ઇન્ડિયન આઈડલ સીઝન 12ના વિજેતા અને લોકપ્રિય ગાયક પવનદીપ રાજનનો સોમવારે વહેલી સવારે 3:40 વાગ્યે ઉત્તર પ્રદેશના અમરોહા જિલ્લામાં ગંભીર કાર અકસ્માત થયો હતો. આ અકસ્માતમાં પવનદીપને ગંભીર ઈજાઓ થઈ છે અને તેઓ હાલમાં હોસ્પિટલમાં સારવાર હેઠળ છે.
સોશિયલ મીડિયા પર પવનદીપનો એક વીડિયો વાયરલ થઈ રહ્યો છે જેમાં તેઓ ઘાયલ હાલતમાં નજરે પડે છે અને ડોક્ટરો તેમનો સારવાર કરી રહ્યાં છે. મળતી માહિતી મુજબ પવનદીપના ડાબા પગ અને જમણા હાથમાં ઈજા પહોંચી છે. દુર્ઘટનાની વિગતો હજુ સામે આવી રહી છે, પરંતુ કારની હાલત જોઈ શકાય છે કે અકસ્માત કેટલો ખતરનાક હતો. પવનદીપના ચાહકો તેમના સ્વાસ્થ્યને લઈ ખુબ ચિંતિત છે અને તેમના માટે શુભેચ્છાઓ પાઠવી રહ્યા છે.
પવનદીપ રાજન ઉત્તરાખંડના ચમ્પાવત જિલ્લાના રહેવાસી છે. તેમના પિતા સુરેશ રાજન, માતા સરોજ રાજન અને બહેન જ્યોતિદીપ રાજન—ઓલ કુમાઉંની લોક કલાકાર છે. પવનદીપની મ્યુઝિક જર્ની 2015માં ‘દ વોઇસ ઈન્ડિયા’ જીતવાથી શરૂ થઈ હતી. ત્યારબાદ તેમણે ‘ઇન્ડિયન આઈડલ 12’ જીત્યો હતો અને ટ્રોફી સાથે કાર અને ₹25 લાખની ઇનામ રકમ જીતી હતી.
પવનદીપને વિવિધ મ્યુઝિક જોનર વચ્ચે સરળતાથી સ્વિચ કરવાની અને તેમના ઇન્સ્ટ્રુમેન્ટલ ટેલેન્ટ માટે ઓળખ મળે છે. રિયાલિટી શો પછી પણ તેઓ સક્રિય રીતે સોલો મ્યુઝિક કેરિયર આગળ ધપાવી રહ્યા છે. તેઓએ સ્વતંત્ર એલ્બમ રિલીઝ કર્યા છે, વિવિધ કલાકારો સાથે સહયોગ કર્યો છે અને ફિલ્મ મ્યુઝિકની દુનિયામાં પણ પગ મૂક્યો છે. સંગીત પ્રત્યેનો તેમનો સમર્પણ દરેક નોટમાં ઝલકે છે.
