સુરતના લિંબાયતના રુદ્ર પેલેશ સોસાયટીમાં નિર્માણાધીન મકાન પર સર્જાયેલા અકસ્માતના હચમચાવી નાખતા સીસીટીવી સામે આવ્યા છે. નિર્માણાધીન મકાનની બાલ્કનીમાં રેલિંગ ન હોય અકસ્માતે માતા-પુત્રી નીચે પટકાયા હતા. ધડાકાભેર અવાજ આવતા આસપાસથી લોકો દોડી આવ્યા હતા. સદનસીબે બંનેનો ચમત્કારિક બચાવ થયો હોવાનું સામે આવ્યું છે.
લિબાયતના રુદ્ર પેલેશ સોસાયટીમાં આ ઘટના બની, આ નવનિર્મિત મકાન કેવું બન્યું છે તે જોવાના ઉત્સાહમાં માતા અને તેની નાની પુત્રી પહેલા માળે ગયા હતા. મકાન હજુ નિર્માણાધીન હોવાથી બાલ્કનીમાં રેલિંગ કે અન્ય કોઈ સુરક્ષાની આડશ મૂકવામાં આવી નહોતી, જે આ અકસ્માતનું કારણ બની હતી. સમગ્ર ઘટના નજીક લાગેલા સીસીટીવી કેમેરામાં કેદ થઈ ગઈ છે.
આ ઘટના સૌથી વધુ ચકિત કરનાર એ રહી કે નીચે પટકાતાની સાથે જ નાની પુત્રી કોઈ ગંભીર ઇજા વિના તરત ઊભી થઈ ગઈ હતી અને પોતાની માતા તરફ દોડી ગઈ હતી. માતા નીચે પડ્યા બાદ થોડી ક્ષણો માટે અચેત અવસ્થામાં રહી હતી. ત્યારે પુત્રીએ હિંમત હાર્યા વગર પોતાની માતાને જગાડવાનો અને ઉઠાડવાનો પ્રયાસ કર્યો હતો. પુત્રીના આ માસૂમ પ્રયાસો જોઈને આસપાસના લોકો તરત જ દોડી આવ્યા અને બંનેને તાત્કાલિક સારવાર માટે હોસ્પિટલ ખસેડવામાં આવ્યા હતા.
ડોક્ટરોની તપાસ બાદ જાણવા મળ્યું હતું કે, આ ગંભીર દેખાતી ઘટનામાં પણ માતા અને પુત્રીને માત્ર સામાન્ય ઇજાઓ પહોંચી છે. બાલ્કનીમાં કોઈ પણ પ્રકારની સુરક્ષા વ્યવસ્થા ન હોવાને કારણે આ અકસ્માત સર્જાયો હોવાનું સામે આવ્યું છે. સ્થાનિકોમાં આ ઘટનાને લઈને નિર્માણાધીન મકાનોમાં સુરક્ષા વ્યવસ્થાની ગંભીર જરૂરિયાત અંગે ચર્ચા શરૂ થઈ છે.
