એક શખ્સે પોતાની પત્ની અને દીકરીની ધારદાર હથિયારથી હત્યા કરી નાખી હતી, તે પોતાના જમાઇની પણ હત્યા કરવા જતો હતો ત્યારે બનાવની જાણ થતાં પોલીસ ઘટના સ્થળે પહોંચી હતી અને જમાઇનું ઢીમ ઢાળે તે પહેલા પોલીસે તેને ઠાર કર્યો હતો.
આ અંગે વધુમાં જાણવા મળતી વિગત મુજબ ફેરફેક્સમાં 54 વર્ષના છત્ર થાપા નામના શખ્સે પોતાની પત્ની અને દીકરી પર ધારદાર હથિયારથી હુમલો કરતા તેમના મોત નિપજ્યા હતા.
પોલીસના જણાવ્યા મુજબ એક પોલીસ ઓફિસરે એપાર્ટમેન્ટની બહાર એક મહિલાને ધારદાર હથિયારથી હુમલો થયા બાદ લોહીથી લથબથ હાલતમાં જોઇ હતી.
પોલીસે જણાવ્યું હતું કે આરોપી તેના જમાઇ પર પણ હુમલો કરવા જઇ રહ્યો હતો ત્યારે તેમણે હુમલાખોરને હથિયાર નીચે રાખવાનું કહેવામાં આવ્યું હતું. વારંવાર ઓર્ડર કરવા છતાં તે નહીં માનતા તેને ગોળી મારી ઠાર કરાયો હતો. મૃતકોમાં હુમલાખોર છત્ર થાપા, પત્ની બિંદા થાપાનો સમાવેશ થાય છે. પોલીસના જણાવ્યા મુજબ ઘાયલ જમાઇને હોસ્પિટલે સારવાર માટે દાખલ કરાયો છે. સામુહિક હત્યાનું કારણ બહાર નથી આવ્યું.
