE) પર આધારિત આ પહેલનો મુખ્ય હેતુ વિદ્યાર્થીઓમાં ભાષાકીય કૌશલ્ય, સાંસ્કૃતિક સમજ અને રાષ્ટ્રીય એકતાને પ્રોત્સાહન આપવાનો છે. બોર્ડે સ્પષ્ટ કર્યું છે કે સત્તાવાર અભ્યાસક્રમ હજુ ઉપલબ્ધ ન હોવા છતાં, શિક્ષણ કાર્ય તાત્કાલિક શરૂ કરવું ફરજિયાત છે.

પુસ્તકો વગર જ શિક્ષણ કાર્ય શરૂ કરવા આદેશ
શાળાઓને સૂચના આપવામાં આવી છે કે જ્યાં સુધી પાઠ્યપુસ્તકો જાહેર ન થાય ત્યાં સુધી સ્થાનિક સ્તરે ઉપલબ્ધ અભ્યાસ સામગ્રીનો ઉપયોગ કરીને ભણાવવાનું શરૂ કરી દેવું. આ માટે શાળાઓએ પસંદ કરેલી ભાષાની વિગતો OASIS પોર્ટલ પર અપડેટ કરવાની રહેશે અને પ્રાદેશિક કચેરીઓને પણ આ અંગે જાણ કરવાની રહેશે. નોંધનીય છે કે ધોરણ 6માં જે ભાષાની પસંદગી કરવામાં આવશે, તે જ ભાષા ધોરણ 9 અને 10માં પણ વિકલ્પ તરીકે ઉપલબ્ધ રહેશે. CBSEના પ્રાદેશિક અધિકારીઓ આ અમલીકરણની પ્રક્રિયા પર સીધી દેખરેખ રાખશે અને ડેટા એકત્ર કરશે.

શું છે ત્રિભાષા(R3) મોડેલ?
ત્રિભાષા(R3) મોડેલ મુજબ, ધોરણ 6થી 10ના વિદ્યાર્થીઓએ ત્રણ ભાષાઓ ભણવી પડશે. આ મોડેલની સૌથી મહત્ત્વની શરત એ છે કે પસંદ કરવામાં આવેલી ત્રણ ભાષાઓમાંથી ઓછામાં ઓછી બે ભાષાઓ ભારતીય મૂળની હોવી જોઈએ, જ્યારે ત્રીજી ભાષા તરીકે અંગ્રેજી અથવા કોઈપણ વિદેશી ભાષાની પસંદગી કરી શકાશે. આ નવી શિક્ષણ પદ્ધતિને તબક્કાવાર રીતે લાગુ કરીને વર્ષ 2031ની બોર્ડ પરીક્ષા સુધીમાં સંપૂર્ણપણે પ્રભાવી બનાવવાની યોજના છે. આ નિર્ણયથી વિદ્યાર્થીઓમાં બહુભાષવાદ અને વિવિધ સંસ્કૃતિઓ પ્રત્યેનો આદર વધશે તેવી આશા વ્યક્ત કરવામાં આવી છે.

શિક્ષણ બોર્ડે R1, R2, R3થી ત્રણ લેગ્વેજ ફોર્મ્યુલા બનાવી છે…
R1(Language 1): આમાં તે ભાષાનો સમાવેશ કરાયો, જે બાળક વધુ જાણે છે(જેમ કે ગુજરાતી) આ ભાષાને ઉચ્ચ સ્તરે ભણાવવામાં આવશે.
R2(Language 2): આમાં સ્ટાન્ડર્ડ લેવલની બીજી ભાષાનો સમાવેશ કરાયો છે અને આ ભાષા મધ્ય સ્તરે ભણાવવામાં આવશે.
R3(Language 3): આમાં નવી ફરજિયાત ભાષા સામેલ છે, જેની ધોરણ-6થી શરૂઆત થશે.

અંગ્રેજી હવે વિદેશી ભાષા ગણાશે
સૌથી ચોંકાવનારો ફેરફાર એ છે કે, નવા નિયમોમાં અંગ્રેજીને વિદેશી ભાષા ગણવામાં આવી છે. આનો અર્થ એ થયો કે, જો તમે બાળકને અંગ્રેજી ભણાવવા ઈચ્છો તો તેણે બે ભારતીય ભાષા (જેમ કે હિન્દી-ગુજરાતી અથવા હિન્દી-મરાઠી) ફરજિયાત પસંદ કરવી પડશે.

સ્થાનિક સંસ્થાઓની ચૂંટણી પહેલા ગુજરાતમાં રાજકીય ગતિવિધિઓ તેજ થઈ ગઈ છે. ગુરુવારે બે અગ્રણી વ્યક્તિઓ ભારતીય જનતા પાર્ટી (BJP) માં જોડાયા છે. તાજેતરમાં સ્વૈચ્છિક નિવૃત્તિ (VRS) લેનારા ગુજરાત કેડરના IPS અધિકારી એમ.એલ. નિનામા અને આમ આદમી પાર્ટી (AAP) સાથે સંબંધો તોડી નાખનારા રાજુ કરપડા સત્તાવાર રીતે ભાજપમાં જોડાયા છે.

નિનામાએ તેમની નિર્ધારિત નિવૃત્તિ તારીખના ત્રણ મહિના પહેલા VRS પસંદ કર્યું હતું. તેઓ અરવલ્લી જિલ્લામાં સ્થિત શામળાજીમાં ભાજપમાં જોડાયા હતા. આદિજાતિ વિકાસ, ખાદ્ય અને નાગરિક પુરવઠા અને ગ્રાહક બાબતોના વિભાગોનું સંચાલન કરતા રાજ્ય મંત્રી પી.સી. બરંડા દ્વારા તેમનું પાર્ટીમાં સ્વાગત કરવામાં આવ્યું હતું. 59 વર્ષીય ભૂતપૂર્વ IPS અધિકારી આદિવાસી સમુદાયના છે અને ઉત્તર ગુજરાતના અરવલ્લી જિલ્લાના વતની છે.

નિનામા 30 જૂને નિવૃત્ત થવાના હતા
મૂળ રાજ્ય પોલીસ સેવામાં અધિકારી મનોજ નિનામાને ત્યારબાદ ભારતીય પોલીસ સેવા (IPS) માં બઢતી આપવામાં આવી હતી. તેમની અંતિમ પોસ્ટિંગ દરમિયાન તેમણે ગાંધીનગરમાં ટ્રાફિક શાખા માટે પોલીસ મહાનિરીક્ષક (IGP) તરીકે સેવા આપી હતી. તેઓ 30 જૂને નિવૃત્ત થવાના હતા. બુધવારે નિનામાએ મીડિયાને પુષ્ટિ આપી હતી કે તેમણે VRS લીધું છે અને સરકારે તેમનું રાજીનામું સ્વીકારી લીધું છે.

રાજુ કરપડા જણાવ્યું તેઓ ભાજપમાં કેમ જોડાયા
આ દરમિયાન આમ આદમી પાર્ટીના ભૂતપૂર્વ નેતા રાજુ કરપડા પણ ભાજપમાં જોડાયા છે. રાજુ કરપડા જે અગાઉ ગુજરાતમાં AAPના ખેડૂત સેલના વડા તરીકે સેવા આપી ચૂક્યા હતા. તેઓ ઔપચારિક રીતે ગાંધીનગરમાં BJPના સભ્ય બન્યા. તેમણે 11 ફેબ્રુઆરીએ AAPમાં તેમના તમામ પદો પરથી રાજીનામું આપી દીધું હતું. જાહેર સભાને સંબોધતા કરપડાએ કહ્યું, “જો હું ખેડૂતોના કલ્યાણ માટે કામ કરવા માંગુ છું તો મારે શાસક પક્ષ સાથે જોડાવાની જરૂર છે. હું ઇચ્છું છું કે સરકારી યોજનાઓ અને લાભો દરેક ખેતર સુધી પહોંચે અને આ પ્રાપ્ત કરવા માટે હું ભારતીય જનતા પાર્ટી સાથે મળીને કામ કરીશ.”

આ મહિને ગુજરાતમાં ‘સેમિફાઇનલ ચૂંટણીઓ’
ગુજરાતમાં 15 મ્યુનિસિપલ કોર્પોરેશનો સહિત તમામ સ્થાનિક સંસ્થાઓની ચૂંટણીઓ આ મહિને યોજાવાની છે. બધી બેઠકો માટે મતદાન 26 એપ્રિલે થશે અને પરિણામો 28 એપ્રિલે જાહેર થવાના છે. 2027ની વિધાનસભા ચૂંટણી માટે નાગરિક સંસ્થાઓની ચૂંટણીઓને સેમિફાઇનલ તરીકે જોવામાં આવી રહી છે. ભાજપ અને કોંગ્રેસ ઉપરાંત આમ આદમી પાર્ટી પણ જોરશોરથી તૈયારીઓમાં વ્યસ્ત છે.

આસામ, કેરળ અને કેન્દ્રશાસિત પ્રદેશ પુડુચેરીમાં આજે વિધાનસભા ચૂંટણી માટે એક જ તબક્કામાં મતદાન થઈ રહ્યું છે. સવારે 7 વાગ્યાથી શરૂ થયેલી આ પ્રક્રિયામાં મતદારોમાં ભારે ઉત્સાહ જોવા મળી રહ્યો છે. સાંજે 5 વાગ્યા સુધીના આંકડા મુજબ આસામમાં સૌથી વધુ 84.42%, પુડુચેરીમાં 86.92% અને કેરળમાં 75.01% મતદાન નોંધાયું છે. કેરળની 140, આસામની 126 અને પુડુચેરીની 30 બેઠકો પર જનતા ઉમેદવારોનું ભવિષ્ય નક્કી કરી રહી છે.

આસામની 722 ઉમેદવારો મેદાનમાં
આસામની 126 બેઠકો પર 722 ઉમેદવારો મેદાનમાં છે. શાંતિપૂર્ણ મતદાન માટે 31,940 મતદાન કેન્દ્રો પર 1.5 લાખથી વધુ સુરક્ષા કર્મીઓ તૈનાત કરવામાં આવ્યા છે. સંવેદનશીલ કેન્દ્રો પર માઇક્રો-ઓબ્ઝર્વર દ્વારા નજર રાખવામાં આવી રહી છે. મુખ્યમંત્રી હિમંતા બિસ્વા સરમાના નેતૃત્વમાં ભાજપ હેટ્રિક જીત મેળવવા માંગે છે, જ્યારે કોંગ્રેસે ગૌરવ ગોગોઈના ચહેરાને આગળ ધરીને સત્તા હાંસલ કરવા ઈચ્છે છે.

કેરળમાં ત્રિપાંખિયો જંગ
કેરળની તમામ 140 બેઠકો પર 883 ઉમેદવારો વચ્ચે મુકાબલો છે. અહીં 2.71 કરોડ મતદારો મતાધિકારનો ઉપયોગ કરશે. પિનરાઈ વિજયનની આગેવાની હેઠળનું LDF ત્રીજી વાર સત્તામાં આવવા ઈચ્છુક છે, જ્યારે કોંગ્રેસ નેતૃત્વ હેઠળનું UDF પોતાની ખોવાયેલી સત્તા મેળવવા મહેનત કરી રહ્યું છે. ભાજપ પણ અહીં પોતાની તાકાત વધારીને ખાતું ખોલવાની આશા રાખી રહ્યું છે.

પુડુચેરીમાં રાજકીય ઘમાસાણ અને જૂથ અથડામણ
પુડુચેરીમાં 30 બેઠકો પર 294 ઉમેદવારો મેદાનમાં છે. મતદાન દરમિયાન મન્નાદીપેટના તિરુકાનૂર ગામમાં ભાજપ અને કોંગ્રેસના કાર્યકરો વચ્ચે ઉગ્ર અથડામણ થઈ હતી. ભીડને વિખેરવા માટે પોલીસે લાઠીચાર્જ કરવો પડ્યો હતો, જોકે આ ઘટનાથી મતદાન પ્રક્રિયા પર કોઈ અસર પડી નથી.

પેટાચૂંટણી અને ગોવામાં હાઈકોર્ટની રોક
વિધાનસભા ચૂંટણીની સાથે જ આજે કર્ણાટકની 2, નાગાલેન્ડની 1 અને ત્રિપુરાની 1 બેઠક પર પેટાચૂંટણી યોજાઈ રહી છે. ગોવામાં પણ એક બેઠક પર પેટાચૂંટણી થવાની હતી, પરંતુ હાઈકોર્ટે તેના પર રોક લગાવી દેતા મુખ્યમંત્રી પ્રમોદ સાવંતે આશ્ચર્ય અને નિરાશા વ્યક્ત કરી છે.

ચૂંટણીમાં નોંધાયેલી અન્ય ઘટનાઓ
કોંગ્રેસની પોતાના જ ઉમેદવાર સામે ફરિયાદ : આસામ કોંગ્રેસે ઉદલગુડી બેઠકના ઉમેદવાર સુરેન ડેમરી સામે ફરિયાદ નોંધાવી છે. ડેમરીએ પક્ષ વિરુદ્ધ નિવેદન આપી રાજીનામું આપતા કોંગ્રેસે તેમની સામે FIRની માંગ કરી છે.

મતદાન અધિકારીનું નિધન : આસામના સોનિતપુર જિલ્લામાં એક મતદાન અધિકારી દેબેન હોરો (45) મૃત હાલતમાં મળી આવ્યા હતા. તેમની જગ્યાએ રિઝર્વ સ્ટાફ મૂકીને મતદાન પ્રક્રિયા ચાલુ રાખવામાં આવી હતી.

ગોપનીયતાના ભંગ બદલ FIR : આસામના કાર્બી આંગલોંગમાં મતદાન કેન્દ્રની અંદરનો વીડિયો સોશિયલ મીડિયા પર વાયરલ થતા ચૂંટણી પંચે ગંભીર નોંધ લીધી છે અને જવાબદારો સામે FIR દાખલ કરી તપાસ શરૂ કરી છે.

એક તરફ મધ્ય પૂર્વમાં બે અઠવાડિયા માટે સીઝફાયર થયું છે જેના પગલે વિશ્વના દેશોએ રાહતનો શ્વાસ લીધો છે તો બીજી તરફ યુનાઈટેડ નેશન (UN) તરફથી ભારત માટે એક સારા સમાચાર સામે આવી રહ્યા છે.

ભારતે સંયુક્ત રાષ્ટ્રમાં મોટી રાજદ્વારી સફળતા મેળવી છે. ભારતે ચાર મુખ્ય સંસ્થાઓની ચૂંટણીમાં જીત મેળવી છે અને સર્વાનુમતે થયેલી ચૂંટણીમાં ભારતની બિનહરીફ જીત થઈ છે. આ રીતે વિશ્વના રાજકાણમાં ભારતનું કદ વધ્યું છે.

ઉલ્લેખનીય છે કે છેલ્લા કેટલાક વર્ષોમાં સરકારની કેટલીક સારી નીતિઓને કારણે વૈશ્વિક મંચ પર ભારતનું પ્રભુત્વ વધ્યુ છે. ભારતે જે ચાર સંસ્થાઓની ચૂંટણીમાં વિજય મેળવ્યો તેમાં વિજ્ઞાન અને ટેકનોલોજી કમિશન ફોર ડેવલપ મેન્ટ, બિન-સરકારી સંગઠનો પરની સમિતિ અને પ્રોગ્રામિંગ અને સંકલનનો સમાવેશ થાય છે.

આ સાથે જ ચૂંટણી દ્વારા ભારતની વરિષ્ઠ રાજદ્વારી પ્રીતિ સરન (Preeti Saran)ની આર્થિક, સામાજિક અને સાંસ્કૃતિક અધિકારોની સમિતિ (CESCRમાં) ફરી પસંદગી કરવામાં આવી છે. અગાઉ પણ પ્રીતિ સરને સત્રનું અધ્યક્ષપદ સંભાળ્યું છે.

CESCR શું છે?
CESCRમાં 18 સ્વતંત્ર એક્સપર્ટનો હોય છે જે આર્થિક, સામાજિક અને સાંસ્કૃતિક અધિકારો પરના આંતરરાષ્ટ્રીય કરારના પાલનનું સતત નિરીક્ષણ કરે છે, જેમાં ખોરાક, રહેઠાણ, શિક્ષણ, આરોગ્ય, સામાજિક સુરક્ષા, પાણી અને સ્વચ્છતા જેવા મૂળભૂત અધિકારો સંબંધિત મુદ્દાઓનો સમાવેશ થાય છે. NGO સમિતિ સંયુક્ત રાષ્ટ્રમાં સિવિલ સોસાયટી સંગઠનોની ભાગીદારીને આકાર આપવામાં મહત્ત્વપૂર્ણ ભૂમિકા ભજવે છે. વિજ્ઞાન અને ટેકનોલોજી કમિશન વિકાસ અને ટકાઉ ભવિષ્ય સંબંધિત મુદ્દાઓ પર દિશા નિર્ધારિત કરે છે, જ્યારે કાર્યક્રમ અને સંકલન સમિતિ UN એજન્સીઓ વચ્ચે સંકલન સુનિશ્ચિત કરે છે.

ECOSOC શું છે?
નોંધનીય છે કે, ECOSOC એ સંયુક્ત રાષ્ટ્રની મુખ્ય વ્યવસ્થાનો એક ભાગ છે, જે સતત વિકાસના ત્રણ પરિમાણો આર્થિક, સામાજિક અને પર્યાવરણીયને આગળ વધારવા માટે કાર્ય કરે છે. આ સફળતા આ વૈશ્વિક મુદ્દાઓ પર ભારતની વધતી ભૂમિકા અને પ્રભાવને પણ રેખાંકિત કરે છે.