ગુજરાતમાં હાલમાં વાતાવરણમાં જબરદસ્ત પરિવર્તન જોવા મળી રહ્યું છે. ધોમધખતા તાપની વચ્ચે અચાનક વાતાવરણમાં ઠંડક પ્રસરી છે, રાજ્યના અનેક જિલ્લામાં ગઈ કાલે એકથી દોઢ ઈંચ સુધી વરસાદ પણ થયો છે. ધૂળની ડમરી અને ભારે પવન ફુંકાવા સાથે વાતાવરણમાં પલટો જોવા મળ્યો. મીની વાવાઝોડાએ ધરતીપુત્રોના સપનાઓ ઉડાવી નાખ્યા છે, છાપરા ઉડી ગયા છે, ઉભો પાક બળી ગયો છે અને ખેડૂતની મહેનત પળવારમાં રાખ થઈ ગઈ છે. ત્યારે બીજી તરફ હવામાન વિભાગે આગામી 24 કલાકમાં રાજ્યના અનેક વિસ્તારોમાં પવન સાથે વરસાદની આગાહી કરી છે. ધૂળની ડમરીઓ સાથે તોફાની પવન ફૂંકાઈ શકે છે.
હવામાન વિભાગ અને ગુજરાતના હવામાન નિષ્ણાત અંબાલાલ પટેલની આગાહી સામે આવી છે. હવામાન વિભાગ અનુસાર, વેસ્ટર્ન ડિસ્ટર્બન્સ અને સાયક્લોનિક સર્ક્યુલેશન જેવી સિસ્ટમ સક્રિય થવાને કારણે ગુજરાતના વાતાવરણમાં પલટો આવ્યો છે. હવામાન વિભાગ દ્વારા અનેક જિલ્લામાં રેડ એલર્ટ જાહેર કરવામાં આવ્યું છે.
20 માર્ચના રોજ બનાસકાંઠા, સાબરકાંઠા, અરવલ્લી, દાહોદ અને મહીસાગર જિલ્લામાં તેમજ કચ્છમાં છૂટાછવાયા સ્થળોએ હળવાથી મધ્યમ વરસાદ અને ગાજવીજ સાથે ઝાપટાં પડવાની સંભાવના છે. રાજ્યના બાકીના જિલ્લાઓમાં હવામાન સૂકું રહેવાની ધારણા છે. 24 કલાક બાદ તાપમાનમા વધારો રહી શકે છે. આગામી સાત દિવસ તાપમાનમા 4-5 ડિગ્રીનો વધારો થશે.
અંબાલાલ પટેલે આગાહી કરી છે કે, પશ્ચિમ વિક્ષેપના કારણે રાજ્યનું વાતાવરણ પલટાયું છે. રાજ્યમાં આવતીકાલ 20 માર્ચ સુધી વાદળછાયું વાતાવરણ રહેશે. ભારે પવન અને આંધી વંટોળ પણ આવી શકે છે. અંબાલાલ પટેલે રાજ્યમાં વધુ 3 પશ્ચિમ વિક્ષેપ આવવાની નવી આગાહી કરી છે. રાજ્યમાં 25થી 26 અને 28 થી 31 માર્ચે પણ ફરી બે પશ્વિમ વિક્ષેપ આવશે. જેના કારણે રાજ્યનું વાતાવરણ ફરી બદલાશે. એપ્રિલ મહિનામાં પણ વાતાવરણમાં પલટો આવવાની અંબાલાલ પટેલની આગાહી છે.
નવી આગાહી કહે છે કે, 2 સિસ્ટમ સક્રિય હોવાથી હાલ ગુજરાતમાં કમોસમી વરસાદના વાદળો બંધાયા છે. અપર એર સાયક્લોનિક સર્ક્યુલેશનના કારણે માવઠું પડી શકે છે. કમોસમી વરસાદનું એક કારણ વેસ્ટર્ન ડિસ્ટર્બન્સ પણ છે.
